ટ્રમ્પ સામે કયા મુદ્દે અમેરિકાના રાજ્યો અદાલત પહોંચી ગયા ? જુઓ

ડોનાલ્ડ ટ્રમ્પે અમેરિકાના 47મા પ્રમુખ તરીકે શપથ લીધા પછી એક સાથે 80થી વધુ એક્ઝિક્યુટિવ્સ ઓર્ડર પર હસ્તાક્ષર કરીને તરખાટ મચાવી દીધો છે. ચાર વર્ષ પછી વ્હાઈટ હાઉસમાં પાછા ફરેલા પ્રમુખ ટ્રમ્પે સોમવારે પહેલા દિવસથી જ કામ શરૂ કરી દેતાં અમેરિકાની સાથે સમગ્ર વિશ્વ પર અસર કરતા આદેશો આપવાનું શરૂ કરી દીધું હતું. ટ્રમ્પના આદેશ હેઠળ અમેરિકામાં જન્મના આધાર પર નાગરિકત્વનો બંધારણીય કાયદો રદ કરી દેવામાં આવ્યો છે, જેનો દેશભરમાં વિરોધ પણ થઈ રહ્યો છે. પરંતુ હવે આ આદેશને કોર્ટમાં પડકારવામાં આવ્યો છે.

ડેમોક્રેટિક પાર્ટીના પ્રભુત્વ વાળા 22 રાજ્યો અને અનેક સિવિલ રાઈટ ગ્રૂપે ટ્રમ્પના આ એક્ઝિક્યુટિવ ઓર્ડરને કોર્ટમાં પડકાર્યો છે. આ મામલે હવે કોર્ટમાં કેસ દાખલ કરવામાં આવ્યો છે. આમ અવતાવેત જ ટ્રમ્પ પોતાની નીતિઓના લીધે કાયદાના જંગમાં પરોવાઈ ગયા છે .

એવું પણ બહાર આવ્યું છે કે ટ્રમ્પની રિપબ્લિકન પાર્ટીના 26 ટકા નેતાઓ પણ આ નિર્ણયનો વિરોધ કરી રહ્યા છે અને બીજા પણ અંદરખાને રાજી નથી પણ બોલવાની હિંમત કરતાં નથી.

ડેમોક્રેટિક પ્રભુત્વ ધરાવતા રાજ્યોની સાથે-સાથે ડિસ્ટ્રિક્ટ ઓફ કોલંબિયા અને સાન ફ્રાન્સિસ્કોએ મંગળવારે બોસ્ટનની સંઘીય કોર્ટમાં પ્રથમ કેસ નોંધાવ્યો હતો. એવું કહેવામાં આવ્યું હતું કે, પ્રમુખ ટ્રમ્પનો આ નિર્ણય અમેરિકાના બંધારણનું ઉલ્લંઘન છે. આ કેસ બાદ અમેરિકન સિવિલ લિબર્ટીઝ યુનિયન અને ઈમિગ્રન્ટ્સ ઓર્ગેનાઇઝેશને પણ કોર્ટનો દરવાજો ખખડાવ્યો છે.

અમેરિકાના નાગરિકો પણ બહુમતી સાથે વિરોધમાં છે : સર્વેમાં થયો ખુલાસો

ટ્રમ્પની કમનસીબી એ છે કે એમના આ નિર્ણય સામે ખુદ અમેરિકાની જનતા જ એમની સાથે નથી. વાસ્તવમાં ચુંટણી પહેલા એક સર્વે કરાયો હતો જેમાં એવું તારણ નીકળ્યું હતું કે અમેરિકાની અડધાથી વધુ જનતા એમના આ નિર્ણયનો વિરોધ કરી રહી છે. એસોસીએટેડ પ્રેસ દ્વારા આ સર્વે થયો હતો. જેમાં એવું બહાર આવ્યું હતું કે 10 માંથી ફક્ત 3 અમેરિકી નાગરિકો જ ટ્રમ્પ સાથે છે . 51 ટકા નાગરિકો તેના વિરોધમાં છે . 20 ટકા લોકો એવા હતા જેમણે કશું કહેવાનો જ ઇનકાર કર્યો હતો.