બે બુટલેગર વચ્ચે હિસાબની ફાઇટમાં પોલીસે કરી લીધી `પેટીઓ’ની કમાણી ?
રાજકોટના નીલ નામ જેવા ધંધાર્થીને ત્યાં રૂરલના ધંધાર્થી પુત્ર સહિતના કારમાં ધસી આવ્યા હથિયારોથી ધમાલ મચી
પોલીસે મોટાને નાનુ કરી દેવા પેટીઓમાં પતાવટ કરી લીધાની ભારે ચર્ચા
રાજકોટ શહેરમાં બુટલેગર્સ, ગુનેગારોને ગોઠણિયે પાડી દેવા માટે સી.પી., ડીસીપી સહિતના ઉચ્ચ અધિકારીઓ આકરાં પાણીએ રહે છે પરંતુ જો ફાઉન્ડેશન નબળું હોય લાવો-લાવો હોય તો ગુનાખોરી કેમ અટકે ? આવું કંઈક શહેરના એક પોલીસ મથક વિસ્તારમાં બન્યાની ચર્ચા છે. એક બુટલેગરને ત્યાં બીજો બુટલેગરના પુત્ર સહિતના હિસાબની પતાવટ માટે ધસી ગયાને હથિયારોથી ધમાલ મચાવ્યાના બનાવમાં પોલીસે સખ્તાઈ કે વરઘોડો કાઢવા, લંગડા ચલાવવાના બદલે મોટાને નાનું કરી નાખવા છ આંકની પેટીઓમાં પતાવટ કરી લીધાની ભારે ચર્ચા ચાલી છે. જો આવું બન્યું હોય કે સત્ય હોય તો ધંધાર્થીઓ, ગુનેગારોને ડર જ કેમ રહે ? અથવા તો ઉચ્ચસ્તરે કડકાઈના લાખ પ્રયાસો થાય પરંતુ પાણીઢોળ જેવું જ બની રહે.
શહેરના એક વિસ્તાર કે જ્યાં સમયાંતરે દારૂ કે આવી બદી પકડાતી રહે છે કે ત્યાંના ધંધાર્થી પકડાતા રહે છે એ વિસ્તારના પવનને ભળતા નામ નીલ જેવા નામવાળા ધંધાર્થી અને રાજકોટ રૂરલના અપ્પુ પપ્પુ જેવા ધંધાર્થી વચ્ચે ધંધાકીય વ્યવહારો હશે. પપ્પુ માલ આપતો હતો જેના હિસાબ કે આવા કોઈ કારણોસર બન્ને વચ્ચે ટસલ થઈ કે ચાલતી હશે અને પપ્પુ પુત્ર સહિતના બ્લેક કલરની લગભગ ચારના ટોટલવાળી કારમાં નીલ જેવા નામ ધારી ધંધાર્થીને ત્યાં રાજકોટમાં ૧૫૦ ફૂટ રિંગરોડ તરફ આવી પહોંચ્યા હતા ત્યાં છરી કે આવા હથિયારો સાથે બઘડાટી પણ બોલી. પોલીસને ખબર પડી તો પહોંચી પણ ગઈ. કાર સહિતનાને લઈ અવાયા કહેવાય કે ચર્ચા છે કે મોટાનું નાનુ કરી આપવા માટે કોઈ કર્મીની મધ્યસ્થી અથવા લાગતા વળગતા થકી જે તે પોલીસ સાથે પેટીઓ (હરી પત્તી)માં ગોઠવણ થઈ જતાં કલમ નાની કરી નખાઈ અને બંધ બાજીમાં પતાવટ થઈ જતાં મેટોડા તરફથી ધમાલ કરવા આવેલા ધંધાર્થી પુત્ર અને સાગરિતોને હળવાશથી મુક્તિ મળી ગઈ.
ઘટનામાં વપરાયેલી એક બ્લેક કલરની કિંમતી કાર પોલીસ દ્વારા લઈ અવાઈ હતી અને નજીકમાં એક મંદિર પાસે કલાકો સુધી પાર્ક રહી હતી. કહેવાય છે કે, કાર કોઈ હથિયાર કે આવું નહીં બતાવવા અને નાનું કરી નાખવા માટેની કોઈ પતાવટ થઈ હશે. ઉપરોક્ત બાબત ક્યાંય ઓનપેપર નથી, ખરી ખોટી ચર્ચા ચાલી રહી છે જેથી હાલ તો વાતો કે અફવા જ માનવી પડે. જો સત્ય હોય તો `માલ’લીયા એ પોલીસ જ જાણતી હશે.
