જેલમાં સાગઠિયાનો ‘કેપ્ટન’ ઈભલો !!
નસીબનો ખેલ: મહેલમાંથી જેલમાં ગયા બાદ ભ્રષ્ટાચારીઓની હાલત કફોડી
હિસ્ટ્રિશીટર ઈભલા ઉપરાંત ખૂન, છેતરપિંડી, મારામારી સહિતના ગુનામાં સંડોવાયેલા
ખૂંખાર’ આરોપી સાથે સાગઠિયાને ગોઠવાયા
રિમાન્ડ પૂર્ણ થયા બાદ બે દિવસ માટે જેલમાં ગયેલા સાગઠિયાને ગરમી લાગતાં પંખા પાસે સૂવા માટે કહ્યું પણ તેના માટે ઈભલા' પાસે કરવી પડી કાકલૂદી
જોષી, મકવાણા, ચૌધરી સહિતનાને અલગ બેરેકમાં શિફ્ટ કરાયા: સોમવારે જેલમાંથી છૂટેલા બે કેદીએ
વોઈસ ઓફ ડે’ સમક્ષ કર્યું અંદર'નું વર્ણન...
ટીઆરપી ગેઈમ ઝોન કે જ્યાં ૨૭ નિર્દોષ ભુંજાઈ ગયા હતા તે ગેઈમ ઝોન સામે આંખ આડા કાન કરનાર મહાપાલિકાના ભ્રષ્ટ (કદાચ ભ્રષ્ટ શબ્દ પણ ટૂંકા કહેવાશે) તત્કાલિન ટાઉન પ્લાનિંગ ઓફિસર એમ.ડી.સાગઠિયાને દબોચી લેવામાં આવ્યા છે. ક્રાઈમ બ્રાન્ચે ધરપકડ કર્યા બાદ સાગઠિયા ઉપરાંત ગૌતમ જોષી, જયદીપ ચૌધરી, મુકેશ મકવાણા, રાજેશ મકવાણા, રોહિત વિગોરા સહિતને રિમાન્ડ પર લીધા હતા. સાગઠિયા સહિતના રિમાન્ડ પૂર્ણ થયા બાદ તમામને જેલહવાલે કરવામાં આવ્યા હતા. દરમિયાન સાગઠિયાને જેલહવાલે કરાયા બાદ બે દિવસ સુધી જેલમાં રખાયા હતા. આ પછી નકલી મિનિટસ બુક મામલે ફરી ક્રાઈમ બ્રાન્ચે કબજો લઈને રિમાન્ડ પર લીધા હતા. હવે બે દિવસ સુધી સાગઠિયાની સાથે જ બેરેકમાં રહેલા બે કેદીએ
વોઈસ ઓફ ડે’ સમક્ષ અંદર'નું વર્ણન કરતાં જણાવ્યું કે જેલમાં સાગઠિયાનો
કેપ્ટન’ ખૂંખાર હિસ્ટ્રીશિટર ઈભલો છે !
બન્ને કેદીઓના જણાવ્યા પ્રમાણે જુગારક્લબ, મારામારી, પોલીસ પર હુમલા સહિતના અનેક ગુનામાં સંડોવાયેલા ઈભલા સાથે જ એમ.ડી.સાગઠિયાને રાખવામાં આવ્યા છે. આ બેરેકમાં કુલ ૪૭ કેદીઓ છે. સાગઠિયાને રિમાન્ડ પૂર્ણ થતાં જેલહવાલે કરાયા બાદ અંદરનું વાતાવરણ જોઈ તે હેબતાઈ ગયા હતા. જો કે કરેલા કર્મોનું ફળ મળ્યા વગર રહેતું નથી' માફક સાગઠિયા પાસે પસ્તાવા સિવાય અને જેલમાં રહેવા સિવાય કોઈ રસ્તો ન હોય સૌથી પહેલાં તેણે પંખાની નીચે પોતાનો
બીસ્તરો’ મતલબ કે પથારી પાથરવાનો આગ્રહ રાખ્યો હતો. જો કે આમ થઈ શકે તેમ ન્હોતું કેમ કે પંખા નીચે પથારી પાથરવી હોય તો `ઈભલા’ને કાકલૂદી કરવી જરૂરી હોવાથી અંદરના જ બે કેદીઓએ તેને પંખા નીચે પથારી પાથરવા મનાવ્યો હતો.
આ પછી ઈભલો માની ગયો હતો અને પંખા નીચે સાગઠિયાની વ્યવસ્થા કરી હતી. એવું પણ જાણવા મળ્યું છે કે જેલમાં નવું કોઈ કેદી આવે એટલે સૌથી પહેલાં તેણે શૌચાલય પાસે સૂવું ફરજિયાત હોય છે અને જેમ જેમ સમય પસાર થતો જાય તેમ તેમ તેની પથારી આગળ આવતી જાય છે ! હાલ સાગઠિયાના બીજી વખત રિમાન્ડ પૂર્ણ થઈ જતાં તેને ફરી જેલમાં ધકેલાયા છે ત્યારે હવે તેને શૌચાલય પાસે સૂવું પડે છે કે પછી પંખા નીચે સૂવા મળે છે તેની તેને જ ખબર પડશે ! સાગઠિયા ઉપરાંત આ કાંડ સાથે સંકળાયેલા અન્ય આરોપીઓને પણ અલગ-અલગ બેરેકમાં રાખવામાં આવ્યા છે. સાગઠિયાને જેલ બેરેકમાં રખાયા છે ત્યાં ઈભલા ઉપરાંત જંગલેશ્વરમાં હત્યા કરનાર આરોપી તેમજ છેતરપિંડી, મારામારી સહિતના ગુનાઓમાં પંકાયેલા આરોપીઓ સામેલ છે.
સાગઠિયાના હાથ-પગ અત્યારથી જ ધ્રુજવા લાગ્યા !
એવું પણ જાણવા મળ્યું છે કે એમ.ડી.સાગઠિયાના હાથ-પગ અત્યારથી જ ધ્રુજવા લાગ્યા છે. જેલ હવાલે થયા બાદ પ્રથમ દિવસે તે એકદમ હેબતાઈ ગયા હતા અને કશું બોલાવાની સ્થિતિમાં ન્હોતા. જો કોઈ તેને પૂછે તો જવાબ દેવામાં પણ ધ્રુજારી અનુભવી રહ્યા હતા. હજુ તો આ શરૂઆત હોય આગામી દિવસોમાં સાગઠિયાનો જેલવાસ કેવો રહે છે તે જોવું રહ્યું…
સાગઠિયા સહિતના એક પણને વધારાની કોઈ જ સુવિધા નહીં
રાજકોટ મધ્યસ્થ જેલના જેલર બી.બી.પરમારે `વોઈસ ઓફ ડે’ સાથેની વાતચીતમાં જણાવ્યું હતું કે જેલમાં કેદીને જે સુવિધા મળે છે તે જ સાગઠિયા સહિતનાને આપવામાં આવી રહી છે. આનાથી વધુ કોઈ પ્રકારની વ્યવસ્થા કરવામાં આવી નથી. આ લોકો અત્યારે ઘરનું ટિફિન જમી શકે તેમ હોવાથી તેના માટે ના કહેવામાં આવી રહી નથી. આ સિવાય ગાદલા સહિતની કોઈ સગવડ જેલ દ્વારા અપાતી નથી.
સાગઠિયાને મળવા કોણ કોણ આવે છે તેનું કરાતું વીડિયો રેકોર્ડિંગ
એમ.ડી.સાગઠિયા સહિતના આરોપીઓને જેલમાં મળવા આવનારી દરેક વ્યક્તિની પહેલાં રજિસ્ટરમાં એન્ટ્રી કરવામાં આવે છે. રજિસ્ટરમાં આવનાર વ્યક્તિ કેટલા વાગ્યે આવી તે સમય ઉપરાંત મળ્યા બાદ રવાના થયાનો સમય નોંધવામાં આવે છે. આ ઉપરાંત સાગઠિયા સાથે મુલાકાત કરનાર વ્યક્તિનું વીડિયો રેકોર્ડિંગ પણ કરવામાં આવે છે અને તમામ વસ્તુ સીટને મોકલવામાં આવતી હોવાનું જાણવા મળી રહ્યું છે.