રાજસ્થાનની શાળાઓમાં બહારના લોકો માટે પ્રવેશબંધીનું ફરમાન જારી

સરકારે પાણી પહેલાં પાળ બાંધી, રાતોરાત અનેક પ્રકારના પ્રતિબંધો લાગુ

સરકારી શાળાઓની દયનીય હાલત અને મૂળભૂત સુવિધાઓના અભાવ અંગે કોકરોચ જનતા પાર્ટી (CJP) દ્વારા રાજ્યવ્યાપી નિરીક્ષણ અભિયાનની જાહેરાત થતાં જ રાજસ્થાન સરકારે તાત્કાલિક અસરથી સરકારી શાળાઓમાં બહારના લોકોના પ્રવેશ પર નિયંત્રણો લાદી દીધા છે. નવા આદેશ મુજબ પ્રિન્સિપાલ અથવા સંસ્થાના વડાની પૂર્વ મંજૂરી વિના કોઈપણ બહારની વ્યક્તિને શાળા પરિસરમાં પ્રવેશ આપવામાં આવશે નહીં. શેડોમાં માત્ર અધિકૃત સરકારી કામગીરી માટે આવતા સરકારી અધિકારીઓને જ છૂટ મળશે.

તાજેતરમાં શિક્ષકોની અછત, જર્જરિત ઇમારતો અને અન્ય સુવિધાઓના અભાવને લઈને રાજ્યની અનેક સરકારી શાળાઓમાં વિરોધ પ્રદર્શન થયા હતા. આ સંબંધિત વિડિયો અને અહેવાલો સોશિયલ મીડિયા પર પણ વ્યાપક રીતે વાયરલ થયા હતા. એ દરમિયાન CJPના સહ-સંયોજક આશુતોષ રાંકાએ જયપુર, અજમેર, જોધપુર, ઉદયપુર, ધોલપુર, ભરતપુર, કોટા, બાડમેર અને હનુમાનગઢ સહિતના જિલ્લાઓમાં શાળાઓનું નિરીક્ષણ કરવાની જાહેરાત કરી હતી.

તેના થોડા જ કલાકોમાં માધ્યમિક શિક્ષણ નિયામક લલિત કુમારે પરિપત્ર જાહેર કરીને બાળકોની સુરક્ષા, ગોપનીયતા અને ગૌરવ જાળવવાનું કારણ આપ્યું હતું. આદેશમાં બંધારણની કલમ-21 હેઠળના ગોપનીયતાના અધિકાર, સુપ્રીમ કોર્ટના ચુકાદા તથા બાળ અધિકાર સુરક્ષા આયોગની માર્ગદર્શિકાઓનો પણ ઉલ્લેખ કરવામાં આવ્યો છે.

આ પણ વાંચો: ગુજરાત પોલીસે શરૂ કર્યું 28 દિવસનું વ્યાપક ‘સુરક્ષિત શક્તિ’ અભિયાન

નવા નિયમો અનુસાર તમામ મુલાકાતીઓએ વિઝિટર રજિસ્ટરમાં નોંધ કરાવવી ફરજિયાત રહેશે. પ્રિન્સિપાલ, શિક્ષક અથવા અધિકૃત કર્મચારીની હાજરી વિના કોઈપણ વ્યક્તિ વર્ગખંડ, પ્રયોગશાળા, પુસ્તકાલય, છાત્રાલય, રમતગમત મેદાન કે વિદ્યાર્થીઓની પ્રવૃત્તિઓ ચાલી રહી હોય તેવા વિસ્તારોમાં જઈ શકશે નહીં. શાળાના વડાને શાળાની સુરક્ષા, શિસ્ત અથવા ગોપનીયતાને અસર થતી હોય તો કોઈપણ મુલાકાતીને પ્રવેશ નકારવાનો અધિકાર પણ આપવામાં આવ્યો છે. અનધિકૃત પ્રવેશ, શાળાકાર્યમાં વિક્ષેપ અથવા નિયમોના ભંગની સ્થિતિમાં પોલીસ કાર્યવાહી પણ થઈ શકશે.

ફોટોગ્રાફી, વિડિયોગ્રાફી, ઇન્ટરવ્યુ પર પણ પાબંદી

નવી માર્ગદર્શિકા હેઠળ વિદ્યાર્થીઓ, શિક્ષકો અથવા શાળાની પ્રવૃત્તિઓ સાથે સંબંધિત ફોટોગ્રાફી, વિડિયોગ્રાફી, ઓડિયો રેકોર્ડિંગ, ઇન્ટરવ્યુ તેમજ લાઇવ સ્ટ્રીમિંગ પર પણ નિયંત્રણ મૂકવામાં આવ્યું છે. આવા કોઈપણ કાર્ય માટે પ્રિન્સિપાલની પૂર્વ લેખિત મંજૂરી લેવી ફરજિયાત રહેશે અને તે પણ માત્ર કાયદેસર હેતુ માટે જ માન્ય ગણાશે. ઉપરાંત, માતા-પિતા અથવા વાલીની સંમતિ વિના વિદ્યાર્થીઓના ફોટા, વિડિયો અથવા વ્યક્તિગત માહિતી એકત્રિત, પ્રકાશિત કે શેર ન થાય તેની ખાસ તકેદારી રાખવા શાળાઓને સૂચના આપવામાં આવી છે.

કોંગ્રેસ દ્વારા ફતવાનો વિરોધ

વિપક્ષના નેતા ટિકા રામ જુલીએ સરકારના આ નિર્ણયની કડક ટીકા કરી છે. ભાજપ સરકારે તૂટેલી છતો, વરસાદમાં ટપકતા વર્ગખંડો અને શિક્ષકોની ગંભીર અછત જેવી સમસ્યાઓ દૂર કરવાને બદલે તેને લોકોની નજરથી છુપાવવાનો રસ્તો અપનાવ્યો હોવાનો અક્ષરો કરી તેમણે આ આદેશને લોકશાહી વિરોધી ગણાવી તેને પાછો ખેંચવાની માંગ કરી છે. તેમણે જો સરકાર આ નિર્ણય રદ નહીં કરે તો કોંગ્રેસ રાજ્યભરમાં નાગરિક અવજ્ઞા આંદોલન શરૂ કરવાની અને આ પ્રતિબંધોનો જોરદાર વિરોધ કરવાની ચેતવણી આપી હતી.