ટ્રમ્પ ટાઢા પડયા! ઇરાનના પાવર પ્લાન્ટ પર 5 દિવસ માટે હુમલો ટાળવાની જાહેરાત છતાં ઈરાન-ઇઝરાયેલ વચ્ચે મિસાઈલ વડે હુમલા યથાવત

પશ્ચિમ એશિયામાં ભયાનક યુદ્ધ ભડકેલું છે અને તેની વચ્ચે અમેરિકા અને ઇરાન વચ્ચેના ટકરાવમાં એક નવો જ મોડ આવી ગયો છે. અમેરિકી રાષ્ટ્રપતિ ટ્રમ્પ પોતાના જ 48 કલાક વાળા અલ્ટીમેટમ પર પલ્ટી મારી ગયા હતાં અને હોર્મુઝ જળ માર્ગ ખોલવા માટે ઇરાનને હુમલાની જે ચેતવણી આપી હતી તેના પર બ્રેક મારી દીધી હતી અને એમ કહ્યું હતું કે, ઇરાનના પાવર પ્લાન્ટ પર હુમલાનો પ્લાન 5 દિવસ માટે ટાળી દીધો છે.

ઇઝરાયલ પર બેવડો હુમલો

આજે ઇઝરાયલને બેવડો ફટકો પડ્યો. એક મોરચે, ઇઝરાયલની રાજધાની, તેલ અવીવ પર ઈરાને અનેક મિસાઈલો છોડી. પોલીસનું કહેવું છે કે તેલ અવીવમાં વિસ્ફોટ ઈરાની હથિયારથી થયો હતો. ઇઝરાયલી પોલીસે અહેવાલ આપ્યો છે કે આશરે 100 કિલોગ્રામ (220 પાઉન્ડ) વિસ્ફોટકો ધરાવતા ઈરાની હથિયારથી નુકસાન થયું હતું. મિસાઈલે રહેણાંક શેરીમાં ઘરો અને કારને નુકસાન પહોંચાડ્યું હતું, જોકે કોઈને ગંભીર ઈજા થઈ હોવાના કોઈ અહેવાલ નથી.

બીજા મોરચે, હિઝબુલ્લાહે લેબનોનથી IDF પર રોકેટ હુમલો કર્યો. હિઝબુલ્લાહે જણાવ્યું હતું કે, “અમે દક્ષિણ લેબનોનમાં દુશ્મન ઇઝરાયલી સૈનિકોના એક યુનિટને મિસાઈલોથી નિશાન બનાવ્યું હતું.”

આ પણ વાંચો: કોરોનાકાળ જેવા પડકારનો સામનો કરવા તૈયાર રહેવું પડશે: વડાપ્રધાને કહ્યું,’પેટ્રોલ, ડીઝલ-ગેસની અછત ન થાય તે માટે સરકાર સક્રિય’

ઇરાન સાથે છેલ્લા 2 દિવસથી વાતચીત

ટ્રમ્પે 5 દિવસ સુધી ઇરાનના વિજળી સંયત્રો પર હુમલાની યોજના અટકાવી દીધી છે. આ એલાન કરવા સાથે એમણે એમ પણ કહ્યું હતું કે, અમારી ઇરાન સાથે છેલ્લા 2 દિવસથી વાતચીત ચાલી રહી છે અને હવે આગળની વાતના પરિણામ બાદ હુમલા અંગેનો નિર્ણય લેવાશે.

આ પહેલા ટ્રમ્પે ઇરાનને એવી ચેતવણી આપી હતી કે, જો 48 કલાકમાં તે હોર્મુઝ જળ માર્ગ નહીં ખોલે તો તેના પાવર પ્લાન્ટ પર હુમલા કરવામાં આવશે. આમ એકાએક ટ્રમ્પ ઇરાન પર ભયાનક હુમલો કરવાના પોતાના પ્લાનમાં પાછળ હટી ગયા હતાં અને ઇરાન સાથે એમણે વાતચીતનો માર્ગ અપનાવી લીધો છે.

48 કલાકની અવધી પુરી થતાં પહેલા જ ટ્રમ્પે આ અતિ ભયાનક હુમલાનો પ્લાન 5 દિવસ માટે અટકાવી દીધાની જાહેરાત કરતાં જ યુદ્ધ રોકાઇ જવાની અટકળો પણ વહેતી થઇ ગઇ હતી.

ઇરાને કહ્યું “અમારી વચ્ચે કોઇ વાતચીત થઇ નથી”

ટ્રમ્પે ઇરાનના પાવર પ્લાન્ટ પર હુમલા કરવાની યોજના 5 દિવસ માટે ટાળી દીધાની જાહેરાત કર્યા બાદ ઇરાને ટ્રમ્પને નિરાશ કરીને એમ જાહેર કર્યુ હતું કે, અમેરિકા સાથે અમારી કોઇ વાતચીત થઇ નથી, અને કોઇ મધ્યસ્થી મારફત પણ સંપર્ક થયો નથી. ઇરાનની ન્યુઝ એજન્સી દ્વારા આ પ્રકારનો અહેવાલ અપાયો હતો. તેનો અર્થ એવો છે કે, ઇરાન યુદ્ધ ચાલુ રાખવા માગે છે.

ટ્રમ્પની જાહેરાત બાદ ક્રુડનો ભાવ 11% ઘટી ગયો

અમેરિકી પ્રમુખ ટ્રમ્પની ઇરાનના પાવર પ્લાન્ટ પર હુમલા કરવાની યોજના 5 દિવસ માટે ટાળવામાં આવી છે તેવી જાહેરાત થયા બાદ ક્રુડને પણ સુરાતન ચડી ગયું હતું અને ક્રુડના ભાવમાં 11%નો સીધો જ ઘટાડો થઇ ગયો હતો અને 101 ડોલર પ્રતિ બેરલ થઇ ગયો હતો. જો કે ઇરાને વાતચીતનો ઇનકાર કર્યો છે ત્યારે ક્રુડના ભાવમાં ફરીથી ભડકો થવાનો થયો પણ રહેલો છે.