અમદાવાદમાં તમામ 13 પોર્ટલ બીમનું લોન્ચિંગ સફળ: 1,640 ટનનો બીમ માત્ર 3 કલાકમાં ગોઠવાયો 

મુંબઈ-અમદાવાદ બુલેટ ટ્રેન પ્રોજેક્ટે વધુ એક ઐતિહાસિક સિદ્ધિ હાંસલ કરી છે. અમદાવાદમાં 18 કિમી લાંબા એલિવેટેડ વાયાડક્ટ માટે જરૂરી તમામ 13 ભારે પોર્ટલ બીમનું લોન્ચિંગ સફળતાપૂર્વક પૂર્ણ થયું છે. સૌથી મોટી વાત એ છે કે સાબરમતી ખાતે ગોઠવાયેલા 1,640 મેટ્રિક ટન વજનના સૌથી ભારે બીમને વ્યસ્ત રેલવે લાઇન ઉપર માત્ર 3 કલાકમાં જ સ્થાપિત કરી દેવામાં આવ્યો. ખાસ વાત એ કે આખી કામગીરી દરમિયાન એક પણ ટ્રેન રદ કે ડાયવર્ટ કરવી પડી ન હતી.

અમદાવાદમાં પૂર્ણ થયું પોર્ટલ બીમનું લોન્ચિંગ 

મુંબઈ-અમદાવાદ બુલેટ ટ્રેન કોરિડોર માટે અમદાવાદ શહેરમાં 18 કિલોમીટર લાંબો એલિવેટેડ વાયાડક્ટ બનાવવામાં આવી રહ્યો છે. આ વાયાડક્ટ હાલની વ્યસ્ત રેલવે લાઇનોની ઉપરથી પસાર થાય છે. તેના માટે ખાસ ડિઝાઇન કરાયેલા 13 ભારે પોર્ટલ બીમ લગાવવાના હતા, જેનું કામ હવે પૂર્ણ થયું છે.

ક્યાં ક્યાં લાગ્યા 13 બીમ? 

રેલવે લાઇનને ક્રોસ કરવા માટે કુલ 13 પોર્ટલ બીમનું આયોજન હતું: 

1. મણિનગર: મુંબઈ-અમદાવાદ મુખ્ય રેલવે લાઇન ઉપર 5 પોર્ટલ બીમ 

2. વટવા: મુંબઈ-અમદાવાદ મુખ્ય રેલવે લાઇન ઉપર 7 પોર્ટલ બીમ 

3. સાબરમતી: અમદાવાદ-દિલ્હી મુખ્ય રેલવે લાઇન ઉપર 1 પોર્ટલ બીમ – આ જ સૌથી છેલ્લો અને સૌથી ભારે બીમ હતો

3 કલાકમાં ગોઠવાયો 1,640 ટનનો ‘દાનવ’ 

સાબરમતી ખાતે લોન્ચ કરાયેલો અંતિમ પોર્ટલ બીમ આ પ્રોજેક્ટનો સૌથી ભારે અને મોટો બીમ છે. 

– વજન: 1,640 મેટ્રિક ટન 

– લંબાઈ: 34.5 મીટર 

– ક્રોસ-સેક્શન: 5.5 મીટર x 4.5 મીટર 

આટલા ભારે બીમને માત્ર 3 કલાકમાં રેલવે લાઇન ઉપર લોન્ચ કરવામાં આવ્યો. આ કામગીરી માટે 2,200 મેટ્રિક ટન ક્ષમતા ધરાવતી વિશાળ ક્રોલર ક્રેનનો ઉપયોગ કરવામાં આવ્યો હતો.

કેવી રીતે થયું આટલું મુશ્કેલ કામ? 

આ કામ સૌથી વધુ પડકારજનક હતું કારણ કે કામની જગ્યા ખૂબ મર્યાદિત હતી અને નીચે ભારતીય રેલવેની વ્યસ્ત ટ્રેનો દોડી રહી હતી. એન્જિનિયરોએ અત્યંત ઝીણવટપૂર્વક આયોજન કર્યું અને ભારતીય રેલવે સાથે નજીકથી સંકલન સાધ્યું. 

પરિણામે કામગીરી દરમિયાન રેલવેની તમામ ટ્રેન સેવાઓ સુરક્ષિત રીતે અને કોઈપણ વિક્ષેપ વિના ચાલુ રહી.

આગળ શું? 

અમદાવાદમાં પોર્ટલ બીમનું કામ પૂર્ણ થવા સાથે જ બુલેટ ટ્રેનના વાયાડક્ટનું બાંધકામ વધુ ઝડપે આગળ વધશે. આ બીમ ભવિષ્યમાં બુલેટ ટ્રેનના ટ્રેકને મજબૂત સપોર્ટ આપશે અને 350 કિમી પ્રતિ કલાકની ઝડપે દોડતી ટ્રેનને સુરક્ષિત રીતે પસાર કરશે. પ્રોજેક્ટ ટીમના જણાવ્યા મુજબ આ સિદ્ધિ બુલેટ ટ્રેનને સમયસર પૂર્ણ કરવાની દિશામાં એક મોટું પગલું છે.