ડિજિટલ યુગમાં ઓનલાઈન સુવિધાઓ જેટલી સરળ બની છે, તેટલા જ સાયબર અપરાધોના જોખમો પણ વધ્યા છે. અમદાવાદમાં ટ્રાફિક ઈ-ચલણ ભરવાના નામે વાહનચાલકોને શિકાર બનાવતી ઠગ ટોળકી સક્રિય થઈ છે, જેણે તાજેતરમાં જ બે વેપારીઓના બેંક ખાતા ખાલી કરી નાખતા હડકંપ મચી ગયો છે.
ઈસનપુરના વેપારીના ખાતામાંથી 4.58 લાખ રૂપિયા સાફ
અમદાવાદના ઈસનપુર વિસ્તારમાં કુણાલ ઈન્ફોટેક ચલાવતા 38 વર્ષીય કુણાલ પ્રજાપતિના ફોન પર ગાડી (GJ27AP6801) નો 1,000 રૂપિયાનો ઈ-મેમો ભરવા અંગેનો મેસેજ આવ્યો હતો. મેસેજમાં પોતાનો સાચો વાહન નંબર જોઈને તેમણે આપેલી લિંક પર ક્લિક કર્યું હતું, પરંતુ કોઈ પ્રોસેસ ન થતાં અસંખ્ય OTP આવવા લાગ્યા. મોડી રાત્રે બેંક ખાતામાંથી વારાફરતી 6 ટ્રાન્ઝેક્શન થઈને કુલ 4,58,000 રૂપિયા કપાઈ ગયા હોવાની જાણ થતાં તેમણે સાયબર હેલ્પલાઈન 1930 પર ફરિયાદ નોંધાવી હતી.
આ પણ વાંચો: SBIમાં ખાતું છે? 1 ઓક્ટોબરથી બદલાયા ATM અને સ્ટેટમેન્ટના નિયમો!
બહેરામપુરાના વેપારી સાથે ફ્રોડ: એપ્લિકેશન ડાઉનલોડ થતાં ઉપડ્યા 2.21 લાખ
સાયબર ઠગાઈનો બીજો કિસ્સો બહેરામપુરા વિસ્તારમાં બન્યો છે, જ્યાં 48 વર્ષીય કલ્પેશ કાલેના વોટ્સએપ પર ઈ-ચલણ ભરવાની લિંક અને વાહન નંબર મોકલવામાં આવ્યા હતા. ઈ-મેમો બાકી હોવાનું માનીને તેમણે લિંક ઓપન કરતાં જ મોબાઈલમાં એક નકલી એપ્લિકેશન ડાઉનલોડ થઈ ગઈ હતી. ઠગ ટોળકીએ આ એપ્લિકેશન દ્વારા મોબાઈલનો એક્સેસ મેળવીને અલગ-અલગ ટ્રાન્ઝેક્શન દ્વારા કુલ 2.21 લાખ રૂપિયા ઉપાડી લીધા હતા.
સાયબર ઠગો કેવી રીતે આચર છે આ ફ્રોડ?
સાયબર નિષ્ણાતોના જણાવ્યા મુજબ, ઠગો ડેટા લીક કે અન્ય માધ્યમોથી વાહનચાલકોનો સાચો નંબર મેળવી લે છે. ત્યારબાદ અસલી ટ્રાફિક પોલીસ જેવો જ આબેહૂબ મેસેજ મોકલે છે. જેવી વ્યક્તિ લિંક પર ક્લિક કરે કે બેકગ્રાઉન્ડમાં માલિશિયસ APK ફાઈલ (એપ) ડાઉનલોડ થઈ જાય છે, જેનાથી ફોનના SMS અને સ્ક્રીનનો કંટ્રોલ હેકર્સના હાથમાં જતો રહે છે. રાત્રે લોકો ઊંઘતા હોય ત્યારે OTP મેળવીને ખાતું સાફ કરી નાખવામાં આવે છે.
આમ, ટ્રાફિક ઈ-ચલણ ભરતી વખતે થોડી અસાવધાની ભારે આર્થિક નુકસાન કરાવી શકે છે. સાયબર એક્સપર્ટ્સની સલાહ મુજબ, ક્યારેય પણ અજાણી લિંક પર ક્લિક ન કરવું જોઈએ અને ઈ-ચલણ હંમેશાં માત્ર અધિકૃત વેબસાઇટ પર જઈને જ ચેક કે પેમેન્ટ કરવું જોઈએ.
