વડાપ્રધાને કલમ 370 અંગે શું કહ્યું ? જુઓ

લોકસભાની ચુંટણીના પ્રચાર દરમિયાન વડાપ્રધાને મીડિયાને ખાસ મુલાકાત આપીને વિપક્ષ પર આકરા પ્રહાર કર્યા હતા. એમને સવાલ કરાયો હતો કે તમે તમારા છેલ્લા કાર્યકાળમાં ઘણી મોટી સિદ્ધિઓ હાંસલ કરી. તમે કલમ 370 હટાવી, તમે સીએએ લાવ્યા. પરંતુ, તેમના પ્રચારમાં, વિપક્ષી નેતાઓ કહી રહ્યા છે કે જો તેમની સરકાર બનશે તો તેઓ સીએએ રદ કરશે. પશ્ચિમ બંગાળના મુખ્યમંત્રી મમતા બેનર્જી કહી રહ્યા છે કે તેઓ સીએએ લાગુ થવા દેશે નહીં. તમે તેને કેવી રીતે જોશો? મોદીએ ભારે વિશ્વાસ સાથે એમ કહ્યું હતું કે કોઇની હિંમત નથી કે ફરીથી કલમ 370 લાગુ કરે.

વડાપ્રધાને કહ્યું હતું કે, ‘સૌથી પહેલા, જે ભારતના બંધારણને સમજે છે, જે ભારતનું સંઘીય માળખું જાણે છે અને જે જાણે છે કે કોના અધિકારક્ષેત્રમાં છે, તે ક્યારેય આ પ્રકારની વાતો નહીં કહે. કારણ કે તે તેમના અધિકારક્ષેત્રમાં નથી.

જો મોદી કોઈપણ રાજ્યના મુખ્યમંત્રી હોય તો તેઓ આવી વાતો ન કહી શકે. કેન્દ્ર સરકાર તેના દાયરામાં હોય તે જ કરશે. રાજ્ય સરકાર તેના કાર્યક્ષેત્રમાં જે હશે તે કરશે. પરંતુ લોકોને અંધારામાં રાખીને મૂર્ખ બનાવવું એ આજકાલ એક ટ્રેન્ડ છે. એટલા માટે તેઓ કંઈ પણ કહેતા રહે છે.

આ સિવાય મોદીએ કહ્યું કે, ‘હું કોંગ્રેસ પાર્ટીને એક પ્રેસ કોન્ફરન્સ યોજવાનો પડકાર ફેંકું છું અને કહું છું કે તેઓ કલમ 370ને પુનઃસ્થાપિત કરવાની વાત કરી જુએ. તેઓ બંધારણની મોટી મોટી વાતો કરે છે. તેઓ બાબા સાહેબ આંબેડકર વિશે વાત કરે છે. પરંતુ બાબા સાહેબ આંબેડકરનું બંધારણ આખા દેશને લાગુ પડતું ન હતું.

જમ્મુ-કાશ્મીરમાં 70 વર્ષથી ભારતીય બંધારણ લાગુ થયું ન હતું. ત્યાં, દલિતોને પ્રથમ વખત (કલમ 370 હટાવ્યા પછી) આરક્ષણ મળી રહ્યું છે. વાલ્મિકી સમાજને પહેલીવાર અનામત મળી રહી છે. તેઓ શું વાત કરી રહ્યા છે? શું તેમની પાસે પ્રેસ કોન્ફરન્સ કરીને ‘અમે કલમ 370 પાછી લાવીશું’ કહેવાની હિંમત છે? શું કોઈ પક્ષ આવું કહેવાની હિંમત કરી શકે?’