રાજકોટ પોલીસ કમિશનરનું જાહેરનામું: હોળી-ધૂળેટીમાં વાહન રોકી પૈસા ઉઘરાવવા પર પ્રતિબંધ, જાહેરમાં રંગ ઉડાડવા-ફુગ્ગા ફેંકવાની મનાઈ

આગામી તા.3 માર્ચે હોળી અને 4 માર્ચે ધૂળેટીના પર્વની ઉજવણી થવાની છે ત્યારે આ તહેવારને લોકો હર્ષોલ્લાસથી માણી શકે તેમજ કોઈ પ્રકારનો અનિચ્છનીય બનાવ ન બને તે માટે પોલીસ કમિશનર દ્વારા પ્રતિબંધો ફરમાવતું જાહેરનામું પ્રસિદ્ધ કરવામાં આવ્યા છે. જાહેરનામા પ્રમાણે હોળી-ધૂળેટી ઉપર જાહેર રસ્તાઓ ઉપર ઉભા રહી તેમજ વાહનો અટકાવીને પૈસા (ગોઠ) ઉઘરાવવા ઉપર પ્રતિબંધ ફરમાવવામાં આવ્યો છે.

આ ઉપરાંત પુરુષો, સ્ત્રીઓ તેમજ બાળકોએ જાહેર રસ્તાઓ, જાહેર જગ્યાઓ ઉપર અવર-જવર કરતા રાહદારીઓ ઉપરાંત મિલકતો, વાહનો ઉપર જતાં લોકો ઉપર રંગ ઉડાડવા, ફુગ્ગા ફેંકવા તેમજ પાણી ભરેલા ફુગ્ગા ફેંકવાની મનાઈ ફરમાવાઈ છે.

આ પણ વાંચો:45 ફૂટ ઉંચા બિલ્ડિંગ માટે ફાયર NOC ફરજિયાત કરો: મનમંદિર એપાર્ટમેન્ટમાં આગની ઘટના બાદ RMC કરશે સરકારને રજૂઆત

જ્યારે કાદવ, રંગમિશ્રિત પાણી અથવા તૈલી પદાર્થ ફેંકનારા સામે ગુનો નોંધવામાં આવશે. આ તહેવારમાં રસ્તાઓ ઉપર આમ તેમ દોડાદોડી કરવી તેમજ અન્ય ધર્મની લાગણી દુભાય તેવી હરકત કરનાર સામે પણ કાર્યવાહી કરવામાં આવશે. ખાસ કરીને રસ્તા ઉપર વાહન ઉભા રાખીને રંગોથી રમનારા સામે તાત્કાલિક ગુનો દાખલ કરાશે.