રઘુરામ રાજનના અમેરિકામાં ડંકા: સરકારે ફુગાવો કાબૂમાં રાખવાની જવાબદારી સોંપી

આર્થિક સ્થિરતા અને સુધારાઓ અંગે માર્ગદર્શન આપશે

વોશિંગ્ટન: અમેરિકાની ફેડરલ રિઝર્વે ઊંચા ફુગાવા પછી દેશની નાણાકીય નીતિમાં વ્યાપક સુધારાઓ શરૂ કર્યા છે. આ માટે નવી રચાયેલી પાંચ ટાસ્ક ફોર્સમાં ભારતના ભૂતપૂર્વ રિઝર્વ બેન્ક ગવર્નર રઘુરામ રાજન સહિત ભારતીય મૂળના ત્રણ નિષ્ણાતોની પસંદગી કરવામાં આવી છે. રાજનને ખાસ કરીને ફેડની બેલેન્સ શીટ પોલિસી ટાસ્ક ફોર્સમાં સ્થાન અપાયું છે, જે ફેડની સંપત્તિ, બોન્ડ હોલ્ડિંગ્સ, નાણાકીય નીતિમાં તેની ભૂમિકા તેમજ તેના લાંબા ગાળાના આર્થિક પ્રભાવની સમીક્ષા કરીને સુધારાઓ માટે ભલામણ કરશે.

નવા ફેડ ચેરમેન કેવિન વોર્શે જણાવ્યું કે છેલ્લા પાંચ વર્ષથી ફુગાવો નિર્ધારિત લક્ષ્યથી ઉપર રહ્યો હોવાથી હવે નાણાકીય નીતિને વધુ અસરકારક અને પારદર્શક બનાવવાનો સમય આવી ગયો છે. આ માટે વિવિધ ક્ષેત્રોના શ્રેષ્ઠ મગજોને સાથે જોડવામાં આવ્યા છે, જેથી ફેડ ભવિષ્યમાં વધુ સચોટ અને સમયસર નિર્ણયો લઈ શકે.

રાજન સાથે આ ટાસ્ક ફોર્સમાં હાર્વર્ડ યુનિવર્સિટીના અર્થશાસ્ત્રી કેરેન ડાયનન અને ફેડના પૂર્વ ગવર્નર જેરેમી સ્ટાઇન પણ જોડાયા છે. પેનલ ફેડની હાલની બેલેન્સ શીટ વ્યવસ્થાના ખર્ચ, લાભ અને સંસ્થાકીય અસરનું મૂલ્યાંકન કરીને ભવિષ્ય માટે નવી દિશા સૂચવશે.

રઘુરામ રાજન વર્ષ 2013થી 2016 દરમિયાન આરબીઆઈના ગવર્નર રહ્યા હતા. તે પહેલાં તેઓ આંતરરાષ્ટ્રીય નાણાં ભંડોળ (IMF)માં મુખ્ય અર્થશાસ્ત્રી અને સંશોધન વિભાગના વડા રહી ચૂક્યા છે. વૈશ્વિક નાણાકીય સ્થિરતા અને મોનેટરી પોલિસી અંગે તેમના અભિપ્રાયોને આંતરરાષ્ટ્રીય સ્તરે ખાસ મહત્વ આપવામાં આવે છે.

આ પણ વાંચો: ગતિમાપક યંત્ર ગોઠવી રહેલા ટ્રાફિક પોલીસનું જ બેફામ કાર અડફેટે મોત

ફેડે બનાવેલા અલગ અલગ ટાસ્ક ફોર્સમાં બ્રિટનના ભૂતપૂર્વ બેન્ક ઓફ ઇંગ્લેન્ડ ગવર્નર મર્વિન કિંગ, નોબેલ વિજેતા થોમસ સાર્જન્ટ, વોલમાર્ટના ભૂતપૂર્વ સીઇઓ ડગ મેકમિલન અને વેન્ચર કેપિટલિસ્ટ માર્ક એન્ડ્રીસન સહિતના દિગ્ગજો પણ સામેલ છે.

કોણ છે બીજા બે ભારતીયો?

રાજ ચેટ્ટી:

દિલ્હીમાં જન્મેલા અને હાલ હાર્વર્ડ યુનિવર્સિટીમાં અર્થશાસ્ત્રી તરીકે કાર્યરત રાજ ચેટ્ટીને ફેડની ડેટા ટાસ્ક ફોર્સમાં સામેલ કરવામાં આવ્યા છે. તેઓ રિયલ-ટાઇમ આર્થિક ડેટા, રોજગાર, અસમાનતા અને આર્થિક ગતિશીલતા અંગેના સંશોધન માટે વિશ્વભરમાં જાણીતા છે.

આશા શર્મા:

ભારતીય મૂળની અમેરિકન ટેક એક્ઝિક્યુટિવ આશા શર્મા હાલમાં માઇક્રોસોફ્ટમાં એક્ઝિક્યુટિવ વાઇસ પ્રેસિડેન્ટ છે અને એક્સબોક્સના સીઇઓ તરીકે કામગીરી સંભાળી રહ્યા છે. તેમને પ્રોડક્ટિવિટી એન્ડ જોબ્સ ટાસ્ક ફોર્સમાં સ્થાન મળ્યું છે, જ્યાં કૃત્રિમ બુદ્ધિમત્તા (AI) જેવી નવી ટેક્નોલોજીનો રોજગાર, ઉત્પાદકતા અને આર્થિક વૃદ્ધિ પર પડતા પ્રભાવનો અભ્યાસ કરવામાં આવશે.