દક્ષિણ એશિયામાં સૌથી ઓછો ટેરિફ હવે ભારત પર: ટેરિફ 18 ટકા થતાં ચીન-બાંગ્લાદેશ,પાકિસ્તાન સામે નિકાસમાં મોટો ફાયદો
અમેરિકાએ ભારત ઉપરનો કુલ ટેરિફ 50 ટકામાંથી ઘટાડીને સીધો 18 ટકા કરી દેતાં ભારતીય નિકાસ બજાર માટે અકલ્પ્ય ફાયદાની સ્થિતિ ઊભી થઈ છે. અમેરિકી બજારમાં ભારત સાથે સીધી હરિફાઈ કરતા ચીન પાકિસ્તાન અને બાંગ્લાદેશ સહિતના અનેક દેશો પર લાગતા ટેરિફ ભારત કરતાં ઊંચા હોવાને કારણે વૈશ્વિક વેપારમાં ભારતને સ્પષ્ટ સ્પર્ધાત્મક લાભ મળ્યો છે.
નવો 18 ટકા ટેરિફ દર ભારતને દક્ષિણ એશિયામાં સૌથી અનુકૂળ સ્થિતિમાં મૂકે છે. ખાસ કરીને ટેક્સટાઇલ, રેડીમેડ ગાર્મેન્ટ્સ, એન્જિનિયરિંગ ગૂડ્સ, ફાર્માસ્યુટિકલ્સ અને લાઇટ મેન્યુફેક્ચરિંગ જેવા ક્ષેત્રોમાં ભારતીય ઉત્પાદનો હવે અમેરિકી બજારમાં વધુ ભાવસ્પર્ધાત્મક બનશે. તેના મુકાબલે ચીન પર હજુ પણ ભારે ટેરિફ હોવાથી તેની નિકાસ મોંઘી પડશે, જ્યારે પાકિસ્તાન અને બાંગ્લાદેશ જેવા દેશો પણ ભારત કરતાં ઊંચા દર હેઠળ રહેશે.
આ પણ વાંચો :શું ભારત અમેરિકી કૃષિ માટે દ્વાર ખોલશે? ઝીરો ટેરિફનો દાવો, પણ સવાલો યથાવત, ટ્રેડ ડીલ જાહેરાતથી ભારતની સુરક્ષાત્મક વેપાર નીતિ સામે પ્રશ્નચિહ્ન
વેપાર નિષ્ણાતોના મતે, આ ફેરફાર માત્ર ટેરિફ ઘટાડો નથી, પરંતુ વૈશ્વિક સપ્લાય ચેઇનમાં ભારતને આગળ ધપાવતું વ્યૂહાત્મક શિફ્ટ છે. અમેરિકી આયાતકારો માટે ભારત વધુ વિશ્વસનીય અને સસ્તો વિકલ્પ બનશે, જે લાંબા ગાળે નિકાસ વૃદ્ધિ, રોજગાર અને મેન્યુફેક્ચરિંગ ક્ષમતામાં વધારો લાવી શકે છે.
હાયર ટેરિફ ધરાવતા દેશો
- બ્રાઝીલ – 50%
- મ્યાનમાર – 40%
- લાઓસ – 40%
- ચીન – 37%
- દક્ષિણ આફ્રિકા – 30%
લોઅર ટેરિફ ધરાવતા દેશો
- યુકે – 10%
- યુરોપિયન યુનિયન – 15%
- સ્વિટ્ઝર્લૅન્ડ – 15%
- જાપાન – 15%
- દક્ષિણ કોરિયા – 15%
એશિયામાં ટેરિફ સ્થિતિ
- વિયેતનામ – 20%
- બાંગ્લાદેશ – 20%
- પાકિસ્તાન – 19%
- મલેશિયા – 19%
- કંબોડિયા – 19%
- થાઇલેન્ડ – 19%
જો કે હજુ કેટલુંક અસ્પષ્ટ
18 ટકા ટેરિફ ક્યારે અમલમાં આવશે તેની તારીખ જાહેર નથી થઈ. રશિયન તેલ ખરીદી બંધ કરવાની સમયમર્યાદા સ્પષ્ટ નથી.ભારત કયા અમેરિકન ઉત્પાદનો કેટલી માત્રામાં ખરીદશે તેની વિગતો નથી. અમેરિકાની સત્તાવાર પ્રોક્લેમેશન અને ફેડરલ નોટિસ બાકી. કરારના સંપૂર્ણ કાનૂની શરતો જાહેર થવાની પ્રતિક્ષા.
જો કે આટલા સેક્ટર પર ટેરિફ યથાવત
અમેરિકાના ટ્રેડ એક્સપાન્શન એક્ટ હેઠળ દેશના કેટલાક સેક્ટર પર ટેરિફ યથાવત રહેશે જેમાં ઑટોમોબાઇલ, સ્ટીલ, એલ્યુમિનિયમ, ટીંબર, કોપર, ટ્રકસ અને શીપનો સમેશ થાય છે
દેશને આટલા ક્ષેત્રમાં ફાયદો
ટેક્સટાઇલ, જેમ્સ એન્ડ જ્વેલરી અને તેની સાથે જોડાયેલ કંપનીઓ, કાપડ, લેધર, ફૂટવેર દરેક પ્રકારના ગારમેન્ટ વગેરેનો સમાવેશ થાય છે.
