રાજકોટ: આગને કારણે કોંગ્રેસ અગ્રણી દોંગાને થયું કરોડોનું નુકસાન,મજૂરે બીડી સળગાવતાં જ ચાઈનાથી મંગાવેલો સામાન બળીને ખાક
રાજકોટની ભાગોળે વાજડી-ન્યારી રોડ પર આવેલા પામવિલાની બાજુમાં જ મુદ્રા ઈવેન્ટ નેટવર્કસ કે જે કોંગ્રેસ અગ્રણી મિતુલ દોંગાની માલિકીનું છે ત્યાં રવિવારે રાત્રે 8 વાગ્યાના અરસામાં આગ લાગી જતાં ફાયર બ્રિગેડે દોડી જઈ 3 કલાક સુધી પાણીનો મારો ચલાવીને આગ કાબૂમાં લીધી હતી. સદ્ભાગ્યે આગને કારણે કોઈ ઈજાગ્રસ્ત કે જાનહાની થવા પામી ન્હોતી પરંતુ કોંગ્રેસ અગ્રણીને કરોડો રૂપિયાનું નુકસાન થયું હતું. તેમણે તાજેતરમાં જ લગ્ન સહિતના પ્રસંગો માટે ઉપયોગમાં લેવા માટે ચાઈના થી ખાસ પ્રકારનો સામાન મંગાવ્યો હતો જે પણ આ આગમાં ખાક થઈ ગયો હોવાનું જાણવા મળ્યું છે.
કોંગ્રેસ અગ્રણી મિતુલ દોંગા દ્વારા ચાઈના થી મંગાવેલા સામાનનો ઉપયોગ થોડા સમય પહેલાં જ ટોચના ઉદ્યોગપતિ પરિવાર માં યોજાયેલા પ્રસંગમાં કરવામાં આવ્યો હતો. આ પછી તમામ સામાન ઉપરોક્ત ગોડાઉન કે જે 350 ફૂટ લાંબું છે ત્યાં રાખવામાં આવ્યો હતો. પ્રાથમિક રીતે જાણવા મળ્યા મુજબ આ ગોડાઉનમાં મજૂરે બીડી સળગાવતાં જ આગ લાગી હતી અને તે ક્ષણભરમાં વિકરાળ બની જવા પામી હતી જેના કારણે કાર્પેટ, સોફા, બેન્કેટવેર, ખુરશી, લાકડાની મોંઘી ખુરશીઓ, પ્લાસ્ટિકની ખુરશી તેમજ શણગારનો તમામ સામાન સળગી જવા પામ્યો હતો.
ફાયર બ્રિગેડના 6 ફાયર ફાઈટર તેમજ 29 લોકોના સ્ટાફે 3 કલાક સુધી પાણીનો મારો ચલાવી આગ કાબૂમાં લીધી હતી. જો કે આગ લાગતાં જ ગોડાઉનની બાજુમાં આવેલું પામ વિલા એપાર્ટમેન્ટ કે જ્યાં થોડા સમયથી 6 જેટલા પરિવારો કાયમી સ્થાયી થયા છે તેમના જીવ તાળવે ચોટી ગયા હતા.
