રાજ્યસભામાં એન્ટિ પેપર લીક બિલ પર ચર્ચા થાય તે પહેલા વિપક્ષનું વૉકઆઉટ, સત્તાપક્ષનો વળતો પ્રહાર
સંસદ એટલે કે લોકશાહીનું પવિત્ર મંદિર, જ્યાં જનહિતના કાયદાઓ પર મંથન થવું જોઈએ, પરંતુ ઘણીવાર રાજકીય વિવાદો અને હંગામા વચ્ચે અસલી મુદ્દાઓ પાછળ રહી જતા હોય છે. સંસદના ચોમાસુ સત્ર દરમિયાન આજે સંસદ ભવનમાં ભારે રાજકીય ગરમાવો જોવા મળ્યો છે. લોકસભામાં ગઈકાલના હોબાળા બાદ આજે રાજ્યસભામાં ‘એન્ટિ પેપર લીક બિલ’ રજૂ થવાનું હતું, પરંતુ તે પહેલા જ વિપક્ષના જોરદાર વિરોધ અને વૉકઆઉટના કારણે સંસદીય કાર્યવાહી રોચક વળાંક પર આવી ગઈ છે.
સંસદ સત્રની મુખ્ય ઘટનાઓ
રાજ્યસભામાં વૉકઆઉટ: એન્ટિ પેપર લીક બિલ પર ચર્ચા શરૂ થાય તે પૂર્વે જ કોંગ્રેસ સહિતના વિપક્ષી દળોએ ગૃહમાંથી વૉકઆઉટ કર્યું હતું.
ગૃહમંત્રીની હાજરીની માંગ: દિલ્હીમાં વિદ્યાર્થીઓ પર થયેલા લાઠીચાર્જ અને પેલેટ ગનના ઉપયોગ મુદ્દે કેન્દ્રીય ગૃહમંત્રી અમિત શાહ ગૃહમાં આવે અને જવાબ આપે તેવી ઉગ્ર માંગ સાથે વિપક્ષે “અમિત શાહ ગૃહમાં આવો…” ના નારા લગાવ્યા હતા.
આ પણ વાંચો: અનુભવી બેટ્સમેન અજિંક્ય રહાણેએ આંતરરાષ્ટ્રીય ક્રિકેટમાંથી લીધી નિવૃત્તિ
સત્તાપક્ષનો પલટવાર: વિપક્ષના આ વલણની આકરી ટીકા કરતા ભાજપના રાષ્ટ્રીય અધ્યક્ષ જે.પી. નડ્ડાએ જણાવ્યું હતું કે, વિપક્ષ દરેક ચર્ચામાં હારી રહ્યો છે તેથી તેઓ માત્ર વિરોધ પૂરતો જ રસ ધરાવે છે.
લોકસભાની કાર્યવાહી સ્થગિત: લોકસભામાં પણ કાર્યવાહી શરૂ થતાં જ વિપક્ષના ભારે હોબાળાને કારણે સ્પીકર ઓમ બિરલાએ ગૃહની કાર્યવાહી બપોરે ૨ વાગ્યા સુધી સ્થગિત કરી દીધી હતી. જો કે, તે પહેલા અધ્યક્ષે રાષ્ટ્રમંડળ રમતોમાં પદક જીતનારા ખેલાડીઓને અભિનંદન પાઠવ્યા હતા.
‘એન્ટિ પેપર લીક બિલ’ પર નજર
લોકસભામાં મંજૂરી: એક દિવસ અગાઉ જ લોકસભામાં ધ્વનિમતથી આ મહત્વપૂર્ણ ‘એન્ટી પેપર લીક બિલ’ પસાર થઈ ચૂક્યું છે.
રજૂઆત: PMO રાજ્યમંત્રી ડૉ. જિતેન્દ્ર સિંહ દ્વારા લોકસભામાં આ બિલ રજૂ કરાયું હતું, અને લાંબી ચર્ચા બાદ તેને મંજૂરી મળી હતી.
રાજ્યસભામાં ચર્ચા: આજે રાજ્યસભામાં પણ આ બિલ રજૂ થનાર છે અને બપોરે ૨ વાગ્યાથી તેના પર વિસ્તૃત ચર્ચા હાથ ધરવામાં આવશે.
