ડિજિટલ એરેસ્ટ: CBIના ગુજરાત સહીત 16 રાજ્યોમાં દરોડા
મોટા સાયબર ક્રાઈમ નેટવર્કનો પર્દાફાશ
2 મુખ્ય આરોપીઓની ધરપકડ
80 સ્થળે દરોડામાં ડિજિટલ ઉપકરણો
મોબાઇલ ફોન અને બેંક વ્યવહારોના રેકોર્ડ કબજે લીધા; 200 લોકોને છેતર્યા
સીબીઆઈએ ડિજિટલ ધરપકડની ધમકી આપીને લોકોને છેતરતા એક મોટા સાયબર ક્રાઈમ નેટવર્કનો પર્દાફાશ કર્યો છે. આ કેસમાં, સીબીઆઈએ ગુજરાત સહિત 16 રાજ્યોમાં 80 થી વધુ સ્થળોએ સઘન સર્ચ ઓપરેશન શરૂ કર્યું હતું. તપાસ દરમિયાન, અધિકારીઓએ ડિજિટલ ઉપકરણો, મોબાઇલ ફોન અને બેંક વ્યવહારોના મહત્વપૂર્ણ રેકોર્ડ સહિત અનેક વાંધાજનક સામગ્રી જપ્ત કરી હતી. આ બધાને જપ્ત કરીને ફોરેન્સિક તપાસ માટે મોકલવામાં આવ્યા છે. બે મુખ્ય આરોપીઓની ધરપકડ પણ કરી છે.
અધિકારીઓએ ગુરુવારે જણાવ્યું હતું કે આ સંગઠિત નેટવર્કે 200 થી વધુ કેસોમાં લોકોને છેતરવા માટે સુપ્રીમ કોર્ટની નકલી વેબસાઇટનો આશરો લીધો હતો. તપાસ એજન્સીઓના બોગસ દસ્તાવેજ ઉપલોડ કરીને તે લોકોને દ્રાવિ રૂપિયા લૂટતા હતા.
આ પણ વાંચો: જમ્મુ-કાશ્મીરમાં પોલીસ સ્ટેશનમાં ઘૂસી જવાનોનો પોલીસો પર હુમલો
આ સમગ્ર કાર્યવાહી સુપ્રીમ કોર્ટના રજિસ્ટ્રીમાંથી મળેલી ફરિયાદના આધારે શરૂ કરવામાં આવી હતી, ત્યારબાદ સીબીઆઈએ એફઆઈઆર દાખલ કરી હતી અને કેસની વિગતવાર તપાસ શરૂ કરી હતી. તપાસ એજન્સીએ આવી જ એક નકલી વેબસાઇટનો ખુલાસો કર્યો હતો, જેનું વેબ સરનામું સુપ્રીમ કોર્ટની સત્તાવાર વેબસાઇટ જેવું જ હતું.
આ નેટવર્કને જડમૂળથી ઉખેડી નાખવાના ઉદ્દેશ્ય સાથે, સીબીઆઈએ ઓપરેશન ચક્ર-VI હેઠળ 60 વિશેષ ટીમોની રચના કરી હતી. આ ટીમોએ પંજાબ, ગુજરાત, દિલ્હી, મહારાષ્ટ્ર, હરિયાણા, ઉત્તર પ્રદેશ, મધ્ય પ્રદેશ, રાજસ્થાન, તમિલનાડુ, તેલંગાણા, આંધ્ર પ્રદેશ, આસામ, પશ્ચિમ બંગાળ, મણિપુર, કર્ણાટક અને ઓડિશામાં એકસાથે દરોડા પાડ્યા હતા.
ટોળી શેલ કંપનીઓ બનાવતી અને બોગસ ખાતા ખોલતી હતી
અધિકારીઓ દ્વારા આ ઝુંબેશ દરમિયાન ચેન્નાઈથી બી. નરેશ અને સંજીબ સાહાની કોલકાતાથી ધરપકડ કરવામાં આવી છે. અધિકારીઓના જણાવ્યા અનુસાર, આ બંને શેલ કંપનીઓ બનાવવા અને બોગસ બેંક ખાતા ખોલવા અને ચલાવવામાં સામેલ હતા, જેનો ઉપયોગ ગુનામાંથી કમાયેલા આશરે 2 કરોડ રૂપિયાની ઉચાપત કરવા માટે કરવામાં આવતો હતો. આખી ટોળકી ઘણા સમયથી જ આ કામ કરી રહી હતી. હજુ પણ અનેક લોકોની ધરપકડ થઈ શકે છે.
