મેટ્રોમાં જવું કે બાઈક પર ?? વિચારવું પડશે! અમદાવાદના 10 સ્ટેશને પાર્કિંગ ચાર્જ ટિકિટ કરતા વધી ગયો

અમદાવાદમાં તમે રોજ મેટ્રોમાં જાવ છો? સવારે બાઈક લઈને સ્ટેશન સુધી, પછી મેટ્રોમાં ઓફિસ અને સાંજે પાછા? તો હવે ખિસ્સા પર થોડો ભાર વધવાનો છે. કારણ કે જે પાર્કિંગની જગ્યા માટે AMCએ મફત આપવાનું કહ્યું હતું, ત્યાં હવે પૈસા લેવાનું શરૂ થવાનું છે. શહેરમાં મેટ્રો તો આવી ગઈ, પણ પાર્કિંગની તકલીફ તો એવી ને એવી જ છે. નવરંગપુરા, સાબરમતી કે વસ્ત્રાલ જેવા સ્ટેશનો પર જાવ તો ખબર પડે, લોકો ગમે ત્યાં બાઈક મૂકીને જતા રહે છે. આ જ તકલીફને દૂર કરવા AMCએ 10 જગ્યાએ પાર્કિંગની જાહેરાત કરી હતી, પણ હવે ફ્રીને બદલે પેઈડ કરી દીધું છે.

AMCએ કુલ 10 મેટ્રો સ્ટેશનો પાસે પાર્કિંગ પ્લોટ નક્કી કર્યા છે. જેમાં નવરંગપુરામાં 3, સાબરમતીમાં 3, વસ્ત્રાલમાં 2, એસ.પી. સ્ટેડિયમ પાસે 2 અને રામોલ પાસે 2 સ્ટેશનોનો સમાવેશ થાય છે. આ બધી જગ્યાઓ પર કુલ 3342 ટુ-વ્હીલર અને 200 ફોર-વ્હીલર એમ કુલ 3500થી વધુ ગાડીઓ પાર્ક થઈ શકે તેવી વ્યવસ્થા છે.હવે AMCએ આ પ્લોટ્સ કોન્ટ્રાક્ટરોને માત્ર 13 હજારથી 50 હજાર રૂપિયાના માસિક ભાડે આપી દીધા છે. આ ભાડું ખૂબ ઓછું કહેવાય. પણ હવે કોન્ટ્રાક્ટરો લોકો પાસેથી બાઈક માટે 5 રૂપિયાથી 50 રૂપિયા સુધી અને કાર માટે 15 રૂપિયાથી 120 રૂપિયા સુધીનો ચાર્જ વસૂલશે. ચાર્જ કેટલા કલાક પાર્ક કરો છો તેના પરથી નક્કી થશે.

રોજના મુસાફરો જે 8 થી 10 કલાક પાર્કિંગ કરે છે, તેમને રોજના 25 થી 70 રૂપિયા આપવા પડશે. વિચારો, મેટ્રોની ટિકિટ 20-30 રૂપિયા અને પાર્કિંગ 70 રૂપિયા. એટલે રોજનો ખર્ચ 100 રૂપિયા થઈ ગયો. મહિને 3000 રૂપિયા. આટલામાં તો બાઈકનું પેટ્રોલ જ નખાઈ જાય. એટલે લોકો કહે છે કે આના કરતા બાઈક પર જ જવું સારું. કોન્ટ્રાક્ટરને ફાયદો થશે. 13 હજાર ભાડું આપીને તે રોજના 5000 કમાઈ લેશે. પણ માર સામાન્ય માણસને પડશે. વિદ્યાર્થીઓ અને નોકરિયાત વર્ગ જે રોજ મેટ્રો વાપરે છે, તેમના ખિસ્સા પર સીધો ભાર પડશે.

સરકાર કહે છે કે પબ્લિક ટ્રાન્સપોર્ટ વાપરો, પણ જો પાર્કિંગ જ મોંઘું કરી દો તો લોકો કેમ વાપરે? લોકોની માંગ છે કે રોજના મુસાફરો માટે માસિક પાસ કાઢો. 300-400 રૂપિયામાં મહિને પાર્કિંગ પાસ આપો તો લોકોને પરવડે. નહીં તો લોકો મેટ્રો વાપરવાનું બંધ કરી દેશે અને ટ્રાફિક ફરી વધશે. AMCએ આ નિર્ણય પર ફરી વિચાર કરવો જોઈએ.