૨૫/૫થી ૨૫/૬ : TRP અગ્નિકાંડને આજે એક મહિનો પૂરો થયો છે અને કોંગ્રેસે ન્યાય માટે બંધનું એલાન આપ્યું છે
રાજકોટમાં ભ્રષ્ટાચાર અને લાપરવાહી ‘બંધ’ થાય તે જરૂરી
એક પણ તંત્ર એવું નથી જ્યાં અધિકારી પ્રમાણિક હોય..!!
બધા છૂટથી ખાય છે અને ખાવા પણ દ્યે છે..!!
ચમરબંધીઓને અપાતુ સુરક્ષા કવચ દુર કરવું જોઈએ
સાગઠીયા આણી મંડળી તો છીંડે ચડેલા ચોર જેવી છે..
૫૦ વર્ષ પહેલા આજના દિવસે દેશમાં કટોકટી લાગુ થઇ હતી, આજે રાજકોટવાસીઓ કટોકટીમાં છે
TRP અગ્નિકાંડને આજે એક મહિનો પૂરો થયો છે. આ એક મહિના દરમિયાન ઘણું બધું થયુ છે અને ઘણુ બધુ થવાનુ છે પરંતુ સરકારી તંત્રમાં ભ્રષ્ટાચાર અને અધિકારીઓની લાપરવાહી બંધ નથી થવાની તે નક્કી છે. કોંગ્રેસે અગ્નિકાંડનાં પીડિતોને ન્યાય મળે તે માટે આજે રાજકોટ બંધનું એલાન આપ્યું છે પણ ખરા અર્થમાં રાજકોટને ભ્રષ્ટાચાર અને લાપરવાહી બંધ થાય તે માટે બંધની જરૂર છે. આ એક મહિના દરમિયાન ઘણા ઉચ્ચ અધિકારીઓના ભોપાળા બહાર આવ્યા છે. બહારથી અહી પોસ્ટીંગ મેળવતા મોટા મોટા અધિકારીઓ ‘ રામ કી ચીડિયા, રામ કા ખેત ‘ ની જેમ અહીંથી રૂપિયા ઉસેડે છે અને સામાન્ય લોકોની આંખો ચાર થઇ જાય તેટલી મિલકતો એકઠી કરે છે. આવા અધિકારીઓ તેમની નીચેના અધિકારીઓને પણ આવી છૂટ આપે છે અને તેનો તાજો દાખલો ટાઉન પ્લાનિંગ અધિકારી એમ.ડી. સાગઠીયા છે.
સાગઠીયા અને બીજા જે જે અધિકારીની ધરપકડ થઇ છે અને હાલમાં જેલમાં છે તે તો છીંડે ચડેલા ચોર જેવા છે. ચોરી કરવી પાપ નથી પણ પકડાઈ જવું એ પાપ છે એવું બધા બોલતા હોય છે અને સાગઠીયાના મામલામાં આવું જ થયુ છે. જે પાપ થયુ તેમા સાગઠીયાથી ઘણા મોટા અધિકારીઓ ભાગીદાર છે પણ હજુ સુધી તેમને કાઈ થયું નથી.
રાજકોટમાં ચમરબંધીઓને રાજકારણીઓનું સુરક્ષા કવચ મળે છે તે બધાને ખબર હતી પણ આ અગ્નિકાંડથી તો તે સાબિત થઇ ગયું છે. હવે આ પ્રેક્ટીસ પણ બંધ કરવાની જરૂર છે.
અગ્નિકાંડની ઘટના પછી જે રીતે ભ્રષ્ટાચારની વિગતો બહાર આવી રહી છે તે સૌ કોઈને ચોંકાવી દ્યે તેવી છે. અહી જે સત્તામાં આવ્યુ તે વ્યક્તિએ ‘ હાથમાં એના મોઢામાં ‘ એમ માનીને ખાધુ છે.
રાજકોટની પ્રજા આ બધું મૂંગા મોઢે જોઈ રહી છે..સાંભળી રહી છે. સહન કરી રહી છે. પણ જો એક દિવસ આ ધીરજનો બંધ તૂટી જશે તો ઘણા રસ્તા ઉપર આવી જશે તે નક્કી છે. ચૂંટણી જીતી લીધી એટલે પ્રજાએ આપણને જેવા છીએ તેવા સ્વીકારી લીધા છે એમ માનવુ પણ ભૂલ ભરેલું છે.દેશમાં કોંગ્રેસના શાસનમાં કટોકટી લાગુ કરવામાં આવી હતી અને એ વાતને આજે ૨૫મી જુને ૫૦ વર્ષ પુરા થયા છે.પણ આજે ૨૫મી જુને રાજકોટવાસીઓ કટોકટીમાં છે. વડાપ્રધાને આજે કહ્યું કે કટોકટી એ ભારતની લોકશાહી ઉપર કલંક સમાન છે.. તો એ પણ કહેવું પડે કે અગ્નિકાંડ એ રાજકોટ ઉપર કલંક સમાન છે.
રાજકોટ આવું તો નહોતું જ..રાજકોટને એક સમયે રંગીલુ કહેવાતુ હતું..પરંતુ આજે શહેરને કોઈની નજર લાગી ગઈ છે.
