ઈરાન ઉપર જમીની હુમલાની તૈયારી? યુએસનો 20 વર્ષનો સૌથી મોટો સૈન્ય જમાવડો, 3500 મરીન જવાનો તૈનાત કરાયા
મધ્ય પૂર્વમાં ઈરાન સાથે વધતી જતી અથડામણ વચ્ચે અમેરિકાએ છેલ્લા 20 વર્ષમાં સૌથી મોટો સૈન્ય જમાવડો શરૂ કર્યો છે. યુએસ સેન્ટ્રલ કમાન્ડ (CENTCOM)એ જણાવ્યું કે યુદ્ધ જહાજ “યુએસએસ ટ્રિપોલી” પર સવાર આશરે 3,500 મરીન અને નૌકાદળના જવાનો મધ્ય પૂર્વ વિસ્તારમાં પહોંચી ગયા છે. મધ્ય પૂર્વમાં પહેલેથી જ 50000 અમેરિકા સૈનિકો તૈનાત છે.નવા મરીન જવાનોના આગમન સાથે સમગ્ર વિસ્તારમાં અમેરિકાની સૈન્ય શક્તિ વધુ મજબૂત બની છે. CENTCOM દ્વારા જાહેર કરાયેલા ફોટોમાં હેલ્મેટ, ગોગલ્સ અને સંપૂર્ણ યુદ્ધ સજ્જામાં સૈનિકો જોવા મળે છે, જે સંભવિત મોટી કાર્યવાહી તરફ ઈશારો કરે છે.
“યુએસએસ ટ્રિપોલી” માત્ર જવાનો જ નહીં, પરંતુ ફાઇટર વિમાન, ટ્રાન્સપોર્ટ એરક્રાફ્ટ અને એમ્ફિબિયસ હુમલાખોર સાધનો સાથે પહોંચ્યું છે. આ જહાજ અને તેમાં સવાર 31મી મરીન એક્સપેડિશનરી યુનિટ અગાઉ જાપાનમાં સ્થાયી હતી અને તાઈવાન નજીક અભ્યાસ કરી રહી હતી, જ્યાંથી તેને તાત્કાલિક મધ્ય પૂર્વ માટે મોકલવામાં આવી હતી.
આ સાથે જ યુએસએસ બોક્સર સહિતના અન્ય યુદ્ધ જહાજો અને એક વધુ મરીન યુનિટને પણ સાન ડિએગોથી મધ્ય પૂર્વ તરફ રવાના કરવામાં આવ્યા છે. સતત વધતી આ તૈનાતીથી સ્પષ્ટ થાય છે કે અમેરિકાએ વિસ્તારમા પોતાની સૈન્ય હાજરીને ઝડપી ગતિએ વધારી છે. આ પગલાએ ઈરાનમાં જમીની હુમલાની શક્યતાઓને લઈને ચર્ચાઓ ગરમાવી દીધી છે. જોકે ટ્રમ્પે વારંવાર કહ્યું છે કે અમેરિકા સીધો જમીની યુદ્ધમાં પ્રવેશવાનો ઈરાદો રાખતું નથી, છતાં દળોની ગોઠવણી અને તેમની સ્થિતિ સૂચવે છે કે તેઓ ઈરાન અને ખાસ કરીને ખારગ આઈલેન્ડ જેવા મહત્વના તેલ ટર્મિનલની નજીક તૈનાત થઈ શકે છે.વોલ સ્ટ્રીટ જર્નલના અહેવાલમાં જણાવ્યા મુજબ પરિસ્થિતિ ઝડપથી બદલાઈ રહી છે અને કોઈ પણ સમયે મોટું સૈન્ય પગલું લેવાઈ શકે તેવા સંકેતો મળી રહ્યા છે.
અમેરિકા ખર્ગ ટાપુનો કબજો લઈ શકે છે, હોર્મુઝ નજીક હુમલા સંભવ
આ સૈન્ય જમાવડો જોતાં યુએસ ખર્ગ આઈલેન્ડ પર નિયંત્રણ મેળવવાનો પ્રયાસ કરી શકે છે તેવું નિષ્ણાતોનું માનવું છે.આ ટાપુ ઈરાન માટે અત્યંત મહત્વપૂર્ણ તેલ નિકાસ કેન્દ્ર છે અને તેની ઉપર કબજો મેળવવો એટલે ઈરાનની આર્થિક નસ પર પ્રહાર સમાન માનવામાં આવે છે. વોલ સ્ટ્રીટ જર્નલના અહેવાલ મુજબ, અમેરિકી દળોને ઈરાનની નજીક તથા ખર્ગ ટાપુની મારક રેન્જમાં તૈનાત કરવાની યોજના બની રહી છે. આ સાથે જ હોર્મુઝ જળસંધિ નજીક પણ સૈન્ય કાર્યવાહી થવાની શક્યતા વ્યક્ત કરવામાં આવી રહી છે.બીજી તરફ આવી કાર્યવાહી માટે ટ્રમ્પ આદેશ આપશે કે નહી તે અંગે અનિશ્ચિતતા પ્રવર્તે છે.વિશ્લેષકોના મત મુજબ ખર્ગ ટાપુનો કબજો લેવો મુશ્કેલ નથી પણ તે પછી મોટો સવાલ ત્યાં તૈનાત અમેરિકી સૈનિકોની સલામતીનો છે. ઉપરાંત હોર્મુઝ માર્ગ વિશ્વના તેલ પુરવઠા માટે અત્યંત મહત્વપૂર્ણ માર્ગ છે.જો આ વિસ્તારમાં સીધી કાર્યવાહી થાય તો વૈશ્વિક ઊર્જા બજારમાં ભારે ઉથલપાથલ સર્જાઈ શકે છે અને યુદ્ધ વધુ વ્યાપક સ્વરૂપ લઈ શકે છે
ઈરાનનો ચેતવણીભર્યો જવાબ
ઈરાન તરફથી પણ તીવ્ર પ્રતિક્રિયા સામે આવી છે. ‘તેહરાન ટાઈમ્સ’ના મુખ્ય પૃષ્ઠ પર “વેલકમ ટુ હેલ” હેડલાઇન સાથે અમેરિકાને કડક ચેતવણી આપવામાં આવી છે. અહેવાલ મુજબ, જો અમેરિકી સૈનિકો ઈરાનની જમીન પર પગ મૂકાશે તો તેઓ “માત્ર કફનમાં જ પરત ફરશે” એવી ધમકી આપવામાં આવી છે. ઈરાનની આ ભાષા સ્પષ્ટ કરે છે કે કોઈપણ જમીની કાર્યવાહી ગંભીર અને વિનાશક અથડામણમાં ફેરવાઈ શકે છે.
