મુખ્યમંત્રીઓ હંમેશા ટેન્શનમાં રહે છે કે ક્યાંક ખુરશી ન છોડવી પડે

એકથી વધુ અર્થ નીકળે તેવા નિવેદન કરવા માટે જાણિતા કેન્દ્રીય મંત્રી નીતિન ગડકરીએ ફરી એક વખત માર્મિક નિવેદન આપ્યું છે. રાજકારણને અસંતુષ્ટ આત્માઓનો સાગર ગણાવતા કહ્યું હતું કે, રાજકારણમાં દરેકને અસંતોષ અને ટેન્શન રહે છે અને દરેક વ્યક્તિ પોતાના હાલના પદ કરતાં ઊંચુ પદ મેળવવાની ઈચ્છા રાખે છે.’ નીતિન ગડકરી નાગપુરમાં આયોજિત એક પુસ્તક વિમોચન સમારોહમાં બોલી રહ્યા હતા. નીતિન ગડકરીએ કહ્યુ હતુ કે, ‘રાજકારણએ અસંતુષ્ટ આત્માઓનો સાગર છે.

જ્યાં દરેક વ્યક્તિ હંમેશા દુખી જ રહે છે. જે કોર્પોરેટરના પદ પર છે. તે એટલા માટે દુખી છે કે, તેણે ધારાસભ્ય બનવાની તક ન મળી. અને ધારાસભ્ય એટલા માટે દુખી છે કે, તેને મંત્રી બનવા ન મળ્યું. અને જે મંત્રી બને છે, તે એટલા માટે દુખી છે કે તેને સારું મંત્રાલય ન મળ્યું અને તે મુખ્યમંત્રી ન બની શક્યા. મુખ્યમંત્રી એટલા માટે ટેન્શનમાં રહે છે કે, હાઈકમાન્ડ ક્યાંક તેને પદ પરથી રાજીનામું આપવાનું કહી દેશે તો? ગડકરીએ કહ્યું હતું કે, ‘જીવન સમાધાન, જવાબદારી, મર્યાદાઓ અને વિરોધાભાસથી ભરેલું છે. કોઈ પણ વ્યક્તિ ભલે પારિવારિક, સામાજિક, રાજકીય કે કોર્પોરેટ જીવનમાં હોય પરંતુ જીવન હંમેશા બધા માટે પડકારો અને સમસ્યાઓથી ભરેલું હોય છે. અને તેનો સામનો કરવા માટે વ્યક્તિએ ‘જીવન જીવવાની કળા’ સમજવી જરૂરી છે.’

નીતિન ગડકરીએ કહ્યું કે, ‘મેં મારી રાજકીય કારકિર્દીમાં અમેરિકાના ભૂતપૂર્વ રાષ્ટ્રપ્રમુખ રિચર્ડ નિક્સનની આત્મકથા વાંચી છે. જેમાં કહેવામાં આવ્યું છે કે, માણસ જ્યારે સંપૂર્ણ હારી જાય છે, ત્યારે તે સમાપ્ત થઇ જતો નથી. પરંતુ જ્યારે તે હાર માની લે છે, ત્યારે તે સમાપ્ત થઇ જાય છે.’ ગડકરીએ સુખી જીવન માટે સારા માનવીય મૂલ્યો પર ભાર મૂક્યો હતો. તેમણે જીવન જીવવા અને સફળ થવા માટે તેમના આદર્શો અને સિદ્ધાંતોને લોકો સાથે શેર કર્યા હતા.