દિવાળી ટાણે જ હેલ્મેટનો બોજો

હાઈકોર્ટના આદેશથી સરકારી કર્મચારીઓ માટે હેલ્મેટ ફરજિયાત થયા પણ સાથે સાથે સામાન્ય જનતાને પણ દંડ
પહેલાં જ દિવસે પોલીસ, કલેક્ટર અને મહાપાલિકાના ૪૫૦થી વધુ કર્મચારીઓ દંડાયા
રાજકોટ સહિત મોટા શહેરોમાં ચેકિંગ શરૂ થતાં જ લોકોમાં કચવાટ
આજથી રાજકોટમાં હેલ્મેટ વગર નીકળતાં ટુ-વ્હીલર ચાલકોને ઝપટે' લેશે પોલીસ-આરટીઓ

એક બાજુ દિવાળીની ઉજવણીનો ઝગમગાટ બજારમાં શરૂ થઈ ચૂક્યો છે બરાબર ત્યારે જ સરકાર દ્વારા લોકોના માથે હેલ્મેટનો બોજો નાખવામાં આવતાં જબરદસ્ત કચવાટ જોવા મળી રહ્યો છે. તાજેતરમાં જ હાઈકોર્ટે હેલ્મેટને લઈને ઢીલું વલણ દાખવવા બદલ સરકારનોઉધડો’ લઈ નાખતાં સરકાર દ્વારા સૌથી પહેલાં સરકારી કચેરીઓમાં ફરજિયાત હેલ્મેટનો નિયમ અમલી બનાવી દીધો હતો અને અનેક કર્મચારીઓને દંડ પણ ફટકાર્યો હતો. આ સાથે જ પ્રાદેશિક વાહન વ્યવહાર કચેરી-ગાંધીનગર દ્વારા આજથી દરેક ટુ-વ્હીલર ચાલક માટે હેલ્મેટ અને ફોર-વ્હીલર ચાલક માટે સીટબેલ્ટ ફરજિયાત કરવામાં આવતાં પોલીસ અને આરટીઓ દ્વારા સંયુક્ત રીતે ચેકિંગ ડ્રાઈવ શરૂ કરવામાં આવનાર હોવાનું જાણવા મળી રહ્યું છે.

રાજકોટમાં પોલીસ કમિશનર કચેરી, મહાપાલિકા કચેરી, કલેક્ટર કચેરી, જિલ્લા પંચાયત કચેરી, બહુમાળી ભવન સહિતની સરકારી કચેરીઓમાં સવારથી જ પોલીસ અને આરટીઓની ટીમ ગોઠવાઈ ગઈ હતી અને હેલ્મેટ પહેર્યા વગર કચેરીમાં પ્રવેશ કરતાં કર્મચારીઓને ઉભા રાખી રાખીને દંડની વસૂલાત કરવામાં આવી હતી. આ રીતે ૪૫૦થી વધુ કર્મીઓએ દંડ ભરપાઈ કરવો પડ્યો હતો.
આ ડ્રાઈવને એક જ દિવસ થયો ત્યાં વાહન વ્યવહાર કમિશનર-ગાંધીનગરની કચેરી દ્વારા નવો પરિપત્ર પ્રસિદ્ધ કરી દેવાયો હતો જેમાં જણાવ્યા પ્રમાણે વધતાં જતાં માર્ગ અકસ્માતો અને તેનાથી થતી ગંભીર ઈજા-મૃત્યુના બનાવો ધ્યાને લેતાં દ્વિચક્રી વાહનચાલકો માટે હેલ્મેટનો ઉપયોગ એ કાયદાનું પાલન ઉપરાંત વ્યક્તિની સુરક્ષા સુનિશ્ચિત કરે છે. ગુજરાતમાં અકસ્માત નિવારણના હેતુસર ટુ-વ્હીલર, ફોર-વ્હીલર વાહન ચલાવતા વાહન માલિકો દ્વારા હેલ્મેટ-સીટ બેલ્ટના ઉપયોગ અંગે મોટર વાહન કાયદામાં કરવામાં આવેલી જોગવાઈઓનું ચુસ્તપણે પાલન કરવામાં આવે તે માટે સ્પેશ્યલ ચેકિંગ ડ્રાઈવ યોજવામાં આવે. આ પ્રકારનો આદેશ છૂટતાં જ આરટીઓ તેમજ પોલીસ તંત્ર દ્વારા દંડરૂપી હથિયારની ધાર' સજાવવાનું શરૂ કરી દેવાયું હતું અને આજથી આ હથિયારનોઉપયોગ’ પણ શરૂ કરી દેવામાં આવશે !

હેલ્મેટ ન પહેર્યું હોય તો ૫૦૦નો દંડ
સરકારી કચેરીઓ બાદ આજથી આરટીઓ તેમજ પોલીસ દ્વારા સંયુક્ત ચેકિંગ ડ્રાઈવ કરવામાં આવશે અને હેલ્મેટ વગર નીકળનારા ચાલકો પાસેથી ૫૦૦ રૂપિયાના દંડની વસૂલાત કરાશે એટલા માટે લોકોએ દંડથી બચવા માટે હેલ્મેટ પહેરવું ફરજિયાત બની જશે.

સરકારી કચેરીઓની સાથે ટીમ બનાવી અલગ-અલગ રસ્તે કરાશે ડ્રાઈવ: ખપેડ
પોલીસ દ્વારા હેલ્મેટનો દંડ વસૂલાઈ જ રહ્યો છે, ઝુંબેશ વધુ સઘન બનશે: ડીસીપી
`વોઈસ ઓફ ડે’ દ્વારા આરટીઓ ઈન્સપેક્ટર કે.એમ.ખપેડને પૂછવામાં આવતાં તેમણે જણાવ્યું હતું કે સરકારી કચેરીઓની બહાર તો નિયમિત રીતે ચેકિંગ ડ્રાઈવ ચાલશે પરંતુ નવા પરિપત્રને પગલે આજથી અલગ-અલગ ટીમ બનાવી અલગ-અલગ વિસ્તારમાં ચેકિંગ કરાશે. જ્યારે ડીસીપી (ટ્રાફિક) પૂજા યાદવે જણાવ્યું હતું કે પોલીસ દ્વારા ઘણા સમયથી હેલ્મેટ નહીં પહેરવા અંગે દંડ વસૂલાઈ રહ્યો છે ત્યારે આજથી ઝુંબેશ વધુ સઘન બનાવી ડ્રાઈવ કરાશે. નવો પરિપત્ર સામાન્ય જનતાને અસરકર્તા હોવાથી હવે દરેક ટુ-વ્હીલરચાલક પાસે કાયદાનું પાલન કરાવાશે.