ત્રીજા વિશ્વના વધુ પાંચ દેશો માટે અમેરિકામાં પ્રવેશબંધી : પેલેસ્ટાઈન ઓથોરિટી માટે પણ નો એન્ટ્રી

અમેરિકાના ભૂતપૂર્વ પ્રમુખ ડોનાલ્ડ ટ્રમ્પની સરકારે વધુ પાંચ દેશો તેમ જ પેલેસ્ટાઈન ઓથોરિટી દ્વારા જારી કરાયેલા દસ્તાવેજો પર મુસાફરી કરનારાઓ માટે અમેરિકામાં પ્રવેશ બંધ કરવાનો આદેશ કર્યો છે. સાથે સાથે જ વધુ15 દેશોના નાગરિકો પર આંશિક પ્રતિબંધો લાદવામાં આવ્યા છે.

ટ્રમ્પ પ્રશાસને મંગળવારે જાહેર કર્યું કે બુર્કિના ફાસો, માલી, નાઈજર, દક્ષિણ સુદાન અને સીરિયાના નાગરિકોને અમેરિકામાં પ્રવેશ પર સંપૂર્ણ પ્રતિબંધ રહેશે. આ ઉપરાંત પેલેસ્ટાઈન ઓથોરિટી દ્વારા જારી કરાયેલા મુસાફરી દસ્તાવેજો ધરાવનારા લોકોને પણ અમેરિકામાં પ્રવેશની મંજૂરી નહીં મળે.

તે ઉપરાંત અંગોલા, એન્ટિગુઆ એન્ડ બાર્બુડા, બેનિન, ડોમિનિકા, ગેબોન, ગેમ્બિયા, આઈવરી કોસ્ટ, માલાવી, મૌરિટાનિયા, નાઈજિરિયા, સેનેગલ, તાંઝાનિયા, ટોંગા, ઝાંબિયા અને ઝિમ્બાબ્વેના નાગરિકો પર આંશિક પ્રતિબંધ લાગુ રહેશે. આ દેશોના નાગરિકો માટે ચોક્કસ પ્રકારના વિઝા, મુસાફરી અને ઇમિગ્રેશન પર કડક નિયંત્રણો રહેશે. પ્રશાસને સ્પષ્ટ કર્યું છે કે જેમના પાસે પહેલેથી માન્ય અમેરિકન વિઝા છે, જે અમેરિકાના કાયમી રહેવાસી (ગ્રીન કાર્ડ હોલ્ડર) છે, અથવા રાજદૂત, ખેલાડીઓ જેવા વિશિષ્ટ વિઝા કેટેગરીમાં આવે છે તેઓને આ પ્રતિબંધોમાંથી મુક્તિ મળશે.

આ પણ વાંચો :ટ્રેન મુસાફરીના 10 કલાક પહેલા તૈયાર કરાશે રિઝર્વેશન ચાર્ટ : વેઈટિંગ-RAC ટિકિટનું સ્ટેટસ વહેલુ ખબર પડી જશે

આ પહેલા જૂનમાં 12 દેશો માટે નો એન્ટ્રી ફરમાવવામાં આવી હતી

આ અગાઉ જૂન મહિનામાં ટ્રમ્પે 12 દેશોના નાગરિકો માટે અમેરિકામાં પ્રવેશ પર સંપૂર્ણ પ્રતિબંધ અને સાત દેશો પર કડક નિયંત્રણોની જાહેરાત કરી હતી. તેમાં અફઘાનિસ્તાન, મ્યાનમાર, ચાડ, રિપબ્લિક ઓફ કોંગો, ઇક્વેટોરિયલ ગિની, ઇરિટ્રિયા, હૈતિ, ઈરાન, લિબિયા, સોમાલિયા, સુદાન અને યેમનના નાગરિકો પર સંપૂર્ણ પ્રતિબંધ મૂકાયો હતો, જ્યારે બુરુંડી, ક્યુબા, લાઓસ, સિયેરા લિઓન, ટોગો, તુર્કમેનિસ્તાન અને વેનેઝુએલા પરથી આવનારા મુલાકાતીઓ પર વધારાના નિયંત્રણો લાગુ કરાયા હતા.