25 હજારથી 2 લાખ સુધીનો પગાર છતાં RMCના કર્મચારીઓ-અધિકારીઓને ‘રેવડી’ આપવા માંગ! કમિશનરને લેખિત રજૂઆત

મહાપાલિકામાં હાલ સફાઈ કામદાર સહિત કુલ 5000થી વધુ કર્મચારીઓ નોકરી કરી રહ્યા છે ત્યારે તેમનો પગાર 25,000થી લઈ 2 લાખ રૂપિયા સુધીનો હોવાનો અંદાજ છે. એકંદરે વર્ગ-1થી લઈ વર્ગ-4 સુધીના કર્મચારીઓને દર વર્ષે 500 કરોડ રૂપિયાથી વધુનો પગાર ચૂકવવામાં આવે છે ત્યારે હવે પછાત વર્ગ કર્મચારી મંડળ દ્વારા તમામ અધિકારીઓ તેમજ કર્મચારીઓને સિટી બસ, સ્વિમિંગ પુલ, પ્રદ્યુમન પાર્ક ઝૂ સહિતમાં એન્ટ્રી સહિતની સુવિધા વિનામૂલ્યે આપવા મ્યુનિસિપલ કમિશનર પાસે લેખિતમાં રજૂઆત કરવામાં આવી હોવાનું જાણવા મળ્યું છે.

મ્યુનિસિપલ પછાત વર્ગ કર્મચારી મંડળ દ્વારા કરવામાં આવેલી રજૂઆતમાં જણાવાયું છે કે મહાપાલિકાના કર્મચારીઓ તેમજ અધિકારીઓ રાત-દિવસ જોયા વગર કુદરતી આપત્તિ દરમિયાન ખડેપગે રહે છે. આ ઉપરાંત શહેરીજનોની સુખાકારી માટે પણ ખંતપૂર્વક કામ કરી રહ્યા છે ત્યારે તેમને પણ સામાન્ય નાગરિકની જેમ જ જાહેર સુવિધા મેળવવા માટે ચાર્જ ચૂકવવો પડી રહ્યો છે. આમ ન કરીને મહાપાલિકાના વર્ગ-1થી લઈ વર્ગ-4 સુધીના તમામ અધિકારીઓ અને કર્મચારીઓને સિટી બસમાં વિનામૂલ્યે મુસાફરી, પ્રદ્યુમન પાર્ક, સફારી પાર્ક, રામવન, ગાંધી મ્યુઝિયમ સહિતના સ્થળે વિનામૂલ્યે એન્ટ્રી, લાયબ્રેરીમાં પણ વિનામૂલ્યે રજિસ્ટ્રેશન સહિતની સુવિધા આપવી જોઈએ.

આ ઉપરાંત કોમ્યુનિટી હોલનું બુકિંગ જ્યારે મહાપાલિકાના અધિકારી કે કર્મચારી કરાવે ત્યારે બુકિંગમાં તેમને અગ્રતા આપવી જોઈએ. રજૂઆતમાં એમ પણ જણાવાયું છે કે અન્ય સરકારી તેમજ અર્ધ સરકારી સંસ્થાઓ દ્વારા તેમના કર્મચારીઓને આ પ્રકારના લાભ આપવામાં આવી રહ્યા છે ત્યારે મહાપાલિકાના અધિકારીઓ તેમજ કર્મચારીઓને પણ આ પ્રકારે લાભ આપવા વિચારવું જોઈએ. જો કે હાલ આ અંગે મ્યુનિસિપલ કમિશનર દ્વારા રજૂઆત સંદર્ભે કોઈ નિર્ણય લેવામાં આવ્યો ન હોવાનું જાણવા મળી રહ્યું છે.

#VoiceOfDay૨૫,૦૦૦થી બે લાખ સુધીનો પગાર છતાં RMCના કર્મીઓ-અધિકારીઓને `રેવડી’ આપવા માંગ !