પોલીસ, RTO..હવે તો જાગો…આમાં તમારા લાડકવાયા પણ હોઈ શકે છે
માત્ર હાઈ-વે ઉપર ચેકીંગ કરવાથી સરકારી તીજોરી ભરાશે પણ જો દુર્ઘટના થઇ તો તેની ખોટ નહી ભરી શકાય
અગ્નિકાંડની ઘટનાને હજુ મહિનો પણ થયો નથી ત્યાં સરકારી તંત્ર પાછુ મૂળ કામગીરી કરવા લાગ્યુ છે. અત્યારે ગમે તે હાઈ-વે ઉપર અને ખાસ કરીને ગ્રીનલેન્ડ ચોકડીથી હીરાસર એરપોર્ટ સુધી પોલીસનું ચેકીંગ જોવા મળશે. સાંજે અખબારોમાં આટલા વાહન ચેક કરીને નિયમભંગ બદલ ફલાણા રૂપિયાનો દંડ કર્યો તેવી પ્રેસનોટ પહોંચી જાય છે અને વાહવાહી થાય છે પણ આ રીતે ઉઘરાણા કરીને સરકારી તિજોરી ભરતા પોલીસ તંત્ર અને આર.ટી.ઓ.ને શહેરની વચ્ચોવચ્ચ આવા દ્રશ્યો દેખાતા નથી તે આશ્ચર્ય જન્માવે છે. રાજકોટની કોઈ પણ મોટી ખાનગી સ્કુલ પાસે સવાર-સાંજ આવા દ્રશ્યો જોવા મળે છે.
અહી સ્કુલ વેન અને રિક્ષામાં કેપેસીટી બહાર વિદ્યાર્થીઓને બેસાડવામાં આવે છે. અહી કોઈની રોજીરોટી ઉપર અસર થાય તેવું કહેવાનો બિલકુલ આશય નથી પરંતુ જયારે વાત જીવના જોખમની આવે ત્યારે બધી લાગણીઓ કોરાણે મૂકી દેવી પડે. વડોદરામાં શુક્રવારે જે ઘટના બની તેવી ઘટના રાજકોટમાં પણ બની શકે છે. વડોદરામાં સ્કુલ વેનનો દરવાજો ખુલી જતા નાની નાની બાળાઓ બહાર ફેંકાઈ હતી.સદનસીબે કોઈને વધુ ઈજા થઇ ન હતી પરંતુ દર વખતે નસીબ આડુ આવે એવું ન પણ બને. રાજકોટમાં મોદી સ્કુલ હોય, ભરાડ સ્કુલ હોય કે પછી નિર્મલા કોન્વેન્ટ હોય બધી જગ્યાએ આ રીતે બાળકોને ભરવામાં આવે છે.
વેન ચાલકો બે પૈસા વધુ કમાવાની લાલચમાં વધુ બાળકોને બેસાડે છે અને વાલીઓ પણ આંખ આડા કાન કરીને બાળકોને જોખમમાં મુકે છે. દુર્ઘટનાઓ ક્યારેય કહીને નથી થતી..બધું આકસ્મિક જ થાય છે અને જયારે આવી દુર્ઘટના બનશે ત્યારે આંખોના આંસુ પણ નહી સુકાય !! વાલીઓએ અત્યારથી ચેતી જવાની જરૂર છે.
