લાયન સફારી પાર્ક ૩૧ જૂલાઈએ તૈયાર નહીં થાય: હવે વધુ છ મહિના લાગશે!

પ્રોજેક્ટમાં આઠ કરોડનો `જાદૂઈ’ વધારો થઈ જતાં સ્ટેન્ડિંગ કમિટી મંજૂરી ન આપે ત્યાં સુધી કામ ધીમું જ ચાલશે

પ્રોજેક્ટ પૂર્ણ થવાની મુદ્દત ૩૧ જૂલાઈ હતી જેમાં હવે એજન્સીને છ મહિનાનો વધારો અપાશે: આવતાં જ વર્ષે જ પાર્ક તૈયાર થવાની સંભાવના

મહાપાલિકા દ્વારા કોઈ પ્રોજેક્ટની જાહેરાત કરવામાં આવે તે અને તે સમયસર પૂર્ણ થાય તેવું અત્યાર સુધી ક્યારેય બન્યું નથી અને ભવિષ્યમાં પણ કદાચ બનવાનું પણ નથી. આવું જ કંઈક રાજકોટના `ડ્રિમ પ્રોજેક્ટ’ લાયન સફારી પાર્કને લઈને થયું છે. આ પાર્ક ૩૧ જૂલાઈ સુધીમાં તૈયાર કરી દેવાની સમયમર્યાદા હતી પરંતુ હવે ત્યાં સુધીમાં પાર્ક તૈયાર થશે નહીં અને વધુ છ મહિના જેટલો સમય લાગી જશે તેવી ધારણા અધિકારીઓ વ્યક્ત કરી રહ્યા છે !

અગાઉ ૨૦,૦૦૦ ચોરસફૂટ જગ્યામાં એન્ટ્રન્સ પ્લાઝા જેમાં ફૂડ કોર્ટ, ગજેબો, એન્ટ્રી ગેઈટ, ટિકિટિંગ કાઉન્ટર સહિતની સુવિધા ઉભી કરવાની હતી. જો કે અધિકારીઓ દ્વારા જ્યારે ડિ-માર્કેશન કરવામાં આવ્યું ત્યારે આ જગ્યા ૨૦,૦૦૦ નહીં પરંતુ ૩૦,૦૦૦ ચોરસફૂટ નીકળતા હવે સંપૂર્ણ જગ્યા ઉપર તમામ પ્રકારની સુવિધા વધારવાનો નિર્ણય લેવામાં આવ્યો છે. અહીં ફૂડકોર્ટ નવી બનાવવામાં આવશે ઉપરાંત ટોયલેટ બ્લોક્સ, ગજેબો સહિતની સંખ્યા વધારી દેવામાં આવશે સાથે સાથે સાતેક પ્રકારની વધારાની સુવિધા પણ આપવામાં આવશે.

આ પણ વાંચો: સોનમ વાંગચુકના ઉપવાસથી સત્તાધીશો અસ્વસ્થ થયા છે ખરા?

આ પ્રોજેક્ટ હાથ પર લેવાયો ત્યારે તેનો ખર્ચ ૩૫ કરોડ અંદાજવામાં આવ્યો હતો જે હવે વધીને ૪૩ કરોડ સુધી પહોંચી જતા વધારાના આઠ કરોડના ખર્ચ માટે સ્ટેન્ડિંગ કમિટીની મંજૂરી જરૂરી હોય હજુ સુધી કમિશનર દ્વારા દરખાસ્ત રવાના કરવામાં આવી નથી. આ દરખાસ્ત રવાના થયા બાદ કમિટી દ્વારા આ ખર્ચને મંજૂરી આપવી કે નહીં તેનો નિર્ણય લેવામાં આવશે. જો કમિટી દરખાસ્ત મંજૂર કરશે તો જ કામમાં ઝડપ આવશે અને જો નામંજૂર કરશે તો કામ અટકી જવાની અથવા તો સાવ ધીમું પડી જવાની શક્યતા રહેલી છે.

આઠેક કરોડ જેવી માતબર રકમનો ખર્ચ વધી ગયો હોવાને કારણે એજન્સી દ્વારા પણ હાલ પોતે ખર્ચ કરવાનું જોખમ ઉઠાવવા માંગતી નથી. હવે મહાપાલિકા દ્વારા એજન્સીને છ મહિનાનો મુદત વધારો આપવામાં આવનાર છે ત્યારે પાર્ક આવતાં વર્ષે તૈયાર થશે તેમ કહી શકાય.