રાજકોટમાં તોફાની વરસાદમાં લગ્નમંડપ ઊડયો, 7 વૃક્ષ ધરાશાયી : 40 થી 50 કિલોમીટરની ઝડપે પવન ફૂંકાતા PGVCLના 11 ફીડર બંધ

રાજકોટમાં શુક્રવારે ભીમ અગિયારસના શુભ મુહૂર્તમાં ભાવનગર, અમરેલી અને જૂનાગઢ જિલ્લામાં મેઘ પધરામણી થયા બાદ શનિવારે પણ વૈષ્ણવોની અગિયારસના શુકનમાં રાજકોટમાં મેઘરાજાએ અચાનક ગાજવીજના કડાકા-ભડાકા સાથે ધમાકેદાર એન્ટ્રી કરી અડધો કલાક જેવા સમયગાળામાં પોણો ઈંચ જેવો વરસાદ વરસાવ્યો હતો. મેઘરાજાની ધમાકેદાર ઇનિંગથી શહેરના અનેક વિસ્તારોમાં રોડ ઉપર પાણી ચાલતા થયા હતા.

રાજકોટમાં શનિવારે સાંજના સમયે વીજળીના કડાકા-ભડાકા અને મીની વાવઝોડા સાથે પોણો ઈંચ જેટલો વરસાદ વરસ્યો હતો ત્યારે તોફાની વરસાદમાં શહેરમાં 80 ફૂટ રોડ ઉપર એક લગ્નમંડપ ઉડી ગયો હતો. સાથે જ ભારે પવનને કારણે શહેરમાં સાત સ્થળે વૃક્ષ પડી જવા ઉપરાંત PGVCLના 11 ફીડર બંધ થઈ ગયા હતા. જેમાં પંચશીલ ફીડરમાં તાર તૂટી ગયો હતો તો ભોમેશ્વરમાં કેબલ બોક્સ તૂટી જતા અનેક વિસ્તારમાં વીજ પુરવઠો ખોરવાઈ ગયો હતો.

રાજકોટ શહેરમાં શનિવારે સાંજે અચાનક ગાજવીજ સાથે આવેલા વરસાદે પળવારમાં જ કેહર વરસાવ્યો હતો. સાંજના સાડા ચાર વાગ્યાના અરસામાં અચાનક કાળા ડિબાંગ વાદળ છવાયા બાદ 40 થી 50  કિલોમીટરની ઝડપે પવન ફૂંકાવાની સાથે વીજળીના કડાકા ભડાકા થતા શહેરના કોઠારીયા રોડ, એસટી વર્કશોપ, જલારામ ચોક, ધર્મજીવન સોસાયટી, ધારા સોસાયટી અને 80 ફૂટ રોડ, કૃષ્ણનગર, સ્વામિનારાયણ ચોક સહિતના અલગ અલગ સ્થળોએ સાત વૃક્ષ પડી ગયા હતા તેમજ 80 ફૂટ રોડ ઉપર એક લગ્નમંડપ પણ ધરાશાયી થઈ ગયો હતો. બીજી તરફ ભારે પવન સાથે વરસાદ આવતા રાજકોટ શહેરમાં PGVCLના અગિયાર ફીડર ઠપ્પ થઈ ગયા હતા.

આ પણ વાંચો : એલોન મસ્કની Starlinkને કેન્દ્ર સરકારે આપી મંજૂરી : કેટલી હશે સ્પીડ અને શું હશે કિંમત ? જાણો તમામ ડિટેલ્સ

જેમાં પંચશીલ સોસાયટી નજીક વીજ તાર તૂટી ગયો હતો તેમજ ભોમેશ્વર વિસ્તારમાં PGVCLનું કેબલ બોક્સ તૂટી જતા કલાકો સુધી વીજ પુરવઠો ખોરવાઈ ગયો હતો.વરસાદ અને તોફાની પવનને કારણે PGVCLના કોઠારીયા, ધારા, ભોમેશ્વર, ગાયકવાડી, ડિલક્સ અને પંચશીલ સહિતના ફીડર બંધ થયા હતા જેમાં સાંજના સાત વાગ્યા સુધીમાં 6 ફીડર ચાલુ કરાયા હતા જયારે અન્ય ફીડરમાં મરામત કામગીરી હાથ ધરવામાં આવી હતી.