CJP પ્રદર્શન કેસમાં મેજિસ્ટ્રેટની દાદાગીરી પર ચીફ જસ્ટિસ લાલઘૂમ, પૂછ્યું- સુપ્રીમના આદેશને અવગણવાની હિંમત ક્યાંથી આવી?

ક્યારેક કાયદાના રક્ષકો જ કાયદાની મર્યાદાઓ અને સર્વોચ્ચ અદાલતના આદેશોને અવગણવાની ભૂલ કરી બેસતા હોય છે, ત્યારે ન્યાયતંત્ર પોતાની કડક ભૂમિકા ભજવવાથી પાછું પાછું પડતું નથી. તાજેતરમાં જ દેશની સર્વોચ્ચ અદાલતમાં કંઈક આવો જ ચોંકાવનારો મામલો સામે આવ્યો છે, જ્યાં સુપ્રીમ કોર્ટના સ્પષ્ટ અને દેશવ્યાપી આદેશો છતાં એક સ્થાનિક મેજિસ્ટ્રેટે વિદ્યાર્થી વિરુદ્ધ કાર્યવાહી કરતા મામલો ગરમાયો છે. આ ઘટના માત્ર એક નોટિસ પૂરતી મર્યાદિત નથી, પરંતુ ન્યાયિક આદેશોના પાલન અને નાગરિકોના હકો સાથે જોડાયેલી એક ગંભીર ચર્ચા બની ગઈ છે.

સુપ્રીમ કોર્ટની લાલ આંખ અને મેજિસ્ટ્રેટનો ઉધડો

ગ્રેટર નોઈડાના એક્ઝિક્યુટિવ મેજિસ્ટ્રેટ દ્વારા લેવાયેલા પગલાં સામે સુપ્રીમ કોર્ટે ભારે નારાજગી વ્યક્ત કરી છે. ‘કોકરોચ જનતા પાર્ટી’ (CJP) ના પ્રસ્તાવિત વિરોધ પ્રદર્શનમાં જોડાવા માટે પ્રચાર કરતા એક લો વિદ્યાર્થીને શાંતિભંગની નોટિસ ફટકારવામાં આવી હતી. 1 સપ્ટેમ્બરના રોજ સુપ્રીમ કોર્ટે સ્પષ્ટ આદેશ આપ્યો હતો કે વિદ્યાર્થીઓ સામે કોઈપણ પ્રકારની દંડાત્મક કાર્યવાહી કરવામાં ન આવે. આ સ્પષ્ટ નિર્દેશો હોવા છતાં મેજિસ્ટ્રેટે કાર્યવાહી ચાલુ રાખતા ચીફ જસ્ટિસ (CJI) સૂર્યકાંતની બેન્ચે આકરા પ્રહારો કર્યા હતા અને સવાલ કર્યો હતો કે, ‘કોઈપણ મેજિસ્ટ્રેટ આદેશનું ઉલ્લંઘન કરવાની હિંમત કેવી રીતે કરી શકે?’

આ પણ વાંચો: એન્જિનિયર-મશીન બધું જ ફેલ..!! 170 વર્ષ જૂના ખડે હનુમાનજીણી પ્રતિમા સહેજ પણ હલી નહીં

ભારતીય નાગરિક સુરક્ષા સંહિતા (BNSS) હેઠળ વિવાદાસ્પદ નોટિસ

ઘટનાની વિગતો મુજબ, નોઈડા પોલીસના રિપોર્ટના આધારે મેજિસ્ટ્રેટની અદાલતે બીજા વર્ષના લોના વિદ્યાર્થી અક્ષત ત્રિપાઠી સામે BNSS ની કલમ હેઠળ નોટિસ પાઠવી હતી. પોલીસનો દાવો હતો કે વિદ્યાર્થી અન્ય યુનિવર્સિટીના યુવાનોને ગેરમાર્ગે દોરીને સરકાર વિરોધી વાતો ફેલાવી રહ્યો છે અને વિરોધ પ્રદર્શનમાં જોડાવા માટે ઉશ્કેરી રહ્યો છે. જોકે, આ મામલે કોર્ટે કડક વલણ અપનાવતા સવાલ ઉઠાવ્યો હતો કે જ્યારે વિદ્યાર્થીઓ સંબંધિત તમામ એફઆઈઆર અને કાર્યવાહી પર રોક લગાવાઈ છે, ત્યારે આ પ્રકારની નોટિસ કેવી રીતે ફટકારી શકાય?

અદાલતી અવમાનના અને વિદ્યાર્થીઓમાં ડરનો માહોલ

સુપ્રીમ કોર્ટમાં સુનાવણી દરમિયાન વકીલ દ્વારા રજૂઆત કરવામાં આવી હતી કે અધિકારીઓ દ્વારા વિદ્યાર્થીઓમાં ભયનો માહોલ ઊભો કરવાનો પ્રયાસ થઈ રહ્યો છે, જે સીધી રીતે કોર્ટના આદેશોનો અનાદર છે. જોકે વિવાદ વધતો જોઈને મેજિસ્ટ્રેટ દ્વારા નોટિસ પાછી ખેંચી લેવામાં આવી હોવાના અહેવાલો પણ સામે આવ્યા છે, પરંતુ સુપ્રીમ કોર્ટે આ મામલાને હળવાશથી લીધો નથી. કોર્ટે આ મામલે નોટિસને રેકોર્ડ પર લાવવા અને સંબંધિત અધિકારી પાસેથી લેખિત સ્પષ્ટતા માંગવાના નિર્દેશો આપ્યા છે.

આ સમગ્ર ઘટના એ વાતની સાક્ષી પૂરે છે કે દેશના સર્વોચ્ચ ન્યાયાલયના આદેશો સર્વોપરી છે અને તેના પાલન બાબતે કોઈપણ સ્તરે બેદરકારી કે મનમાની સાંખી લેવામાં આવતી નથી. ભલે નોટિસ પાછી ખેંચી લેવામાં આવી હોય, પરંતુ ન્યાયિક આદેશોની અવગણના સામે સુપ્રીમ કોર્ટનું કડક વલણ એ વાત સ્પષ્ટ કરે છે કે કાયદાનું શાસન જાળવી રાખવા માટે અદાલત હંમેશાં સજાગ અને તત્પર છે.