16 રાજ્યોમાં ધોધમાર વરસાદ અને 80 કિમીની ઝડપે તોફાની પવનનું એલર્ટ

ગરમીથી ત્રસ્ત દેશ પર હવે મેઘરાજા મહેરબાન થવા સાથે કહેર પણ બની શકે છે. હવામાન વિભાગે આજે 3 જુલાઈએ ગુજરાત સહિત 16 રાજ્યોમાં ભારેથી અતિભારે વરસાદ સાથે વાવાઝોડાની ચેતવણી જાહેર કરી છે. કેટલીક જગ્યાએ 80 કિમીની ઝડપે પવન ફૂંકાવાની અને વીજળી પડવાની પણ શક્યતા છે.

લો પ્રેશર સિસ્ટમથી ચોમાસું સક્રિય 

IMDના જણાવ્યા મુજબ ઉત્તર પશ્ચિમ બંગાળની ખાડી અને તેને અડીને આવેલા ઉત્તરી ઓડિશા પશ્ચિમ બંગાળના તટ પર લો પ્રેશર એરિયા સર્જાયું છે. તેની અસરથી આગામી 5 થી 6 દિવસ સુધી દેશના મધ્ય ભાગોમાં ચોમાસું સક્રિય રહેશે. આગામી 2 થી 3 દિવસમાં દક્ષિણ પશ્ચિમ ચોમાસું ઉત્તર અરબી સમુદ્ર, ગુજરાત, મધ્ય પ્રદેશના બાકીના ભાગો, હરિયાણા, પંજાબ અને રાજસ્થાનના કેટલાક વધુ વિસ્તારોમાં આગળ વધવા માટે સ્થિતિ સાનુકૂળ છે.

ક્યાં ક્યાં અતિભારે વરસાદની આગાહી 

2 થી 5 જુલાઈ દરમિયાન દક્ષિણ ગુજરાત અને કોંકણમાં, 2 થી 4 જુલાઈ દરમિયાન સૌરાષ્ટ્ર અને કચ્છમાં, 3 અને 4 જુલાઈએ પશ્ચિમ મધ્ય પ્રદેશ અને ઓડિશામાં તેમજ 3 થી 5 જુલાઈ દરમિયાન મધ્ય મહારાષ્ટ્રમાં કોઈ કોઈ જગ્યાએ અત્યંત ભારે વરસાદની સંભાવના છે.

રાજ્યવાર હવામાનનો ચિતાર

દિલ્હી: આજે હળવાથી ભારે વરસાદ સાથે વાવાઝોડાનું એલર્ટ છે. 70 કિમી પ્રતિ કલાકની ઝડપે તેજ પવન ફૂંકાઈ શકે છે. તાપમાન 30 થી 36 ડિગ્રી વચ્ચે રહેશે.

ઉત્તર પ્રદેશ: મેરઠ, આગ્રા, કાનપુર, બાંદા સહિત અનેક જિલ્લાઓમાં ગાજવીજ સાથે હળવાથી મધ્યમ વરસાદની આગાહી છે. 3 થી 8 જુલાઈ વચ્ચે વરસાદ વધશે અને 5 જુલાઈથી ગતિવિધિ તેજ થશે.

બિહાર: ભોજપુર, પૂર્ણિયા, કટિહાર, કિશનગંજ સહિતના જિલ્લાઓમાં વાવાઝોડા સાથે વરસાદનું એલર્ટ છે. 60 કિમી પ્રતિ કલાકની ઝડપે પવન ફૂંકાવાની શક્યતા છે.

રાજસ્થાન: જયપુર, કોટા, ઉદયપુર, જોધપુર, બિકાનેર સહિતના જિલ્લાઓમાં હળવાથી મધ્યમ વરસાદની સાથે 40 થી 60 કિમીની ઝડપે પવન ફૂંકાશે. પશ્ચિમ રાજસ્થાનમાં ધૂળની ડમરીઓ સાથે વાવાઝોડાની શક્યતા છે. 5 થી 7 જુલાઈ દરમિયાન પશ્ચિમ રાજસ્થાન અને 7 થી 8 જુલાઈએ પૂર્વ રાજસ્થાનમાં ભારે વરસાદનું એલર્ટ છે.

ઉત્તરાખંડ: દેહરાદૂન, નૈનીતાલ, હરિદ્વાર સહિતના જિલ્લાઓમાં આજે હળવાથી મધ્યમ વરસાદ પડશે. 4 થી 8 જુલાઈ વચ્ચે ભારે વરસાદનું એલર્ટ છે અને પહાડી વિસ્તારોમાં ભૂસ્ખલન તથા અચાનક જળભરાવનો ખતરો છે.

હિમાચલ પ્રદેશ: શિમલા, કુલ્લુ, કાંગડા સહિતના જિલ્લાઓમાં હળવાથી મધ્યમ વરસાદની સંભાવના છે. 5 થી 8 જુલાઈ વચ્ચે ભારેથી અતિ ભારે વરસાદથી ભૂસ્ખલન અને ફ્લેશ ફ્લડનો ખતરો વધી શકે છે.

જમ્મુ કાશ્મીર: શ્રીનગર, જમ્મુ, અનંતનાગ સહિતના જિલ્લાઓમાં ગાજવીજ સાથે હળવાથી મધ્યમ વરસાદની આગાહી છે. 40 થી 60 કિમીની ઝડપે પવન ફૂંકાશે. 7 અને 8 જુલાઈએ વરસાદનો રાઉન્ડ ફરી તેજ થશે.

ઝારખંડ: રાંચી, જમશેદપુર, ધનબાદ સહિતના જિલ્લાઓમાં હળવાથી મધ્યમ વરસાદ સાથે ગાજવીજ અને 40 થી 60 કિમીની ઝડપે પવનની શક્યતા છે. 4 થી 8 જુલાઈ વચ્ચે વરસાદની પ્રવૃત્તિ તેજ થશે.

હવામાન વિભાગે ટ્રાવેલ કરનાર લોકોને વેધર અપડેટ ચેક કરીને જ ઘરેથી નીકળવાની સલાહ આપી છે.