પોરબંદરના કુછડી ખાતે મરીન શીપ બિલ્ડીંગ પાર્કની યોજના: ટૂંક સમયમાં સરકાર નીતિ જાહેર કરશે
અમદાવાદના સાણંદમાં સેમી કંડકટર ચીપ બનાવવાની શરૂઆત થયા બાદ હવે ગુજરાતમાં શીપ બનાવવાની શરૂઆત પણ થશે. ગુજરાતમાં અલંગ શીપ બ્રેકીંગ હબ તરીકે જાણીતુ તો છે જ પણ ભવિષ્યમાં પોરબંદર પાસેનું કુછડી ગામ શીપ બિલ્ડીંગ હબ તરીકે ખ્યાતી પામે તેવા સંજોગોનું નિર્માણ થયું છે.
સુત્રોના જણાવ્યા અનુસાર, કુછડી ખાતે સરકાર મરીન શીપ બિલ્ડીંગ પાર્ક બનાવવાની યોજના ઉપર કામ કરી રહી અને અને ત્યાં કોમર્શિયલ જહાજનું નિર્માણ કરવામાં આવશે. સરકાર હાલમાં શિપબિલ્ડિંગ અને રિપેર નીતિ, 2026, ઉપર કામ કરી રહી છે અને તે અંતિમ તબક્કામાં છે. આ સુત્રોએ એમ પણ કહ્યું હતું કે, સ્થાનિક અને વૈશ્વિક રોકાણકારોને આકર્ષવા માટે ટૂંક સમયમાં તેની જાહેરાત થવાની અપેક્ષા છે.
આ પણ વાંચો: લાયન સફારી પાર્ક ૩૧ જૂલાઈએ તૈયાર નહીં થાય: હવે વધુ છ મહિના લાગશે!
અધિકારીઓ કહે છે કે દેશનો સૌથી લાંબો દરિયાકિનારો ધરાવતું ગુજરાત શિપબિલ્ડિંગ ઇકોસિસ્ટમ બનાવવા માટે સારી સ્થિતિમાં છે. હાલમાં તમિલનાડુમાં આ પ્રકારે શીપ બિલ્ડીંગ થાય છે અને ગુજરાત દેશનું બીજું આવું રાજ્ય બનશે.
રાજ્ય સરકાર જે નીતિ તૈયાર કરી રહી છે તેમાં વિવિધ પ્રોત્સાહનો ઉપરાંત વીજળી અને પાણી માટે સબસિડી, માળખાગત સુવિધા, શિપયાર્ડ્સ અને દરિયાઈ સાધનોના ક્લસ્ટરો માટે મૂડી સહાય, સંશોધન અને વિકાસ, કાર્યબળ તાલીમ અને કૌશલ્ય વિકાસ માટે સમર્થન જેવી બાબતોને આવરી લેવામાં આવી છે.
