નવું વાહન લેવાની જીદમાં ધો.12ના વિદ્યાર્થીએ આપઘાત કરી લીધો
આજીડેમ ચોકડી પાસે ગોકુલ પાર્કનો બનાવ : એકના એક પુત્રએ ફાંસો ખાઈ જીવન ટૂંકાવી લીધું
હાલના સમયમમાં બાળકોની જીદને પૂરી કરવા માતા-પિતા બનતા પ્રયત્નો કરતાં હોય છે. પરંતુ ક્યારેક તેની જીદ ન પૂરી થતાં તેઓ કઈ જ વિચાર્યા વગર ન ભરવાનું પગલું ભરી લેતા હોય છે.ત્યારે આવો જ એક બનાવ સામે આવ્યો છે.આજીડેમ વિસ્તારમાં આવેલા ગોકુલપાર્કમાં રહેતા ધો.12નો વિદ્યાર્થીએ પિતા પાસે સ્કૂટર લેવાની જીદ કરી હતી. પરંતુ પિતાએ થોડા સમય બાદનું કહેતા પુત્રએ આપઘાત કરી લીધો હતો.
વિગત મુજબ આજીડેમ ચોકડી પાસે ગોકુલ પાર્ક શેરી નં. ૩ માં રહેતો હર્ષલ દિપકભાઇ જોષી (ઉ.વ. ૧૭) ગઇકાલે રાત્રે જમીને ઉપરના રૂમમાં ગયા બાદ પિતા ઉપરના રૂમમાં તેને બોલાવવા માટે જતા રૂમનો દરવાજો બંધ હતો. દરવાજો ખખડાવતા હર્ષલે દરવાજો ન ખોલતા દરવાજો તોડીને જોતાં હર્ષલ ગળાફાંસો ખાધેલી હાલતમાં મળી આવ્યો હતો.જેથી પરીવારે ૧૦૮ માં જાણ કરતા ૧૦૮ની ટીમે સ્થળ પર પહોંચી હતી અને ટીમે તપાસી હર્ષલને મૃત જાહેર કર્યો હતો. આ મામલે આજીડેમ પોલીસ મથકના હેડ કોન્સટેબલ જયદેવ બોસીયા તથા રાઇટર પ્રતાપભાઈ સહિતે સ્થળ પર પહોંચી તપાસ હાથધરી હતી. પોલીસની તપાસમાં મૃતક હર્ષલ ધોરણ -૧૨ માં અભ્યાસ કરતો હતો તેના પિતા ગ્રીનટેક નામની સોલાર કંપનીમાં નોકરી કરે છે. હર્ષલને નવુ એકસેસ ટુ-વ્હીલર લેવુ હોઇ તેનુ કોટેશન પણ કઢાવ્યુ હતું. પરંતુ પિતા એ નવુ વાહન થોડા સમય બાદ લેવાનું કહેતા તે વાતનું લાગી આવતા પુત્ર હર્ષલે આ પગલુ ભર્યુ હોવાનું જાણવા મળ્યું છે. એકના એક લાડકવાયા પુત્રના મૃત્યુથી પરિવારમાં શોક વ્યાપી ગયો છે.
