ઈરાનના હુમલામાં અમેરિકી પેટ્રિયોટ સિસ્ટમ અને ડ્રોનના કાફલાનો ખાત્મો

જોર્ડન, કતાર, કુવૈત, બહેરીન અને ઓમાનના યુએસ બેઝ પર  ઈરાનના મિસાઇલ-ડ્રોન હુમલા

અમેરિકાએ હોર્મુઝ નજીક ઈરાનના મિસાઇલ, એર ડિફેન્સ અને આઈઆરજીસીના ઠેકાણાઓ પર કરેલા નવા હુમલાના કલાકોમાં જ ઈરાને ખાડીના વિવિધ દેશોમાં આવેલા અમેરિકી લશ્કરી મથકો પર સંકલિત મિસાઇલ અને ડ્રોન હુમલાઓ કર્યા હતા. ઈરાને પેટ્રિયોટ એર ડિફેન્સ સિસ્ટમ, ડ્રોન ઇન્ફ્રાસ્ટ્રક્ચર, દારૂગોળાના ભંડારો અને રડાર સ્ટેશનનો નાશ કર્યો હોવાનો દાવો કર્યો છે.જો કે  અમેરિકા આ દાવાઓની સ્વતંત્ર પુષ્ટિ કરતું નથી. તાજા હુમલાઓથી સમગ્ર ખાડી પ્રદેશમાં યુદ્ધ વધુ વ્યાપી ગયું છે અને હોર્મુઝ જળમાર્ગ અંગેનું સંકટ વધુ ઘેરું બન્યું છે.

મધ્ય પૂર્વમાં ફરી યુદ્ધ શરૂ થઈ ગયું છે. અમેરિકાની સતત સૈન્ય કાર્યવાહીના જવાબમાં કુવૈત, બહેરીન, કતાર, ઓમાન અને જોર્ડનમાં આવેલા અમેરિકી મથકો પર મિસાઇલ અને ડ્રોનથી હુમલા કરવામાં આવ્યા હોવાનું ઈરાનની ઇસ્લામિક રેવોલ્યુશનરી ગાર્ડ કોર્પ્સ (IRGC)એ જણાવ્યું હતું. કુવૈતમાં પેટ્રિયોટ મિસાઇલ સિસ્ટમ, રડાર સ્ટેશન અને દારૂગોળાના ભંડારોને નિશાન બનાવવામાં આવ્યા હોવાનો પણ ઈરાને દાવો કર્યો છે. બીઓમાનના ડુકમ બંદરે અમેરિકી વિમાનવાહક જહાજોને સહાય કરતી સુવિધાઓ પર ભારે હુમલો કરાયો હોવાનો ઈરાનનો દાવો છે. બહેરીનના શેખ ઈસા એર બેઝના સંચાર તંત્ર અને રડાર સુવિધાઓને પણ નિશાન બનાવવામાં આવી હોવાનું જણાવાયું છે.

આ પણ વાંચો: ગયા વર્ષની ઘટના બાદ 18 હાથીઓ માટે પોલીસની નવી ‘સ્માર્ટ સિક્યુરિટી’ સિસ્ટમ અમલમાં મુકાશે

ઈરાની હુમલામાં કતારના અલ ઉદૈદ એર બેઝ પર બેલિસ્ટિક મિસાઇલ હુમલામાં ફાઇટર જેટના મેન્ટેનન્સ સેન્ટર અને કમાન્ડ એન્ડ કંટ્રોલ સુવિધાને નુકસાન પહોંચ્યું હતું. જોર્ડનના પ્રિન્સ હસન એર બેઝ પર મિસાઇલ અને ડ્રોન હુમલાથી ઇંધણના ટાંકાઓ અને દારૂગોળાના ભંડાર આગમાં લપેટાઈ ગયા હતા.

અમેરિકાના તાજા હુમલાથી ઈરાનના અનેક શહેરો ધણધણ્યા

અમેરિકાએ રવિવારે ઈરાનના એર ડિફેન્સ નેટવર્ક, મિસાઇલ લોન્ચિંગ સુવિધાઓ, કોસ્ટલ રડાર, ડ્રોન બેઝ અને આઈઆરજીસીની સ્પીડ બોટ્સ પર વ્યાપક હુમલા કર્યા હતા  હોર્મુઝ નજીકના અનેક લશ્કરી વિસ્તારો ઉપરાંત બંદર અબ્બાસ અને કેશ્મ ટાપુ નજીક પણ વિસ્ફોટોના અહેવાલ મળ્યા. અમેરિકાનું કહેવું છે કે આ કાર્યવાહીનો હેતુ ઈરાનની દરિયાઈ હુમલા કરવાની ક્ષમતા ઘટાડવાનો હતો. અમેરિકાએ એક ઈરાની ક્રૂઝ મિસાઇલ અને એટેક ડ્રોનને પણ હવામાં જ તોડી પાડ્યાનો દાવો કર્યો.

ઘર્ષણ હવે આખા ખાડી પ્રદેશમાં વિસ્તર્યું

ઈરાનના હુમલાથી હવે યુદ્ધ માત્ર અમેરિકા અને ઈરાન સુધી મર્યાદિત રહ્યું નથી. કતાર, બહેરીન, કુવૈત, ઓમાન અને જોર્ડન સુધી તેની અસર પહોંચી છે. યુએઈએ પોતાના એર ડિફેન્સ દ્વારા મિસાઇલ અને ડ્રોનને અટકાવ્યાનો દાવો કર્યો છે. બહેરીને અનેક હવાઈ હુમલાઓ નિષ્ફળ બનાવ્યાનું જણાવ્યું, જ્યારે જોર્ડને મિસાઇલ હુમલાની પુષ્ટિ કરી હતી. કુવૈતમાં એક ઓઈલ ડ્રિલિંગ પ્લેટફોર્મને નુકસાન થતાં એક કર્મચારી ઘાયલ થયો હતો. કતારમાં પડેલા કાટમાળથી એક બાળક સહિત ત્રણ લોકો ઘાયલ થયા હોવાનું જણાવાયું છે.

હોર્મુઝ સંકટ વધુ ઘેરું બન્યું

તાજા હુમલાઓ બાદ હોર્મુઝ જળમાર્ગ અંગેનું સંકટ વધુ ગંભીર બન્યું છે. ઈરાને તાજેતરમાં રચેલી પર્શિયન ગલ્ફ સ્ટ્રેટ ઓથોરિટીએ અમેરિકી સૈન્યની કાર્યવાહીને કારણે હાલ જળમાર્ગમાંથી સલામત અવરજવર શક્ય નથી એવો દાવો કર્યો છે. જોકે અમેરિકાએ આ દાવો ફગાવીને કહ્યું કે હોર્મુઝ પર ઈરાનનો કબજો નથી અને વેપારી જહાજોની અવરજવર ચાલુ છે. તેમ છતાં વેપારી જહાજો માટે સુરક્ષાનું જોખમ નોંધપાત્ર રીતે વધી ગયું છે અને સમગ્ર વિશ્વની નજર હવે હોર્મુઝ પર કેન્દ્રિત થઈ છે.