રાજકોટમાં 6 BHKનું 136 ફ્લેટવાળું 38 માળનું પ્રથમ બિલ્ડિંગ બનશે : સૌરાષ્ટ્રમાં પ્રથમવાર 476 ફૂટ ઉંચાઈના બિલ્ડિંગને મળી મંજૂરી
રાજકોટ શહેરનો વિકાસ કૂદકે ને ભૂસકે વધી રહ્યો છે અને એક બાદ એક હાઈરાઈઝડ બિલ્ડિંગ નિર્માણ પામી રહ્યા છે ત્યારે રાજકોટ જ નહીં બલ્કે સૌરાષ્ટ્રમાં પહેલીવાર 145 મીટર મતલબ કે 476 ફૂટની ઉંચાઈના રહેણાક-કોમર્શિયલ બિલ્ડિંગને સરકારના શહેરી વિકાસ વિભાગ તરફથી લીલીઝંડી મળી જતાં મહાપાલિકાએ કામ શરૂ કરવા પરવાનગી આપતા જ શહેરના બિલ્ડિંગ ક્ષેત્રે એક નવો અધ્યાય લખાયો છે. શહેરમાં 38 માળનું પ્રથમ બિલ્ડિંગ બનવા જઈ રહ્યું છે જેમાં 6 બેડરૂમ, હોલ, કિચન સહિતની સુવિધા મળશે.
મવડીમાં બીજા રિંગરોડ પર પરસાણા ચોક નજીક સ્કાયલાઈન નામનો પ્રોજેક્ટ શરૂ થઈ રહ્યો છે. આ બિલ્ડિંગમાં આધુનિક ઈન્ફ્રાસ્ટ્રક્ચર ઉપરાંત સસ્ટેનેબલ ડિઝાઈન, ફાયર સેફ્ટી નોર્મ્સ, ગ્રીન બિલ્ડિંગ સિસ્ટમ્સ, પાર્કિંગની વિશાળ જગ્યા સહિતની સુવિધાનો સમાવેશ કરવામાં આવ્યો છે. મ્યુનિસિપલ કમિશનર તુષાર સુમેરાના જણાવ્યા પ્રમાણે `ટોલ બિલ્ડિંગ પોલિસી’ અંતર્ગત પ્રાપ્ત થતી નવી તક હેઠળ ઉંચાઈવાળા વિકાસને પ્રોત્સાહન મળશે જેમાં શહેરની જમીનની કાર્યક્ષમતામાં વધારો થશે. આ ગગનચૂંબી ઈમારત રહેઠાણ, બિઝનેસ અને શહેરી જીવનસુવિધાઓ તરીકે ઓલ ઈન વન મોડેલ તરીકે શહેરના વિકાસને નવી દિશા આપશે.
બિલ્ડિંગની વાત કરવામાં આવે તો સંપૂર્ણ પ્રોજેક્ટ 12880 વાર જગ્યામાં નિર્માણ પામશે જેમાં 136 ફ્લેટ અને 12 દુકાન તેમજ શો-રૂમ બનશે. પ્રત્યેક ફ્લેટનો કાર્પેટ એરિયા 4551 ચોરસફૂટ રહેશે જેમાં છ બેડરૂમ, હોલ, કિચન (સર્વન્ટ રૂમ સાથે)ની સુવિધા આપવામાં આવશે. જ્યારે ચાર પેન્ટ હાઉસ બનશે જેનો કાર્પેટ એરિયા 7885 રહેશે. બે વિંગમાં નિર્માણ પામનારા આ બિલ્ડિંગમાં ગાર્ડનિંગ, પોડિયમ સહિતની સુવિધા આપવામાં આવશે.
ચાર વર્ષમાં કામ પૂર્ણ થવાનો અંદાજઃ મનસુખ ભીમાણી
સ્કાયલાઈન પ્રોજેક્ટના મનસુખભાઈ ભીમાણીએ જણાવ્યું કે સામાન્ય રીતે આ પ્રકારના પ્રોજેક્ટને શહેરી વિકાસ વિભાગ તરફથી એકાદ વર્ષમાં મંજૂરી મળી જતી હોય છે પરંતુ અમારા પ્રોજેક્ટને દોઢ વર્ષ બાદ મંજૂરી મળતા હવે ટૂંક સમયમાં જ કામ શરૂ કરી દેવામાં આવશે. આ પ્રોજેક્ટ ચાર વર્ષની અંદર પૂર્ણ કરવાનો લક્ષ્યાંક સેવી રહ્યા છીએ. ગુજરાતમાં મારો આ પ્રથમ જ પ્રોજેક્ટ છે. આ બિલ્ડિંગના આર્કિટેક્ચર ડિઝાઈન એન્જિનિયર તરીકે ભાવેશ પટેલ છે.
