મોરબીમાં દારૂની બાતમી આપ્યાની શંકાએ ભત્રીજાને કાકા સહિત ૪ શખસોએ ભડાકે દીધો

ચાર દિવસ પહેલાં જ મજૂરીકામ અર્થે આવેલા સુરેન્દ્રનગરના યુવાનની ઓરડીમાંથી લાશ મળી:

મોરબીના શોભેશ્વર રોડ પર આવેલ મફતીયાપરામાં મજૂરીકામ અર્થે ચાર દિવસ પહેલાં જ આવેલા થાનગઢના યુવાનની ઓરડીમાં ઘૂસી સગા કાકા સહિતના ચાર શખસોએ તિક્ષ્ણ હથિયારના ઘા ઝીંકી ભડાકે દઈ પતાવી દીધાની ઘટના પોલીસ ચોપડે નોંધાતા સનસનાટી મચી જવા પામી છે. જો કે સ્થાનિક પોલીસ અને એલસીબીએ ગણતરીના કલાકોમાં જ હત્યાનો ભેદ ઉકેલી નાખી મુખ્ય આરોપી સહિત બે શખસોની ધરપકડ કરી વિશેષ તપાસ હાથ ધરી છે.

આ ઘટનાની મળતી માહિતી મુજબ મુળ થાનગઢના અને પરિવાર સાથે સુરેન્દ્રનગર રહેતા હનીફ ગફુરભાઈ ભટ્ટી (ઉ.વ.૩૫) મજૂરીકામ અર્થે છેલ્લા ચાર દિવસથી મોરબી રહેવા આવ્યો હતો અને શોભેશ્વર રોડ પર આવેલા મફતીયાપરામાં ઓરડી ભાડે રાખી એકલો રહેતો હતો.

ગઈકાલે રાત્રે હનીફ પોતાની ઓરડીમાં સુતો હતો ત્યારે વાહનમાં ઘાતક હથિયાર અને બંદૂક સાથે ધસી આવેલા ચાર શખસોએ ઓરડીમાં ઘૂસી હનીફ પર તિક્ષ્ણ હથિયારના ઘા ઝીંકી માથું ફાડી નાખી ગોળી ધરબી દઈ પતાવી દીધો હતો. આ ઘટનાની જાણ થતાં બી-ડિવિઝન પીઆઈ જયદીપસિંહ સરવૈયા, એલસીબીના નવનિયુક્ત પીઆઈ એસ.પી. જાડેજા સહિતનો કાફલો ઘટનાસ્થળે દોડી ગયો હતો.

આ પણ વાંચો: રાજકોટમાં 12 કેન્દ્રોમાં વિદ્યાર્થીઓ `સમયસર’ પહોંચ્યા: 375 વિદ્યાર્થી ગેરહાજર

પોલીસ માટે પડકારરૂપ હત્યાનો ભેદ ઉકેલવા રેન્જ આઈજી ચિરાગ કોટડિયા અને મોરબી જિલ્લા પોલીસવડા મુકેશ પટેલની સૂચના અને માર્ગદર્શન હેઠળ સ્થાનિક પોલીસ અને એલસીબીની અલગ-અલગ ટીમો બનાવી હત્યા કરી નાસી છૂટેલા મુખ્ય આરોપી અને મરણ જનાર યુવાનના કાકા ફારૂક અલારખાભાઈ ભટ્ટી અને સમીર જાકીરભાઈ સૈયદની ધરપકડ કરી હત્યામાં વપરાયેલ હથિયારો કબજે કરી નાસી છૂટેલા અન્ય બે આરોપીઓની શોધખોળ શરૂ કરી છે.

પોલીસની તપાસમાં મુખ્ય આરોપી ફાટક ભટ્ટી થાનગઢમાં વિદેશી દારૂનો ધંધો કરતો હોય અને તેનો માલ પકડાય ત્યારે ભત્રીજો હનીફ ગફુર ભટ્ટી પોલીસને બાતમી આપતો હોવાની શંકાએ અવારનવાર માથાકૂટ થતી હતી. તાજેતરમાં ફાટક ભટ્ટટીનો પોલીસ વિદેશી દારૂ કબજે કર્યો હોય જેની માહિતી પણ ભત્રીજાએ આપી હોવાની શંકાએ ફાટક ભટ્ટી, તેના પુત્ર રીયાઝ ફાટક ભટ્ટી, સમીર જાકીરભાઈ સૈયદ અને નાઝીર દિવાન થાનગઢથી કાર લઈ મોરબી પહોંચ્યા હતા અને ઓરડીમાં એકલા રહેતા ભત્રીજાની ઠંડા કલેજે હત્યા કરી હતી. આ ઘટના અંગે પોલીસે સુરેન્દ્રનગર રહેતા મૃતકના નાના ભાઈ ઈરફાન ગફુરભાઈ ભટ્ટીની ફરિયાદ પરથી ગુનો નોંધી તપાસ હાથ ધરી છે.