જેતપુર પાલિકાના ચીફ ઓફિસરે RTIમાં ખોટી માહિતી આપીને અરજદારને ગેરમાર્ગે દોર્યા: 10 હજારનો દંડ ફટકારતા સરકારી આલમમાં ફફડાટ
જેતપુર-નવાગઢ નગરપાલિકાના તંત્રમાં ચાલતી લોલમલોલ સામે રાજ્ય માહિતી આયોગે લાલ આંખ કરી છે. માહિતી અધિકાર અધિનિયમ (આરટીઆઈ) હેઠળ અરજદારને જાણી જોઈને ખોટી અને ગેરમાર્ગે દોરનારી માહિતી પૂરી પાડવા બદલ જેતપુર નગરપાલિકાના ચીફ ઓફિસર પી.બી. પરમારને આયોગે રૂપિયા 10,000નો દંડ ફટકારતા સરકારી આલમમાં ફફડાટ ફેલાયો છે.
આ કેસની વિગતો મુજબ, જેતપુરના જાગૃત નાગરિક અને અરજદાર બહાદુરસિંહ ગોહિલે આરટીઆઈ કાયદા હેઠળ નગરપાલિકા પાસે ટાઉન પ્લાનિંગ કમિટીની મિટિંગ અંગે માહિતી માંગી હતી. જોકે, જાહેર માહિતી અધિકારી અને ચીફ ઓફિસર પી.બી. પરમારે લેખિત જવાબમાં એવું જણાવ્યું હતું કે આ મિટિંગ ‘મામલતદાર કચેરી’ ખાતે યોજાઈ હતી. પરંતુ હકીકત એ હતી કે આ મિટિંગ નગરપાલિકા ખાતે જ યોજાઈ હતી. આમ, સ્થળ અંગે ખોટી માહિતી આપી અરજદારને ગેરમાર્ગે દોરવાનો પ્રયાસ થયો હતો.
ગાંધીનગર ખાતે રાજ્ય માહિતી કમિશનર વિપુલ કનસારા સમક્ષ ચાલેલી સુનાવણીમાં આ બાબતનો પર્દાફાશ થયો હતો. આયોગે નોંધ્યું હતું કે અધિકારી દ્વારા જાણી જોઈને માહિતી છુપાવવા અને મોડી મળે તે હેતુથી ગેરમાર્ગે દોરવાનું કૃત્ય કરવામાં આવ્યું છે. સુનાવણી દરમિયાન ખુદ અધિકારીએ સ્વીકાર્યું હતું કે તેઓ સાચી માહિતી આપવા તૈયાર છે, પરંતુ અગાઉ ખોટો જવાબ અપાયો હોવાનું સાબિત થયા આયોગે તેમનો ખુલાસો ગ્રાહ્ય રાખ્યો ન હતો.
આ પણ વાંચો :રાજકોટ એરપોર્ટ પર નવા પાયલોટને ટ્રેનિંગ: 1 વર્ષમાં 843 તાલીમી વિમાનોની ઉડાન, લાંબો રન વે નવા પાયલોટસ માટે અનુકૂળ
માહિતી અધિકાર અધિનિયમ-2005ની કલમ 20(1) હેઠળ સત્તાનો ઉપયોગ કરી કમિશનરે ચીફ ઓફિસર પી.બી. પરમારને રૂ. 10,000નો દંડ ફટકાર્યો છે. આ રકમ તેમણે પોતાના સ્વ-ભંડોળમાંથી ભરપાઈ કરવાની રહેશે. જો તેઓ એક માસમાં રકમ જમા ન કરાવે તો તેમના પગારમાંથી કપાત કરીને સરકારી તિજોરીમાં જમા લેવાનો આદેશ કરવામાં આવ્યો છે.
