દેશમાં શાક ભાજીના ભાવ ક્યાં પહોંચ્યા ? વાંચો
દેશભરમાં ટામેટાં, ડુંગળી અને અન્ય શાકભાજીના વધતા ભાવોએ ઘરના રસોડાથી લઈને હોટેલીયર્સ સુધીના દરેકનું બજેટ ખોરવી નાખ્યું છે. પહેલા ટામેટાં અને ડુંગળીના ભાવમાં અચાનક વધારો થયો અને હવે શાકભાજી પણ મોંઘા થવા લાગ્યા છે. સામાન્ય આવક ધરાવતા લોકો ભારે મુસીબતમાં મુકાયા છે.
દેશભરમાં ટામેટાના ભાવ 80 રૂપિયાથી 100 રૂપિયા સુધી વધી ગયા છે. સાથે જ ડુંગળી પણ મોંઘવારીના કારણે લોકોને રડાવી રહી છે. તેની કિંમત પણ 45 થી 50 રૂપિયાની વચ્ચે છે. દેશના કેટલાક રાજ્યોના શાકભાજી બજારની સ્થિતિ ભાવની દ્રષ્ટિએ ચિંતાજનક બની ગઈ છે. જ્યાં ટામેટા અને ડુંગળી સહિત અનેક પ્રકારના શાકભાજીના ભાવ 50 રૂપિયા પ્રતિ કિલોથી વધુ છે.
ખાસ કરીને ઉત્તર અને મધ્ય ભારતીય રાજ્યો એમપી, યુપી, બિહાર, રાજસ્થાન અને પંજાબ અને દેશના અન્ય રાજ્યોમાં શાકભાજીના વધતા ભાવે લોકોને પરેશાન કર્યા છે. ભીંડા અને રીંગણાંના ભાવ કિલોએ 60 થી 80 રૂપિયા સુધી પહોંચી જતન લોકોની રાડ ફાટી ગઈ છે.
સૌથી વધુ જરૂરી છે લીલા મરચાં અને તેનો ભાવ કિલોએ રૂપિયા 200 સુધી પહોંચી ગયો છે. અલગ અલગ રાજ્યોમાં જુદા ભાવથી વેચાણ થઈ રહ્યું છે પણ બધા જ રાજ્યોમાં ભાવ ખૂબ જ ઊંચો રહ્યો છે. કારેલાનો ભાવ રૂપિયા 50 થી 60 થઈ ગયો છે. આદું પણ આસાક્ષમાં ઊડી રહ્યા છે અને તેનો ભાવ રૂપિયા 200 સુધી ગયો છે.
મોંઘવારીને લીધે સામાન્ય માનવીનું જીવન બદતર બની રહ્યું છે અને રોજનું લઈને રોજ ખાનારા લાખો લોકોની હાલત કફોડી થઈ ગઈ છે. હજુપણ ભાવ ઊંચે જવાની વેપારીઓએ દહેશત વ્યક્ત કરી છે.
