પરીક્ષા પૂરી હવે એક મહિનો બોર્ડની પરીક્ષા કેન્દ્રોનાં CCTV ચેક થશે: રાજકોટમાં 45 શિક્ષકોને જવાબદારી સોંપવામાં આવી
ગુજરાત બોર્ડની પરીક્ષા પુરી થતાં હવે શિક્ષકો સીસીટીવી ફૂટેજની ચકાસણીમાં લાગી જશે.રાજકોટમાં 45 શિક્ષકોને સીસીટીવી ચેક કરવાની જવાબદારી સોંપવામાં આવી છે. રાજકોટમાં ધો.10 ની પરિક્ષાનાં સીસીટીવી ફૂટેજ શહેરનાં રૈયા રોડ પર આવેલ ન્યુ એરા સ્કૂલ અને ધો.12નાં ફૂટેજ ધોળકિયા સ્કૂલમાં તપાસવામાં આવશે.
આ કામગીરી માટે ડીઈઓ કચેરી દ્વારા 45 જેટલા શિક્ષકોની ટીમો બનાવવામાં આવી છે.એક ટીમને ધો.૧૦ અને એક ટીમને ધો.૧૨ના ફૂટેજની ચકાસણીની જવાબદારી સોંપવામાં આવી છે.પરીક્ષા દરમિયાન સ્થાનિક સ્કવોડ હવે રાખવામાં આવતી નથી.જ્યારે ગેરરીતિ પર નજર રાખવા માટે મોટાભાગે સીસીટીવી ફૂટેજ જોવામાં આવે છે.
આ માટે દરેક પરીક્ષા કેન્દ્ર પરથી પરીક્ષા પૂરી થતાની સાથે જ સીસીટીવી ફૂટેજનું રેકોર્ડિંગ સીડી અથવા ડીવીડી સ્વરુપે ડીઈઓ કચેરીમાં જમા કરાવવાનું હોય છે.ફૂટેજની ચકાસણી માટે દર વર્ષની જેમ આ વર્ષે પણ 45 શિક્ષકોને જવાબદારી સોંપવામાં આવી છે.
મળતી વિગતો પ્રમાણે ધો.10 અને ધો.12ના ફૂટેજની અનેક સીડીની ચકાસણી લગભગ એક મહિનામાં પૂરી કરાશે.આ ચકાસણીના આધારે જો કોઈ વિદ્યાર્થી પરીક્ષામાં ગેરરીતિ કરતો દેખાશે તો તેને નોટિસ મોકલીને ડીઈઓ કચેરી ખાતે સુનાવણીમાં બોલાવવામાં આવશે.રાજકોટ શહેર જિલ્લામાં ધો.10 અને ધો.12ની પરીક્ષામાં 1 ગેરરીતિનો કેસ ગોંડલ ખાતે નોંધાયો છે.
