૧ જુલાઈથી ક્રેડિટ કાર્ડ ધારકોએ BBPS મારફત જ પેમેન્ટ કરવું પડશે

પેમેન્ટ સિસ્ટમને વધુ સુરક્ષિત બનાવવાનું રીઝર્વ બેન્કનું લક્ષ્ય

1 જુલાઈ 2024થી ક્રેડિટ કાર્ડ પેમેન્ટ્સ સંબંધિત ફેરફારો લાગુ થવા જઈ રહ્યા છે. આ પછી, કેટલાક પેમેન્ટ પ્લેટફોર્મ દ્વારા બિલ પેમેન્ટમાં સમસ્યા આવી શકે છે. આ પ્લેટફોર્મ્સમાં CRED, PhonePe, BillDesk જેવી કેટલીક ફિનટેકનો સમાવેશ થાય છે.

રીઝર્વ બેંકના નવા નિયમ અનુસાર, 1 જુલાઈથી, તમામ ક્રેડિટ કાર્ડ બિલ પેમેન્ટ ભારત બિલ પેમેન્ટ સિસ્ટમ એટલે કે BBPS દ્વારા થવું જોઈએ. તે પછી દરેક વ્યક્તિએ ભારત બિલ પેમેન્ટ સિસ્ટમ (BBPS) દ્વારા બિલિંગ કરવાનું રહેશે.

સેન્ટ્રલ બેંક દ્વારા નિર્ધારિત સમયમર્યાદા પછી પણ, હજુ પણ ઘણી મોટી બેંકો છે જેણે નવા ફેરફારો હેઠળ તેમના નિયમોમાં ફેરફાર કર્યો નથી અને તેમાં HDFC બેંક, ICICI બેંક અને એક્સિસ બેંક સામેલ છે. અહેવાલ મુજબ, RBIના નવા નિયમન મુજબ, લગભગ 8 બેંકોએ આ દિશામાં પગલાં લીધા છે, જેમાં SBI, બેંક ઓફ બરોડા, કોટક મહિન્દ્રા બેંક, ફેડરલ બેંક અને ઇન્ડસઇન્ડ બેંકનો સમાવેશ થાય છે.

પેમેન્ટ સિસ્ટમને વધુ સુરક્ષિત બનાવવાનું લક્ષ્ય

રિઝર્વ બેંક ઓફ ઇન્ડિયાના આ નવા નિયમનો ઉદ્દેશ્ય પેમેન્ટ સિસ્ટમને વધુ સુરક્ષિત બનાવવાનો છે અને ભારતની પેમેન્ટ સિસ્ટમને વધુ સુરક્ષિત બનાવવાનો છે. નેશનલ પેમેન્ટ્સ કોર્પોરેશન ઓફ ઇન્ડિયા (NPCI) ના સહયોગથી, BBPS એ અલગ-અલગ પેમેન્ટ સર્વિસ માટે એક જ પ્લેટફોર્મ બનાવવાનું લક્ષ્ય નક્કી કર્યું છે. હવે તેને લાગૂ કરવાની ડેડલાઇન નજીક આવી રહી છે અને જો બેંકો નિર્ધારિત સમયમાં તેનું પાલન નહીં કરે, તો તે તેમના માટે તેમજ ક્રેડિટ કાર્ડ પેમેન્ટ્સ પર આધારિત ફિનટેક પ્લેટફોર્મ્સ માટે મુશ્કેલીનું કારણ બની શકે છે.

BBPS શું છે?
આ બિલ પેમેન્ટની એક ઇન્ટીગ્રેટેડ સિસ્ટમ છે, જે ગ્રાહકોને ઓનલાઈન બિલ પેમેન્ટ સર્વિસ પૂરી પાડે છે. તે NPCI ની દેખરેખ હેઠળ કામ કરે છે. ભારત બિલ પે એ એક ઇન્ટરફેસ છે જે ફોનપે, ક્રેડ સહિતના અન્ય ફિનટેક પ્લેટફોર્મ પર ઉપલબ્ધ છે અને તેના દ્વારા અલગ-અલગને બદલે એક જ પ્લેટફોર્મ પર તમામ પ્રકારના ક્રેડિટ કાર્ડ બિલ પેમેન્ટ કરી શકાય છે.