સોરી પપ્પા…કોરિયન ગેમિંગની લતે લીધો 3 બહેનોનો જીવ: ગાઝિયાબાદમાં 9માં માળેથી કૂદી કર્યો આપ*ઘાત, હૃદયદ્રાવક સુસા*ઇડ નોટ આવી સામે

ગાઝિયાબાદની ભારત રેસીડેન્સી ટાઉનશિપ ની એક અત્યંત આઘાતજનક અને સમગ્ર સમાજ માટે ખતરાની ઘંટી સમાન ઘટનામાં ઓનલાઈન કોરિયન ગેમિંગ એપની લતે ચડી ગયેલી ત્રણ સગીર વયની સગી બહેનોએ નવમાં માળેથી નીચે ઝંપલાવીને સામુહિક આપઘાત કરી લીધો હતો. તેમની ગેમિંગ અને મોબાઈલ ફોન પરની પ્રવૃતિ પર અંકુશ લાવવા તેમના પિતાએ મોબાઈલ ફોન લઈ લીધા બાદ આ ત્રણે બહેનોએ આ અંતિમ પગલું ભરી લીધું હતું.તેમણે એક ડાયરીમાં આઠ પાનાની સુસાઇડ નોટ લખી હતી જેમાં તેઓ કોરિયા વગર રહી ન શકતી હોવાનું જણાવ્યું હતું

બહાર આવેલી વિગતો મુજબ રાતે આશરે 2.15 વાગ્યે પાખી (12), પ્રાચી (14) અને વિશિકા (16) નામની ત્રણ બહેનો એકસાથે પોતાના ફ્લેટના બાલ્કનીમાં ગઈ હતી. તેમણે અંદરથી દરવાજો બંધ કરી અને બાદમાં એક પછી એક નીચે ઝંપલાવી દીધું હતું.ચીસોના અવાજથી માતા-પિતા, પાડોશીઓ અને સિક્યોરિટી ગાર્ડ દોડી આવ્યા, પરંતુ બાલ્કનીનો દરવાજો તોડીને પહોંચ્યા ત્યાં સુધી મોડું થઈ ગયું હતું.

આ પણ વાંચો :દક્ષિણ એશિયામાં સૌથી ઓછો ટેરિફ હવે ભારત પર: ટેરિફ 18 ટકા થતાં ચીન-બાંગ્લાદેશ,પાકિસ્તાન સામે નિકાસમાં મોટો ફાયદો

પરિવારજનોના જણાવ્યા મુજબ ત્રણેય બહેનોને છેલ્લા કેટલાક વર્ષોથી ઓનલાઈન “કોરિયન લવ ગેમ” અને કોરિયન કલ્ચર પ્રત્યે અસાધારણ આકર્ષણ હતું. તેઓ એકબીજાથી અલગ રહેતા નહોતા . સાથે નાહવું, સાથે જમવું, સાથે સૂવું અને સાથે જ દરેક નિર્ણય લેવો તેમનો સ્વભાવ બની ગયો હતો.

કોરોના કાળ દરમિયાન શરૂ થયેલું આ વ્યસન ધીમે ધીમે એટલું વધ્યું કે તેમણે સ્કૂલ જવું પણ બંધ કરી દીધું હતું. તાજેતરમાં પિતાએ મોબાઈલ વપરાશ પર અંકુશ મૂકતા ત્રણે બહેનો ગુમસુમ બની ગઈ હતી. સુસાઇડ નોટમાં તેમણે લખ્યું હતું કે” અમે આ નહીં છોડી શકીએ..”

પોલીસના જણાવ્યા મુજબ ત્રણેય બહેનો કોરિયન ગેમિંગ અને કોરિયન સંસ્કૃતિથી અત્યંત પ્રભાવિત હતી. તેઓએ કોરિયન નામ પણ અપનાવ્યા હોવાનું પ્રાથમિક તપાસમાં સામે આવ્યું છે. આ ઘટનામાં કોઈ તૃતીય પક્ષની સંડોવણી નથી, પરંતુ ઓનલાઈન ગેમિંગના માનસિક પ્રભાવની દિશામાં તપાસ ચાલી રહી છે.

પિતાની અન્ય વાલીઓને અપીલ

આ કરુણ ઘટનાથી ભાંગી પડેલા શોકમાં ગરકાવ પિતાએ રડતાં કહ્યું, “તેઓ કહેતી – પપ્પા, કોરિયા અમારી જિંદગી છે, અમે તેને છોડી શકીએ નહીં. આજે એ જ શબ્દો અમારી સામે મોત બનીને ઊભા રહ્યા છે.” પિતાએ અન્ય માતા-પિતાને અપીલ કરતાં કહ્યું કે બાળકોના મોબાઈલ અને ગેમિંગ પર સમયસર નજર રાખવી અતિ આવશ્યક છે.

સુસાઇડ નોટની હૃદયદ્રાવક વિગતો

“આ ડાયરીમાં જે કંઈ લખ્યું છે તે બધું સાચું છે.”

“સોરી પપ્પા… અમને માફ કરી દેજો.”

“કોરિયા વગર અમે રહી શકતા નથી.”

“તમે અમને આ દુનિયામાંથી મુક્ત કરી શકશો નહીં.”

“અમે એકલા છીએ… બહુ જ એકલા.”

હાથથી દોરેલ રડતું ઈમોજી

ગેમિંગ ટાસ્ક અને મોબાઈલ પ્રવૃત્તિઓનો વિગતવાર ઉલ્લેખ