અનેક જિલ્લાઓમાં રેડ એલર્ટ, સૌરાષ્ટ્રમાં ઓરેન્જ, આગામી 5 દિવસ ભારેથી અતિભારે વરસાદની આગાહી

ગુજરાતમાં ચોમાસાએ ફરી વેગ પકડ્યો છે. હવામાન વિભાગની આગાહી મુજબ રાજ્યમાં પાંચ અલગ-અલગ વરસાદી સિસ્ટમ સક્રિય થતા આગામી 5 દિવસ સુધી ધોધમાર વરસાદ પડશે. આજે ખાસ કરીને દક્ષિણ ગુજરાતના 5 જિલ્લા અને 2 સંઘપ્રદેશ માટે અતિભારે વરસાદનું રેડ એલર્ટ જાહેર કરાયું છે. સૌરાષ્ટ્ર અને મધ્ય ગુજરાતના કેટલાક જિલ્લાઓમાં પણ ઓરેન્જ અને યલો એલર્ટ આપવામાં આવ્યા છે. વહીવટી તંત્રને સતર્ક કરી NDRF-SDRFની ટીમોને સ્ટેન્ડબાય રાખવામાં આવી છે.

દક્ષિણ ગુજરાતમાં આકાશી આફતની શક્યતા, 5 જિલ્લામાં રેડ એલર્ટ 

આજે દક્ષિણ ગુજરાતમાં અતિભારેથી અત્યંત ભારે વરસાદ પડવાની સંભાવના છે. હવામાન વિભાગે સુરત, નવસારી, વલસાડ, તાપી અને ડાંગ જિલ્લા માટે રેડ એલર્ટ જાહેર કર્યું છે. આ ઉપરાંત દમણ અને દાદરાનગર હવેલી કેન્દ્રશાસિત પ્રદેશમાં પણ રેડ એલર્ટ આપવામાં આવ્યું છે. ભારે વરસાદથી નીચાણવાળા વિસ્તારોમાં પાણી ભરાવા અને પૂરની સ્થિતિ સર્જાવાની ભીતિ છે. માછીમારોને દરિયો ન ખેડવાની સ્પષ્ટ સૂચના આપવામાં આવી છે.

સૌરાષ્ટ્ર અને મધ્ય ગુજરાતમાં ઓરેન્જ-યલો એલર્ટ 

દક્ષિણ ગુજરાત ઉપરાંત સૌરાષ્ટ્રના ભાગોમાં પણ ભારે વરસાદ પડશે. અમરેલી, ગીર સોમનાથ, ભાવનગર, ભરૂચ અને નર્મદા જિલ્લામાં ઓરેન્જ એલર્ટ જાહેર કરાયું છે. અહીં એક-બે જગ્યાએ ભારેથી અતિભારે વરસાદ પડી શકે છે.

રાજકોટ, જૂનાગઢ, વડોદરા, પંચમહાલ, દાહોદ અને છોટાઉદેપુરમાં છૂટાછવાયા સ્થળોએ ભારે વરસાદ માટે યલો એલર્ટ જાહેર કરાયું છે.

આ પણ વાંચો: ગુજરાતના 207 જળાશયો છલકાયા, સરદાર સરોવર 65% ભરાયું, 6 ડેમ હાઈ એલર્ટ પર

આગામી 5 દિવસ સાર્વત્રિક વરસાદની આગાહી 

હવામાન વિભાગના જણાવ્યા અનુસાર ગુજરાત અને આસપાસના રાજ્યોમાં સક્રિય થયેલી 5 વરસાદી સિસ્ટમને કારણે રાજ્યમાં આગામી પાંચ દિવસ સુધી ભારેથી અતિભારે વરસાદનો દોર ચાલુ રહેશે. દરિયાકાંઠાના વિસ્તારોમાં પવનની ઝડપ પણ વધી શકે છે.

તંત્ર સતર્ક, કંટ્રોલ રૂમ કાર્યરત 

વરસાદની સ્થિતિને ધ્યાનમાં રાખીને સરકારે તમામ જિલ્લા તંત્રને એલર્ટ પર રાખ્યા છે. કોઈપણ કટોકટીનો સામનો કરવા માટે NDRF અને SDRFની ટીમોને તૈનાત રહેવાના આદેશ આપવામાં આવ્યા છે. તમામ જિલ્લાઓમાં 24×7 કંટ્રોલ રૂમ કાર્યરત કરવામાં આવ્યા છે અને નાગરિકોને જરૂર વગર ઘરની બહાર નીકળવાની અપીલ કરવામાં આવી છે.