પ્રેમિકાના ભાઈની ધમકીથી ડરી ઝેરી દવા પી લેનાર યુવકનું મોત

• યુવકને ઇન્સ્ટાગ્રામ મારફત લાપાસરીની યુવતી સાથે પાંચ વર્ષ પહેલાં પરિચય થયો હતો : યુવતીના ભાઈ સામે મરવા મજબૂર કર્યાનો નોંધાતો ગુનો

રાજકોટમાં નાનામવા સર્કલ પાસે રહેતા યુવકને પાંચ વર્ષ પહેલા ઇન્સ્ટાગ્રામથી પરિચય થયેલી યુવતીના ભાઈ ભાવીન અશોક ગોસ્વામીએ તેની બહેન સાથે વાત ન કરવા બાબતે ધમકી આપી હતી.જેના ડરથી યુવકે ઝેરી દવા ગટગટાવી લેતાં તેને સારવાર માટે હોસ્પિટલમાં ખસેડવામાં આવ્યો હતો.જ્યાં તેનું ગઈકાલે મોત નીપજતા માલવિયા પોલીસ દ્વારા યુવતીના ભાઈ ભાવીન સામે ગુનો નોંધી ધરપકડ કરી છે.

વિગતો મુજબ રાજકોટમાં નાનામવા સર્કલ પાસે શિવ હાર્ડવેર ઉપર રહેતા આકાશ નરેન્દ્રભાઇ સોલંકી (ઉ.વ.26)એ 150 ફૂટ રિંગ રોડ પર પટેલ ટ્રાવેલ્સની ઓફિસ નજીક ઝેરી દવા પી લીધી હતી, યુવકને તાકીદે હોસ્પિટલમાં ખસેડવામાં આવ્યો હતો. જ્યારે બનાવની જાણ થતાં માલવિયાનગર પોલીસ દોડી ગઇ હતી.અને જાણવા મળ્યું કે,આકાશને લાપાસરીની યુવતી સાથે પાંચ વર્ષ પહેલા ઇન્સ્ટાગ્રામથી પરિચય થયો હતો.અને બંને ચેટિંગ બાદ ફોન પર વાતચીત કરવા લાગ્યા હતા અને બંને વચ્ચે પ્રેમસંબંધ બંધાયો હતો, પરંતુ કેટલાક સમય પહેલા યુવતીના ભાઇ ભાવીન અશોક ગોસ્વામીને આ બાબતની જાણ થતાં તેણે સંબંધ નહી રાખવા અને વાતચીત નહી કરવા બાબતે ધમકી આપી હતી.જેથી તેના ડરથી આકાશે ઝેરી દવા પી આપઘાત કરી લેતા માલવિયા પોલીસે યુવતીના ભાઈ ભાવીન ગોસ્વામી સામે ગુનો નોંધી તેની ધરપકડ કરી છે.