યુદ્ધવિરામ બાદ કતારથી LNG લઈ દિશા કેરિયરનું દહેજ બંદરે આગમન, હોર્મુઝ પાર કરનાર પ્રથમ ભારતીય જહાજ

પશ્ચિમ એશિયાના ભૌગોલિક તણાવ વચ્ચે ભારત માટે ઊર્જા સુરક્ષાના સારા સમાચાર આવ્યા છે. કતારના રાસ લાફાન ટર્મિનલથી 62,370 મેટ્રિક ટન LNG ભરીને નીકળેલું ભારતીય કેરિયર ‘દિશા’ આજે સવારે ભરૂચના દહેજ LNG ટર્મિનલ પર સુરક્ષિત રીતે પહોંચી ગયું. યુદ્ધવિરામ પછી હોર્મુઝ સ્ટ્રેટ પાર કરીને આવનારું આ પ્રથમ ભારતીય LNG જહાજ બન્યું છે. છેલ્લા ત્રણ મહિનાથી પર્સિયન ગલ્ફમાં ફસાયેલું ‘દિશા’ હવે દેશમાં પહોંચતા ઊર્જા ક્ષેત્રે સ્થિરતા આવવાની આશા બંધાઈ છે.

હોર્મુઝ પાર કરીને દહેજ પહોંચ્યું ‘દિશા’ 

શિપિંગ કોર્પોરેશન ઓફ ઇન્ડિયા SCIના નેતૃત્વવાળા કન્સોર્ટિયમ દ્વારા સંચાલિત અને પેટ્રોનેટ LNG દ્વારા ચાર્ટર્ડ કરાયેલું LNG કેરિયર ‘દિશા’ કતારથી 62.3 હજાર મેટ્રિક ટન લિક્વિફાઇડ નેચરલ ગેસ લઈને આવ્યું છે. વ્યૂહાત્મક રીતે મહત્વપૂર્ણ હોર્મુઝ જળમાર્ગ પાર કરનારું આ પ્રથમ ભારતીય LNG જહાજ બન્યું છે. યુદ્ધવિરામ બાદ આ વિસ્તારમાંથી સુરક્ષિત પસાર થનારું તે પ્રથમ મોટું કાર્ગો છે.

આ પણ વાંચો: PFના નાણાં UPI અને ATMથી ઉપાડવાની સુવિધા ટૂંક સમયમાં

દહેજ: ભારતનું ઊર્જા હબ 

ગુજરાતના ભરૂચ જિલ્લામાં આવેલું દહેજ ભારતનું સૌથી મોટું LNG આયાત ટર્મિનલ છે અને દેશના કુદરતી ગેસ વિતરણ નેટવર્કનું મુખ્ય કેન્દ્ર છે. આજે સવારે ‘દિશા’ જહાજ અહીં ડોક થતાં જ LNG ઉતારવાની પ્રક્રિયા શરૂ થઈ ગઈ. છેલ્લા ત્રણ મહિનાથી પર્સિયન ગલ્ફના તણાવને કારણે વિલંબિત થયેલો આ જથ્થો હવે દેશની ગેસ ગ્રીડમાં દાખલ થશે.

ઊર્જા ક્ષેત્ર માટે રાહતના સમાચાર 

આ કાર્ગો ભારતમાં LNGની ઉપલબ્ધતા મજબૂત કરશે અને દેશભરમાં સ્થિર ઊર્જા પુરવઠાને ટેકો આપશે તેવી અપેક્ષા છે. હોર્મુઝ સ્ટ્રેટ થઈને આવતી LNGની સપ્લાય પર છેલ્લા સમયમાં અનિશ્ચિતતા હતી. ‘દિશા’ની સુરક્ષિત વાપસીએ ઉદ્યોગ અને વીજ ક્ષેત્રને મોટી રાહત આપી છે. નિષ્ણાતોના મતે આવી સપ્લાય ચાલુ રહેશે તો ગેસના ભાવમાં સ્થિરતા જળવાઈ રહેશે અને ઉદ્યોગોને સસ્તી ઊર્જા મળતી રહેશે. ‘દિશા’ના દહેજ આગમનથી સ્પષ્ટ થાય છે કે ભારતની ઊર્જા સુરક્ષા વ્યવસ્થા વૈશ્વિક સંકટ વચ્ચે પણ મજબૂત બની રહી છે.