ફિફા વર્લ્ડકપ નો બીજો સેમિફાઇનલ
એક બાજુ મેસ્સી તો બીજી બાજુ બેલિંગઘમ-કેન: ૨૦૦૨માં થયેલી ટક્કરમાં ઈંગ્લેન્ડ ભારે પડ્યું’તું
બુધવારે રાત્રે ૧૨:૩૦ વાગ્યાથી ટક્કર: ઈંગ્લેન્ડ ૬૦ વર્ષથી વર્લ્ડકપ નથી જીત્યું
આર્જેન્ટીના-ઈંગ્લેન્ડની વચ્ચે ૧૬ જૂલાઈએ જ્યોર્જિયાના એટલાન્ટા સ્ટેડિયમ પર ફિફા વર્લ્ડકપ-૨૦૨૬નો બીજો સેમિફાઈનલ મુકાબલો થશે. એક બાજુ ડિફેન્ડિંગ ચેમ્પિયન આર્જેન્ટીના છે તો બીજી બાજુ ઈંગ્લેન્ડ છે જે ૬૦ વર્ષના દુકાળનો અંત લાવી બીજી વખત વર્લ્ડકપ જીતવાનું સ્વપ્ન સેવી રહ્યું છે.
આ મેચમાં વિશ્વ આખાની નજર આર્જેન્ટીનાના કેપ્ટન લિયોનેલ મેસ્સી અને ઈંગ્લેન્ડના સ્ટાર જૂડ બેલિંગઘમ પર ટકેલી રહેશે. આર્જેન્ટીનાએ ક્વાર્ટર ફાઈનલમાં સ્વિત્ઝરલેન્ડને ૩-૧થી હરાવી સેમિફાઈનલમાં જગ્યા બનાવી હતી. જ્યારે ઈંગ્લેન્ડે નોર્વેને ૨-૧થી હરાવી સેમિફાઈનલમાં એન્ટ્રી કરી હતી. બન્ને ટીમ શાનદાર ફોર્મમાં છે.
મેસ્સી આર્જેન્ટીનાનો સૌથી મોટો મેચવિનર છે. તેણે આ વર્લ્ડકપમાં આઠ ગોલ કર્યા છે અને તે ફ્રાન્સના કીલિયન એમ્બાપ્પે સાથે ગોલ્ડન બૂટની રેસમાં સામેલ છે. બીજી બાજુ ઈંગ્લેન્ડનો યુવા ખેલાડી જૂડ બેલિંગઘમ મીડફિલ્ડમાં ટીમની કરોડરજ્જુ છે. તેની બોક્સ ટુ બોક્સ ક્ષમતા, બોલ પર નિયંત્રણ અને નિર્ણાયક સમયે ગોલ કરવાની કળા ઈંગ્લેન્ડને અત્યંત ખતરનાક બનાવે છે. આ વર્લ્ડકપમાં તેણે ઈંગ્લેન્ડ માટે છ ગોલ કર્યા છે. હૈરી કેન સાથે તેની ભાગીદારી હરિફ આર્જેન્ટીના માટે પડકાર બની જશે.
છેલ્લે ૨૦૦૨માં ફિફા વર્લ્ડકપના ગ્રુપ રાઉન્ડમાં આર્જેન્ટીના-ઈંગ્લેન્ડ વચ્ચે ટક્કર થઈ હતી જેમાં ઈંગ્લેન્ડ ૧-૦થી જીત્યું હતું. વર્લ્ડકપમાં અત્યાર સુધી બન્ને વચ્ચે ૧૪ મેચ રમાઈ છે જેમાં ઈંગ્લેન્ડ છ, આર્જેન્ટીના ત્રણ વખત જીત્યું છે તો પાંચ મેચ ડ્રો રહેવા પામી છે.
