ન્યૂયોર્કથી લંડન અને યુરોપમાં ભારતીય દૂતાવાસો સામે જોરદાર વિરોધ પ્રદર્શન
વાંગચૂકને સમર્થન, ધર્મેન્દ્ર પ્રધાનના રાજીનામાની માંગ
નવી દિલ્હી: નીટ (NEET) પરીક્ષામાં કથિત ગેરરીતિઓ, પેપર લીક અને વિરોધ પ્રદર્શન દરમિયાન પોલીસ કાર્યવાહીનો મુદ્દો હવે ભારતની સરહદો પાર કરીને વૈશ્વિક સ્તરે પહોંચ્યો છે. સામાજિક કાર્યકર સોનમ વાંગચૂકના સમર્થનમાં અમેરિકા અને યુરોપના અનેક શહેરોમાં ભારતીય મૂળના લોકો અને માનવાધિકાર કાર્યકરોએ વિરોધ પ્રદર્શન યોજી કેન્દ્ર સરકાર પાસેથી પારદર્શિતા, જવાબદારી અને શિક્ષણમંત્રી ધર્મેન્દ્ર પ્રધાનના રાજીનામાની માંગ ઉઠાવી છે.
અમેરિકાની માનવાધિકાર સંસ્થા હિન્દુઝ ફોર હ્યુમન રાઇટ્સના આહ્વાન પર ન્યૂયોર્કના યુનિયન સ્ક્વેર ખાતે આવેલી મહાત્મા ગાંધીની પ્રતિમા પાસે તેમજ સાન જોસમાં મોટી સંખ્યામાં લોકો એકત્ર થયા હતા. પ્રદર્શનકારીઓએ સોનમ વાંગચૂકના સમર્થનમાં પ્લેકાર્ડ્સ પ્રદર્શિત કર્યા, નીટ કૌભાંડની નિષ્પક્ષ તપાસની માંગ કરી અને શિક્ષણમંત્રી ધર્મેન્દ્ર પ્રધાનના રાજીનામાની માંગ સાથે સૂત્રોચ્ચાર કર્યા.આ વિરોધની લહેર યુરોપ સુધી પહોંચી હતી. લંડનમાં ભારતીય હાઈ કમિશન અને ડબલિનમાં ભારતીય દૂતાવાસ બહાર પણ વિરોધ પ્રદર્શન યોજાયા. પ્રદર્શનકારીઓએ જણાવ્યું કે ભારતના વિદ્યાર્થીઓને ન્યાય, પારદર્શિતા અને વિશ્વાસપાત્ર ભવિષ્ય મળવું જોઈએ. તેમણે સરકારને વિદ્યાર્થીઓ સાથે સંવાદ શરૂ કરીને શિક્ષણ વ્યવસ્થામાં સુધારા અને જવાબદારી નક્કી કરવાની અપીલ કરી.
આ પણ વાંચો: સરકાર સામે ઇન્ડિયા બ્લોક એકજૂટ થયો, રસ્તા અલગ-અલગ, પરંતુ નિશાન એક જ
દેશની અંદર વિરોધ પક્ષોએઆંદોલનને સમર્થન આપીને કેન્દ્ર સરકાર પર દબાણ વધાર્યું છે ત્યારે નીટ વિવાદમાં પારદર્શિતા, જવાબદારી અને પરીક્ષા વ્યવસ્થામાં સુધારાની માંગ હવે ભારત ઉપરાંત વિદેશમાં વસતા ભારતીયો વચ્ચે પણ ગુંજી રહી છે.
લંડનમાં રાષ્ટ્રગીત અને ‘વંદે માતરમ્’ સાથે વિરોધ
લંડનમાં ભારતીય હાઈ કમિશન બહાર યોજાયેલા વિરોધ પ્રદર્શનમાં સેંકડો લોકો જોડાયા હતા. પ્રદર્શન દરમિયાન ઉપસ્થિતોએ ‘જન ગણ મન’ રાષ્ટ્રગીત તેમજ વંદે માતરમ્નું સામૂહિક ગાન કરીને વિરોધ નોંધાવ્યો હતો. ત્યારબાદ તેમણે સોનમ વાંગચૂકના સમર્થનમાં સૂત્રોચ્ચાર કર્યા અને નીટ પેપર લીક પ્રકરણમાં પારદર્શક તપાસ તથા શિક્ષણમંત્રી ધર્મેન્દ્ર પ્રધાનના રાજીનામાની માંગ દોહરાવી હતી. આયોજકોના જણાવ્યા મુજબ આ કાર્યક્રમનો હેતુ વિશ્વભરના ભારતીય સમુદાય તરફથી વિદ્યાર્થીઓ સાથે એકતા વ્યક્ત કરવાનો હતો.
