‘તારા પર નજર રાખી રહ્યા છીએ’, અભિનેતા રણવીર શોરીને જાનથી મારી નાખવાની ધમકી, મુંબઈ પોલીસમાં ફરિયાદ
બોલિવૂડ અભિનેતા રણવીર શોરી ફરી એકવાર પોતાના નિવેદનોને લઈને ચર્ચામાં છે, પરંતુ આ વખતે મામલો તેની સુરક્ષા સાથે જોડાયેલો છે. અભિનેતાએ દાવો કર્યો છે કે તેને ઈમેલ દ્વારા જાનથી મારી નાખવાની ધમકીઓ મળી રહી છે. આ ધમકી ભર્યા મેસેજમાં તેની સાથે મારપીટ અને હુમલાની ચેતવણી આપવામાં આવી છે. મામલાને ગંભીરતાથી લેતા રણવીરે મુંબઈ પોલીસમાં ફરિયાદ નોંધાવી છે અને કાર્યવાહીની માંગ કરી છે.
રણવીર શોરીએ મંગળવારે સોશિયલ મીડિયા પ્લેટફોર્મ X પર આ અંગે માહિતી આપી હતી. તેણે કેટલાક ઈમેલના સ્ક્રીનશોટ શેર કર્યા હતા, જેમાં અપશબ્દો સાથે હિંસાની ધમકી આપવામાં આવી હતી. એક ઈમેલમાં ધમકી આપનારે દાવો કર્યો હતો કે તે રણવીરના લોકેશન અને તેની ગતિવિધિઓ પર સતત નજર રાખી રહ્યો છે. ઈમેલમાં લખ્યું હતું કે, ‘તારા પર નજર રાખી રહ્યા છીએ, યોગ્ય સમય આવ્યે હુમલો કરીશું.’ આ સ્ક્રીનશોટ સામે આવ્યા બાદ હડકંપ મચી ગયો હતો.
આ ધમકીઓ સામે આવ્યા બાદ રણવીરે તાત્કાલિક મુંબઈ પોલીસનો સંપર્ક કર્યો અને સત્તાવાર ફરિયાદ નોંધાવી હતી. તેણે X પર લખ્યું, ‘સત્તાવાર ફરિયાદ નોંધાવી દીધી છે. હવે આગળની કાર્યવાહી મુંબઈ પોલીસના હાથે છે. મારી સુરક્ષાને લઈને ચિંતા વ્યક્ત કરનારા તમામ લોકોનો આભાર.’ અભિનેતાએ સાયબર સુરક્ષા એજન્સીઓનું પણ ધ્યાન આ તરફ દોર્યું હતું. હાલ મુંબઈ પોલીસ આ મામલે તપાસ કરી રહી છે, જોકે ધમકી આપનારાઓની ઓળખ હજુ સુધી થઈ શકી નથી.
આ ઘટના એવા સમયે સામે આવી છે જ્યારે રણવીર શોરીના રાજકીય વિચારો અને CJPના વિરોધ પ્રદર્શનને લઈને આપેલી ટિપ્પણી પર સોશિયલ મીડિયા પર જોરદાર ચર્ચા ચાલી રહી છે. ટિપ્પણી બાદ તેને સોશિયલ મીડિયા પર ટ્રોલ પણ કરવામાં આવી રહ્યો હતો અને હવે સીધી જાનથી મારી નાખવાની ધમકી મળતા મામલો વધુ ગંભીર બન્યો છે.
આ પહેલીવાર નથી જ્યારે કોઈ બોલિવૂડ સેલિબ્રિટીને આવી ધમકી મળી હોય. આ પહેલા પણ ઘણા અભિનેતાઓ અને અભિનેત્રીઓને સોશિયલ મીડિયા કે ઈમેલ દ્વારા ધમકીઓ મળી ચૂકી છે. સેલિબ્રિટીઓના નિવેદનો બાદ તેમને નિશાન બનાવવાની ઘટનાઓ વધી રહી છે. આ મામલો ફરી એકવાર સેલિબ્રિટીઓની સાયબર સુરક્ષા અને સુરક્ષાના મુદ્દાને ઉજાગર કરે છે.
હાલ તો રણવીર શોરીએ પોલીસમાં ફરિયાદ નોંધાવી દીધી છે અને હવે તમામની નજર મુંબઈ પોલીસની કાર્યવાહી પર છે. પોલીસ આ ઈમેલનું ટેકનિકલ એનાલિસિસ કરીને ધમકી આપનાર સુધી પહોંચવાનો પ્રયાસ કરશે. જો કે, જ્યાં સુધી આરોપીઓ પકડાતા નથી ત્યાં સુધી આ મામલો ચર્ચામાં રહેશે. રણવીર શોરીના ચાહકો ઈચ્છી રહ્યા છે કે પોલીસ ઝડપથી કાર્યવાહી કરે અને તેને સુરક્ષા પૂરી પાડવામાં આવે.
