વ્હૉટ ઈઝ ધીસ? રેલવે સ્ટેશન પાસે દબાણ-રસ્તાની હાલત જોઈ RMC કમિશનર ધુંઆપુંઆ! અધિકારીઓને સ્થળ પર જ ખખડાવી નાખ્યા
રાજકોટનું રેલવે સ્ટેશન કે જ્યાં સવારથી લઈ સાંજ સુધી હજારો મુસાફરોની અવર-જવર રહે છે સાથે સાથે વાહનોની પણ સતત અવર-જવર રહેતી હોવાથી આ રસ્તાને વર્ષો પહેલાં ડિમોલિશન કરી પહોળો કરવામાં આવ્યો હતો. જો કે ત્યારબાદ રસ્તો તો વ્યવસ્થિત પહોળો ન થયો પરંતુ હોટેલ સહિતના દબાણો ખડકાઈ જતાં આખો દિવસ અહીં ટ્રાફિકજામની સમસ્યા રહે છે. આ ઉપરાંત રેલવે જંકશન રોડ કે જે અંદાજે એકાદ કિલોમીટર છે ત્યાં ગેરકાયદેસર શાકમાર્કેટ ભરાઈ રહી હોય સ્થિતિ બદથી બદતર થઈ જવા પામી છે. આ બધાની વચ્ચે મ્યુનિસિપલ કમિશનર તુષાર સુમેરા દ્વારા આ રસ્તાની ઓચિંતી મુલાકાત લેવામાં આવતાં સ્થિતિ જોઈ તેઓ પણ ચોંકી ઉઠ્યા હતા.
મ્યુનિસિપલ કમિશનર પોતાની સાથે દબાણ હટાવ શાખા, બાંધકામ શાખા, પર્યાવરણ શાખા સહિતના અધિકારીઓને લઈ ગયા હતા. સૌથી પહેલાં તો ગેરકાયદે ભરાતી શાક માર્કેટ જોઈને દબાણ હટાવ શાખાના સ્ટાફને સ્થળ ઉપર જ ખખડાવી નાખવામાં આવ્યા હતા. આ પછી રસ્તા પરની ફૂટપાથ ઉપર ઉખડેલા પેવિંગ બ્લોક તેમજ રસ્તાની સ્થિતિ જોઈને બાંધકામ શાખાનો પણ ઉધડો લેવાયો હતો. જ્યારે બિલકુલ સફાઈ જોવા ન મળતાં પર્યાવરણ શાખાના સ્ટાફને પણ ઠપકો અપાયો હતો. જંકશન મેઈન રોડની મુલાકાત પૂર્ણ થયા બાદ ઓફિસમાં પણ ત્રણેય શાખાના અધિકારીઓનો ક્લાસ લેવામાં આવ્યો હોવાનું જાણવા મળ્યું હતું.
કમિશનર દ્વારા જવાબદાર દરેક અધિકારીને ગેરકાયદેસર શાક માર્કેટ દૂર કરાવવા, ફૂટપાથ પર પેવિંગ બ્લોક ફિટ કરાવવા, હોટેલોએ કરેલુ દબાણ દૂર કરાવવા એક સપ્તાહનું અલ્ટીમેટમ આપ્યું હતું અને જો એક સપ્તાહમાં કાર્યવાહી પૂર્ણ નહીં કરાય તો પગલાં માટે તૈયાર રહેવા પણ કડક ભાષામાં આદેશ આપવામાં આવ્યો હતો.
આ ઉપરાંત તેમણે જ્યુબિલી ગાર્ડનમાં કાર્યરત જ્યુબિલી કમ્પોસ્ટ પ્લાન્ટ, જંકશન પ્લોટ આરોગ્ય કેન્દ્ર સહિતની મુલાકાત પણ લીધી હતી.
