WhatsAppએ સરકારને આપ્યો જવાબ, યુઝરનેમ ફીચર ભારતમાં હોલ્ડ પર: હવે સરકાર કરશે નિર્ણય

મેટાની મેસેજિંગ એપ WhatsAppના નવા ‘યુઝરનેમ ફીચર’ને લઈને કેન્દ્ર સરકાર અને કંપની વચ્ચે ખેંચતાણ શરૂ થઈ છે. સરકારે સાયબર છેતરપિંડી અને નકલી ઓળખનો ભય દર્શાવીને WhatsAppને નોટિસ મોકલી હતી. WhatsAppએ ગુરુવારે સરકારને પોતાનો જવાબ સુપરત કરી દીધો છે. હવે સરકાર જવાબની સમીક્ષા કરી રહી છે અને આગળનો નિર્ણય લેશે. ત્યાં સુધી ભારતમાં આ ફીચર શરૂ ન કરવાની WhatsAppએ સરકારને ખાતરી આપી છે.

સરકારે શા માટે નોટિસ મોકલી? 

ગયા બુધવારે કેન્દ્ર સરકારે WhatsAppને નોટિસ જારી કરીને યુઝરનેમ ફીચર અંગે ગંભીર ચિંતા વ્યક્ત કરી હતી. સરકારનું કહેવું છે કે મોબાઇલ નંબર વિના વાતચીતની સુવિધા ઓનલાઈન છેતરપિંડી, ફિશિંગ, ‘ડિજિટલ અરેસ્ટ’ સ્કેમ અને નકલી ઓળખ જેવા સાયબર ગુનાઓમાં વધારો કરી શકે છે. 

નોટિસમાં સરકારે સ્પષ્ટ કહ્યું હતું કે સંતોષકારક જવાબ ન મળે ત્યાં સુધી ભારતમાં આ ફીચર લોન્ચ ન કરવામાં આવે.

WhatsAppએ શું જવાબ આપ્યો? 

સૂત્રોના જણાવ્યા અનુસાર WhatsAppએ ગુરુવારની ડેડલાઇન પહેલા સરકારને જવાબ મોકલી આપ્યો છે. કંપનીએ સરકારને ખાતરી આપી છે કે સરકાર સાથે ચર્ચા પૂર્ણ ન થાય ત્યાં સુધી આ ફીચર ભારતમાં શરૂ કરવામાં આવશે નહીં. WhatsAppએ જવાબ આપવા માટે વધારાનો સમય પણ માંગ્યો હતો.

આ પણ વાંચો: ચાંદીપુરા વાયરસથી વધુ એક બાળકીનું શંકાસ્પદ મોત – જાણો લક્ષણો

WhatsAppનું યુઝરનેમ ફીચર શું છે? 

હાલમાં WhatsApp પર ચેટ કરવા માટે એકબીજાનો મોબાઇલ નંબર જાણવો જરૂરી છે. નવા યુઝરનેમ ફીચરમાં યુઝર્સ પોતાનો એક યુનિક @યુઝરનેમ બનાવી શકશે. આનાથી નંબર શેર કર્યા વિના પણ લોકો એકબીજા સાથે કોન્ટેક્ટ કરી શકશે. ઇન્સ્ટાગ્રામ અને ટેલિગ્રામ જેવી એપમાં પહેલાથી આ ફીચર છે.

IT સચિવનું નિવેદન અને અન્ય એપનું શું? 

CII GCC બિઝનેસ સમિટ દરમિયાન IT સચિવ એસ. કૃષ્ણને કહ્યું કે WhatsAppનો જવાબ મળી ગયો છે અને તેની તપાસ ચાલી રહી છે. 

જ્યારે તેમને પૂછવામાં આવ્યું કે Telegram અને Signal જેવી અન્ય એપને પણ નોટિસ મોકલાઈ છે કે કેમ, તો તેમણે કહ્યું કે તેમની પાસે જવાબ આપવા માટે હજુ થોડો વધુ સમય છે.

આગળ શું થશે? 

હવે સરકાર WhatsAppના જવાબની કાનૂની અને ટેકનિકલ રીતે સમીક્ષા કરશે. સાયબર સુરક્ષા અને યુઝર્સની પ્રાઇવસી વચ્ચે સંતુલન સાધ્યા બાદ જ સરકાર આ ફીચરને ભારતમાં મંજૂરી આપશે કે નહીં તે નક્કી કરશે. ફિલહાલ WhatsAppના 50 કરોડથી વધુ ભારતીય યુઝર્સ માટે આ ફીચર હોલ્ડ પર રહેશે.