Deepfakeને સમાજ માટે મોટો ખતરો ગણાવતી સરકાર : ટૂંક સમયમાં નવો કાયદો
તમામ સોશિયલ મીડિયા પ્લેટફોર્મના પ્રતિનિધિઓ સાથેની બેઠકમાં નિયમનનો ડ્રાફ્ટ તૈયાર કરવાનો નિર્ણય
કેન્દ્રીય સંચાર અને માહિતી પ્રૌદ્યોગિક મંત્રી અશ્વિની વૈષ્ણવે ગુરુવારે ડીપફેક મુદ્દે સોશિયલ મીડિયા પ્લેટફોર્મના પ્રતિનિધિઓ સાથે એક મહત્વપૂર્ણ બેઠક યોજી હતી. IT પ્રધાન અશ્વિની વૈષ્ણવના જણાવ્યા અનુસાર કેન્દ્ર સરકાર ડીપફેક મુદ્દે સતર્ક છે અને તમામ સોશિયલ મીડિયા પ્લેટફોર્મના પ્રતિનિધિઓ સાથેની બેઠકમાં નિયમનનો ડ્રાફ્ટ તૈયાર કરવાનો નિર્ણય લેવામાં આવ્યો છે.
તાજેતરમાં જ ઘણા બોલિવૂડ કલાકારોને નિશાન બનાવતા ઘણા ડીપફેક વીડિયો સોશિયલ મીડિયા પ્લેટફોર્મ પર સર્ક્યુલેટ થયા હતા. આ અંગે અનેક લોકોએ નારાજગી વ્યક્ત કરી હતી. આનાથી નકલી સામગ્રી બનાવવા માટે ટેક્નોલોજી અને સાધનોના દુરુપયોગને લગતા ઘણા પ્રશ્નો પણ ઉભા થયા છે.
અશ્વિની વૈષ્ણવે જણાવ્યું હતું કે, ડીપફેક સમાજમાં એક મોટા ખતરા તરીકે ઉભરી આવ્યા છે. ખોટો ઓડિયો કે વિડિયો બનાવવામાં આવે છે, જેનાથી સમાજને નુકસાન થઈ રહ્યું છે. આની સામે વહેલી તકે પગલાં લેવાની જરૂર છે. કેન્દ્ર સરકાર સાથેની બેઠકમાં સોશિયલ મીડિયા પ્લેટફોર્મ્સે તેમના આંતરરાષ્ટ્રીય અનુભવો શેર કર્યા અને આ જોખમને સ્વીકાર્યું હતું.
કેન્દ્રીય મંત્રી અશ્વની વૈષ્ણવે કહ્યું કે, રેગ્યુલેશન ડ્રાફ્ટ થોડા અઠવાડિયામાં તૈયાર થઈ જશે. આજની બેઠકમાં તમામ સોશિયલ મીડિયા પ્લેટફોર્મના પ્રતિનિધિઓ હાજર રહ્યા હતા. AI ક્ષેત્રમાં કામ કરતી કંપનીઓના પ્રતિનિધિઓ પણ હાજર રહ્યા હતા. આગામી બેઠક ડિસેમ્બરના પ્રથમ સપ્તાહમાં યોજાશે. ત્યાં સુધી સોશિયલ મીડિયા પ્લેટફોર્મ્સે સરકારને કહ્યું છે કે, તેઓ તેમના સ્તરે જે પણ પગલાં લઈ શકે છે તે લેશે.
