T20 World Cup 2026: ભારતે આજે ઝીમ્બાબ્વેને હરાવવું જ પડશે…એ પણ મોટા અંતરથી: સંજૂ સેમસનને મળી શકે તક, ચેન્નાઈમાં મુકાબલો
ટોપ ઓર્ડરની નિષ્ફળતા અને અગાઉની હાર બાદ ભારે દબાણમાં આવેલી ડિફેન્ડિંગ ચેમ્પિયન ભારતીય ટીમ આજે ગુરુવારે ‘જાયન્ટ કિલર’ ઝીમ્બાબ્વે સામે T-20 વર્લ્ડકપ 2026ના સુપર-8 રાઉન્ડમાં ‘કરો યા મરો’ મુકાબલો રમશે. આફ્રિકા સામે 76 રને હાર્યા બાદ ભારતનો નેટ રનરેટ માઈનસ 3.80 થયો છે, જેના કારણે સેમિફાઈનલની રેસમાં ટકી રહેવા માટે ચેન્નાઈમાં રમાનાર આ મેચ મોટા અંતરથી જીતવી ફરજિયાત બની ગઈ છે. ઈનિંગની મજબૂત શરૂઆત અને ત્રીજા નંબરના બેટરની સમસ્યા હલ કરવી પણ અત્યંત જરૂરી છે. મેચ સાંજે 7 વાગ્યે શરૂ થશે.
વર્લ્ડકપ પહેલા ઓપનર અભિષેક શર્મા અને ઈશાન કિશન ઉત્તમ ફોર્મમાં હતા અને દક્ષિણ આફ્રિકા તથા ન્યુઝીલેન્ડ સામેની શ્રેણીમાં પ્રભાવશાળી પ્રદર્શન કર્યું હતું. જોકે વર્લ્ડકપમાં એકાદ મેચ સિવાય બન્ને બેટર ફોર્મ ગુમાવી બેઠા છે. સપાટ પીચ પર ઓફ સ્પિન સામે અભિષેક સંઘર્ષ કરી રહ્યો છે અને ટૂર્નામેન્ટની 4 મેચમાં માત્ર 15 રન જ બનાવી શક્યો છે. તિલક વર્માએ પણ પ્રદર્શનમાં સુધારો લાવવો પડશે. કેપ્ટન તરીકે સૂર્યકુમાર યાદવનો સ્ટ્રાઈક રેટ પણ ચિંતાનો વિષય છે. શિવમ દુબે અને હાર્દિક પંડ્યા નીચલા ક્રમે ઝડપી રન ન બનાવે તો ભારત માટે મોટો સ્કોર ઉભો કરવો મુશ્કેલ બની જાય છે.
આજની મેચમાં સંજુ સેમસનને તક મળી શકે છે. ઝીમ્બાબ્વેનું સ્પિન આક્રમણ ખૂબ ખતરનાક નથી, પરંતુ ફાસ્ટ બોલરો બ્લેસિંગ મુજરબાની, રિચર્ડ એનગારાવા અને બ્રાડ ઈવાન્સ પડકારરૂપ બની શકે છે. બોલિંગ વિભાગમાં ભારત મજબૂત છે, છતાં પાછલી મેચમાં આફ્રિકાની 3 વિકેટ 20 રનમાં પાડ્યા બાદ પણ વિરોધી ટીમ 187 રન સુધી પહોંચી ગઈ હતી, જે ચિંતા વધારનાર બાબત છે.
વિન્ડિઝ-આફ્રિકા પણ સેમિ માટે ‘ફાઈનલ’ સમાન મેચમાં આમને સામને
ભારત-ઝીમ્બાબ્વે મુકાબલા પહેલાં બપોરે 3 વાગ્યે અમદાવાદમાં વેસ્ટ ઈન્ડિઝ અને દક્ષિણ આફ્રિકા વચ્ચે પણ મહત્વપૂર્ણ મેચ રમાશે. બન્ને ટીમો સેમિફાઈનલમાં સ્થાન પક્કું કરવા ઉતરશે. જો દક્ષિણ આફ્રિકા જીતે તો ભારતને ફાયદો થઈ શકે છે. સુપર-8માં બન્ને ટીમ પોતાની પહેલી મેચ જીતી ચૂકી છે.
