દેશમાં એક સાથે 500 નવા ઇલેક્ટ્રિક વ્હીકલ ચાર્જિંગ સ્ટેશનનો પ્રારંભ
વડાપ્રધાન નરેન્દ્ર મોદી તરફથી મોટી ભેટ : ૨૦ LNG સ્ટેશન પણ શરુ કરાવ્યા
વડાપ્રધાન નરેન્દ્ર મોદીએ રવિવારે પુણે શહેરમાં મેટ્રો રેલ પ્રોજેક્ટના પ્રથમ તબક્કાનું ઉદ્ઘાટન કર્યું હતું. આ સાથે તેમણે ગ્રીન એનર્જીના ક્ષેત્રમાં EV ચાર્જિંગ સ્ટેશન અને LNG સ્ટેશનની પણ શરૂઆત કરાવી હતી.
વડાપ્રધાન નરેન્દ્ર મોદીએ દેશમાં 500 નવા EV ચાર્જિંગ સ્ટેશન લોન્ચ કર્યા હતા. ભારત સરકારે વર્ષ 2025 સુધીમાં 10 હજાર EV ચાર્જિંગ સ્ટેશન સ્થાપિત કરવાનું લક્ષ્ય રાખ્યું છે. જેના માટે 1500 કરોડ રૂપિયા ફાળવવામાં આવ્યા છે. આ સાથે વડાપ્રધાને દેશમાં 20 લિક્વિફાઈડ નેચરલ ગેસ સ્ટેશનો પણ શરૂ કર્યા છે, જેમાંથી ત્રણ મહારાષ્ટ્રમાં સ્થાપિત કરવામાં આવ્યા છે.
વડાપ્રધાન મોદીએ પુણેમાં મેટ્રો રેલ પ્રોજેક્ટનું નેટવર્ક વિસ્તાર્યું છે. આ પ્રોજેક્ટ હેઠળ 9 નવા સ્ટેશનોનું વિસ્તરણ કરવામાં આવ્યું છે. આ સાથે સોલાપુર એરપોર્ટનું ઉદ્ઘાટન કરવામાં આવ્યું હતું.
વડાપ્રધાન મોદીએ આ યોજનાઓના લોન્ચિંગ પ્રસંગે પૂણેના લોકોને પણ સંબોધિત કર્યા હતા. વડાપ્રધાને કહ્યું કે આજે પુણે ગતિથી આગળ વધી રહ્યું છે. પુણેમાં મેટ્રો પહેલા આવવી જોઈતી હતી. મુખ્ય પ્રધાન એકનાથ શિંદેના નેતૃત્વમાં ડબલ એન્જિનની સરકાર સારું કામ કરી રહી છે.
