1 કરોડ મહિલાઓને 1-1 લાખ રૂપિયા: યુપીની ચૂંટણી જીતવા યોગી સરકારનો માસ્ટરપ્લાન!

આગામી વિધાનસભા ચૂંટણીને ધ્યાનમાં રાખીને ઉત્તર પ્રદેશની યોગી આદિત્યનાથ સરકારે રાજ્યની મહિલાઓ માટે એક અત્યંત મહત્વાકાંક્ષી અને લોકકલ્યાણકારી આર્થિક યોજના તૈયાર કરી છે. આ યોજના અંતર્ગત પ્રદેશની એક કરોડ મહિલાઓને સીધા તેમના બેંક ખાતામાં ૧-૧ લાખ રૂપિયાની નાકીય સહાય પૂરી પાડવામાં આવશે. મહિલાઓને આર્થિક રીતે સશક્ત બનાવવા અને સ્વરોજગાર તરફ પ્રોત્સાહિત કરવા માટે સરકારે આ માસ્ટરપ્લાન ઘડ્યો છે, જે આગામી ચૂંટણીમાં મોટો ગેમચેંજર સાબિત થઈ શકે છે.

ત્રણ અલગ-અલગ તબક્કામાં મળશે નાણાકીય સહાય

આ યોજનાની ખાસિયત એ છે કે મહિલાઓને કુલ એક લાખ રૂપિયાની આર્થિક સહાય ત્રણ અલગ-અલગ હપ્તામાં સીધી તેમના બેંક ખાતામાં જમા કરવામાં આવશે. યોજનાના નિયમો મુજબ પ્રથમ હપ્તા તરીકે ૨૦,૦૦૦ રૂપિયા આગામી ડિસેમ્બર મહિનામાં આપવામાં આવશે. ત્યારબાદ ૩૦,૦૦૦ રૂપિયાનો બીજો હપ્તો અને અંતમાં ૫૦,૦૦૦ રૂપિયાનો ત્રીજો હપ્તો આપવામાં આવશે. અગાઉ બિહારમાં પણ ચૂંટણી પૂર્વે આ પ્રકારની યોજના અમલમાં મુકવામાં આવી હતી, જેને ધ્યાનમાં રાખીને યુપી સરકારે આ મોટું પગલું ભર્યું છે.

વ્યાજમુક્ત લોન અને સ્વયં સહાય જૂથોનો વ્યાપ

ઉત્તર પ્રદેશ રાજ્ય આજીવિકા મિશન અંતર્ગત આ રકમ મહિલાઓને વ્યાજમુક્ત ઋણ તરીકે આપવામાં આવશે. આ માટે સ્વયં સહાય જૂથો સાથે સંકળાયેલી અંદાજે એક કરોડ મહિલાઓને વિશેષ ક્રેડિટ કાર્ડ આપવામાં આવશે અને આ સમગ્ર યોજના આગામી ત્રણ વર્ષ સુધી અમલમાં રહેશે. આ સહાય દ્વારા મહિલાઓ પોતાના નાના વ્યવસાયો અને ઉદ્યોગોને વધુ વિસ્તાર આપી શકશે, જેનાથી પ્રત્યક્ષ કે અપ્રત્યક્ષ રીતે ૩ થી ૪ કરોડ લોકોને લાભ મળવાની પૂરતી અપેક્ષા છે.

આ પણ વાંચો: સૌરાષ્ટ્રમાં વરસાદી માહોલ: અમરેલી અને ખંભાળિયામાં ધોધમાર ઝાપટાં, અમરેલીથી દ્વારકા સુધી ખેડૂતોમાં હરખ!

ડિજિટલ સશક્તિકરણ અને મહિલા શક્તિ કેન્દ્રો

નાણાકીય સહાય ઉપરાંત મહિલા જૂથોને ડિજિટલ સુવિધાઓ સાથે જોડવા માટે વિશેષ ‘આઈડી કાર્ડ’ આપવામાં આવશે, જેનાથી ઓનલાઇન વેચાણ, ડિજિટલ પેમેન્ટ અને માર્કેટિંગ સરળ બનશે. આ સાથે જ ઈ-રિક્ષા યોજના અંતર્ગત ૨ લાખ રૂપિયા સુધીના વાહનોની ખરીદી પર પણ સહાય મળશે તથા રાજ્યમાં ૧૦૦ નવા ‘મહિલા શક્તિ કેન્દ્ર’ સ્થાપવાના પણ દિશા-નિર્દેશો જારી કરવામાં આવ્યા છે.

યોગી સરકારની આ યોજના માત્ર એક આર્થિક સહાય નથી પરંતુ મહિલા સશક્તિકરણની દિશામાં એક મોટું રાજકીય અને સામાજિક પગલું છે. ચૂંટણીના માહોલ વચ્ચે એક કરોડ મહિલાઓના ખાતામાં સીધા નાણાં જમા કરાવવાની આ રણનીતિ શાસક પક્ષ માટે અત્યંત ફાયદાકારક સાબિત થઈ શકે છે. આનાથી ગ્રામીણ અને અર્ધશહેરી વિસ્તારોની મહિલાઓ આર્થિક રીતે પગભર બનવાની સાથે સ્વરોજગાર તરફ આગળ વધી શકશે.