RMCનું બજેટ 3350 કરોડ આસપાસ રહેશે: આંગળીના વેઢે ગણાય એટલી જ નવી યોજના જાહેર થશે,જાણો શું-શું કાગળ પર જ રહ્યું?

રાજકોટ મહાપાલિકા દ્વારા નાણાંકીય વર્ષ 2026-27નું ડ્રાફ્ટ બજેટ તૈયાર કરવા માટે છેલ્લા ઘણા દિવસથી તૈયારીઓ ચાલી રહી છે ત્યારે સોમવારે આ બજેટ રજૂ થઈ જાય તે પ્રકારે સંપૂર્ણ ડ્રાફ્ટ તૈયાર કરી લેવામાં આવ્યો છે. આ વખતનું મહાપાલિકાનું બજેટ 3350 કરોડ આસપાસ રહેવાનો અંદાજ છે અને ખાસ કરીને નવી યોજનાઓનો ઢગલો કરવાની જગ્યાએ આંગળીના વેઢે ગણી શકાય તેટલી જ યોજનાઓ જાહેર કરવામાં આવશે. ખાસ કરીને 2025-26ના બજેટમાં જાહેર કરાયેલી યોજનાઓને આ વર્ષમાં પૂર્ણ કરી દેવા માટે આ વર્ષના બજેટમાં વધુ યોજનાઓને સામેલ કરવામાં આવી ન હોવાનું જાણવા મળ્યું હતું. એકંદરે ગત વર્ષના ડ્રાફ્ટ બજેટ કરતા આ વખતના બજેટમાં 235 કરોડ અથવા તો તેનાથી થોડો વધુ ઉમેરો કરવામાં આવી શકે છે.

દર વર્ષે મ્યુનિસિપલ કમિશનર દ્વારા ડ્રાફ્ટ બજેટ સ્ટેન્ડિંગ કમિટીને સોંપવામાં આવ્યા બાદ શાસકો દ્વારા તેમાં યોજનારૂપી રંગ પૂરવામાં આવતા હોય આ વર્ષે પણ એવું જ જોવા મળશે. ચૂંટણીનું વર્ષ હોવાથી લોકોને આકર્ષી શકે તેવી યોજનાઓ બજેટમાં ઉમેરવાની `તક’ શાસકોને જ આપવામાં આવશે. દર વર્ષની માફક આ વર્ષે પણ મ્યુ.કમિશનર દ્વારા મકાન, વાહન, પાણી અને ગાર્બેજ કલેક્શન (કચરો એકઠો કરવા) ઉપર આકરો કરબોજ ઝીકવામાં આવશે અને સ્ટેન્ડિંગ કમિટી દ્વારા જ્યારે બજેટને મંજૂરી અપાશે ત્યારે આ વેરાવધારો ફગાવી દેવાશે તે વાત પણ નિશ્ચિત છે. બીજી બાજુ અધિકારી સૂત્રોએ એવો દાવો પણ કર્યો હતો કે દર વર્ષે બજેટ જાહેર થાય ત્યારે નવું નાણાકીય વર્ષ શરૂ થાય તે પહેલાં બજેટનું 40% જેટલું જ કામ પૂર્ણ થતું હતું પરંતુ આ વર્ષે કામ 70% સુધી પહોંચી ગયું છે.

આ પણ વાંચો :7 દિવસમાં તમામ ફાઈલ ક્લિયર કરો, ઓફિસમાં નહીં ફિલ્ડમાં રહો: રાજકોટ મ્યુ.કમિશનરે તમામ શાખાના અધિકારીઓને આપ્યો આદેશ

એક વર્ષમાં વર્ગ-1થી લઈ 4 સુધીની 335ની ભરતી કરવાની વાત હતી, થઈ શકી માત્ર 5%

2025-26ના ડ્રાફ્ટ બજેટમાં મ્યુનિસિપલ કમિશનર દ્વારા વર્ગ-1ની 10, વર્ગ-2ની 12, વર્ગ-3ની 286, વર્ગ-4ની 27 મળી કુલ 335 જગ્યા ઉપર ભરતી કરવામાં આવશે તેવી જાહેરાત કરવામાં આવી હતી પરંતુ વાસ્તવિક્તા પ્રમાણે એક વર્ષની અંદર માંત્ર 5% જ ભરતી થઈ શકી છે. એકંદરે મહાપાલિકામાં પૂરતો સ્ટાફ ન હોવાને કારણે કામ ખોરંભે ચડી રહ્યું છે, પ્રોજેક્ટ સમયસર પૂર્ણ થઈ રહ્યા નથી સહિતના મુશ્કેલીઓ ઉદ્ભવી રહી છે. વળી, સરકાર દ્વારા ભરતી આડે કોઈ જ પ્રકારની રોક નથી પરંતુ સારા નહીં મારા-તારાની હુંસાતુંસીને કારણે ભરતી થઈ ન રહ્યાનો ગણગણાટ સાંભળવા મળી રહ્યો છે સાથે સાથે અધિકારી તેમજ પદાધિકારીઓ વચ્ચે યોગ્ય સંકલનના અભાવે પણ ભરતીની ગાડી પાટે ચડવાનું નામ લઈ રહી નથી.

આવાસ યોજનાની માહિતી આપવા વોર્ડવાઈઝ કેમ્પની જાહેરાતનું સૂરસૂરિયું

ગત વર્ષના બજેટમાં મ્યુનિસિપલ કમિશનર દ્વારા લોકોને ઘરનું ઘર મળી રહે તે માટે આવાસ યોજનાની માહિતી પહોંચાડવા વોર્ડવાઈઝ કેમ્પનું આયોજન કરવામાં આવશે તેવી જાહેરાત કરવામાં આવી હતી પરંતુ આ પ્રકારના કેમ્પ વોર્ડવાઈઝ તો દૂર ઝોનવાઈઝ પણ યોજાયા ન હોવાને કારણે હજુ પણ મોટી સંખ્યામાં આવાસ ધૂળ ખાઈ રહ્યા છે.

કેકેવી હોલથી મોટામવા સ્મશાન સુધીનો રસ્તો 108 ફૂટ, ત્યાંથી ન્યારી સુધીનો રસ્તો 135 ફૂટ પહોળો ન જ થયો

પાછલા બજેટમાં એવી જાહેરાત પણ કરવામાં આવી હતી કે 2025-26ના વર્ષ દરમિયાન કેકેવી હોલથી મોટામવા સ્મશાન સુધીનો સવા બે કિલોમીટરનો રસ્તો 30 મીટર (90 ફૂટ)માંથી પહોળો કરી 36 મીટર (108 ફૂટ) કરવા તેમજ મોટામવા સ્મશાનથી ન્યારી ડેમ એપ્રોચ રોડ સુધીના કાલાવડ રોડને 30 મીટર (90 ફૂટ)માંથી વધારી 45 મીટર (135 ફૂટ)નો કરવામાં આવશે. એક વર્ષ પૂર્ણ થઈ ગયું છતાં હજુ સુધી આ કામ શરૂ કરવામાં આવ્યું નથી. આ જ રીતે ત્રિકોણબાગથી માલવિયા ચોક સુધીનો રસ્તો પણ પહોળો થઈ શક્યો નથી.

19 ટીપી સ્કીમ ‘ડ્રાફ્ટ’ થઈ, ‘ફાઈનલ’ સ્ટેજ સુધી એક પણ ન પહોંચી

કોઈ પણ શહેરનો વિકાસ કરવા માટે ટાઉન પ્લાનિંગ જરૂરી હોય દરેક મહાપાલિકા દ્વારા આ દિશામાં ખાસ્સું ધ્યાન કેન્દ્રીત કરવામાં આવે છે. આ અંર્તગત મહાપાલિકાની કુલ 59 ટીપી સ્કીમ પૈકી 40 ટીપી સ્કીમ પ્રારંભીક રીતે મંજૂર કરાઈ છે. જ્યારે 19 ટીપી સ્કીમનો ડ્રાફ્ટ મંજૂર કરાયો છે. જો કે આખરી તબક્કો હજુ પૂર્ણ થયો ન હોય 2025-26ના વર્ષમાં એક પણ ટીપી સ્કીમ ફાઈનલ તબક્કા સુધી પહોંચી શકી નથી.

નવી ફૂડ લેબોરેટરી `કાગળ’ પર જ રહી, આરોગ્ય વિભાગની ભરતી પણ પાટે ન ચડી

2025-26માં આરોગ્ય વિભાગમાં હાલ 498 લોકોની જગ્યા સામે 327 લોકોની ભરતી કરવામાં આવી છે ત્યારે એક વર્ષમાં નવી ભરતી કરાશે તેવી જાહેરાત કરાઈ હતી પરંતુ આ ગાડી પાટે ચડી જ શકી ન્હોતી. આ ઉપરાંત ફૂડ શાખા દ્વારા લેવાયેલા ખાદ્યવસ્તુના નમૂનામાં ભેળસેળ છે કે નહીં તેનો ખુલાસો ઝડપથી થઈ શકે તેના માટે ફૂડ લેબોરેટરી બનાવવાનું પણ જાહેર કરાયું હતું જે હજુ સુધી કાગળ ઉપર જ રહેવા પામ્યું છે.

શાસકોએ એક વર્ષમાં ગ્રાઉન્ડ સહિતનું ભાડે આપી 12 કરોડથી વધુની આવકનો અંદાજ બાંધ્યો’તો, મળ્યા માત્ર 30 લાખ !

મહાપાલિકાના અધિકારીઓ હોય કે પદાધિકારીઓ તેઓ આવકના જે અંદાજ જાહેર કરે છે તેમાં અને વાસ્તવિક્તામાં જમીન-આસમાનની અંતર રહેતું હોય છે. ગત વર્ષના બજેટમાં શાસકો દ્વારા માધવરાવ સિંધિયા ક્રિકેટ ગ્રાઉન્ડ કોમર્શિયલ હેતુ માટે ભાડે આપવા, સ્માર્ટ સિટી વિસ્તારમાં લા,ટિંગ પોલ ઉપર જાહેરાત અને એલઈડી સ્ક્રીન-કિઓસ્ક ભાડે આપવા, લાંબા ગાળા માટે ટાઉન પ્લાનિંગ પ્લોટસ ભાડે આપવા, 100 સિટી બસની અંદર તેમજ બહાર જાહેરાતના હક્ક આપવા સહિતના મુદ્દે 12 કરોડથી વધુની આવક થશે તેવો અંદાજ જાહેર કર્યો હતો પરંતુ આવક માત્ર 30 લાખ જ થવા પામી છે. આ ઉપરાંત અટલ સરોવર ખાતે નિર્માણ પામેલી 42 દુકાનો પણ હજુ સુધી ભાડે આપી શકાઈ નથી.

શું-શું કાગળ પર જ રહ્યું ?

• ત્રિકોણબાગ, આત્મીય યુનિવર્સિટી પાસે અને ક્રિષ્ના પાર્ક હોટેલ (ગોંડલ રોડ ચોકડી નજીક) પાસે સ્કાય વોક-ફૂટ ઓવરબ્રિજ
• કાલાવડ રોડ પર અવધ રોડ નજીક થીમ બેઝડ ઑક્સિજન પાર્ક વિથ મોડર્ન ફૂડ કોર્ટ
• જ્યુબિલી, કનકનગર શાક માર્કેટનું નવીનીકરણ
• શ્રી રામનાથ મહાદેવ મંદિર બ્યુટિફિકેશન
• મહાપાલિકા હસ્તકનું રાજકોટનું પહેલું પશુ દવાખાનું
• મહાપાલિકાની શાળાઓમાં અભ્યાસ કરતી વિદ્યાર્થિનીઓએ સર્વાઈકલ કેન્સરની વિનામૂલ્યે વેક્સિન-મેમોગ્રાફી મશીન
• રેસકોર્સ રિંગરોડ ઉપર કાયમી સુશોભન માટે એલઈડી લાઈટિંગ
• લાખાજીરાજ શાક માર્કેટ (ધર્મેન્દ્ર રોડ)માં ફ્રૂટ માર્કેટ તેમજ હોકર્સ ઝોન