પાકિસ્તાન તેના કર્યા ભોગવી રહ્યું છે : જયશંકર

સંયુક્ત રાષ્ટ્રની મહાસભાને કર્યું સંબોધન

વિદેશ પ્રધાન ડૉ. એસ જયશંકરે સંયુક્ત રાષ્ટ્ર મહાસભાની 79મી બેઠકને સંબોધિત કરતા એસ જયશંકરે પાકિસ્તાન તેના કર્મોનું પરિણામ ભોગવી રહ્યું છે અને પાકિસ્તાનની જીડીપીનો ઉપયોગ માત્ર કટ્ટરતા માટે થાય છે તેવું સ્પષ્ટ કહ્યું હતું.

પાકિસ્તાન પર નિશાન સાધતા એસ જયશંકરે કહ્યું, દરેક પ્રકારના આતંકવાદનો વિરોધ થવો જોઈએ અને પાકિસ્તાનને ખુલ્લું પાડવું જોઈએ. પાકિસ્તાનની આતંકવાદી નીતિ કોઈપણ કિંમતે સફળ નહીં થાય. આપણો પાડોશી દેશ પાકિસ્તાન આતંકવાદ માટે જાણીતો છે પરંતુ પાકિસ્તાન ક્યારેય સફળ થશે નહીં.

ડૉ. એસ. જયશંકરે કહ્યું, આ જ મંચ પરથી કેટલીક વિચિત્ર વાતો સાંભળી. હું ભારતની સ્થિતિ ખૂબ સ્પષ્ટ કરવા માંગુ છું – સરહદ પારના આતંકવાદની પાકિસ્તાનની નીતિ ક્યારેય સફળ થશે નહીં અને તેને સજા વિના જવાની કોઈ આશા હોવી જોઈએ નહીં. પાકિસ્તાન દ્વારા ગેરકાયદેસર રીતે કબજે કરાયેલા ભારતીય વિસ્તારને ખાલી કરવાનો એકમાત્ર મુદ્દો અમારી વચ્ચે ઉકેલવાનો છે.

એસ. જયશંકરે કહ્યું, આપણે બધા મુશ્કેલ સમયમાં અહીં ભેગા થયા છીએ. વિશ્વ હજી પણ કોવિડ રોગચાળાના વિનાશમાંથી બહાર આવ્યું નથી. રશિયા-યુક્રેન યુદ્ધ ત્રીજા વર્ષમાં પ્રવેશી ચૂક્યું છે અને ગાઝામાં સંઘર્ષ વધુ વ્યાપક બન્યો છે. આ એક એવો યુગ છે જ્યાં સમાધાન કરવું વધુ મુશ્કેલ બની ગયું છે. હાલમાં આપણે શાંતિ અને સમૃદ્ધિ બંનેને સમાન રીતે જોખમમાં જોઈ રહ્યા છીએ કારણ કે વિશ્વાસ હવે તૂટી ગયો છે.